Michelle: Mavọ na Sophia? Oma vwerhen ovwẹ me vwọ mrẹ wẹ vwẹ uwevwin.

Sophia: Ọtiọyen ji te vwe.

Michelle: Me vwọ rhe kuko, a ta ota kpahen ẹro rẹ Ọghẹnẹ vwo nẹ ojaẹriọ avwanre. a Wọ tare nẹ oyena emu ọvo ru vwo roro kpahan ọke buebun rhire na, ma rho kẹ ọke rẹ oni wẹn vwọ wonma ọke rẹ imoto rọ roro vwo vwo asidẹnti. Kẹ, mavọ yen oma rẹ oni wẹn na hepha enẹna?

Sophia: Ọ dia ẹdẹ na eje yen yovwẹn kẹ-ẹ. Je, ẹdẹ ri nonẹna yoma.

Michelle: Ọyena vwerhoma. Aphro herọ-ọ nẹ ẹdia wo hirharokuẹ na lọhọre-e.

Sophia: Ọtiọyen. Ọke evo ke me vwẹ ẹwẹn roro ẹdẹ rẹ oja ro hirharokuẹ na che vwo vwoba.

Michelle: Ọ dia ofia-an. Wọ sa karophiyọ nẹ me vwọ rhe kuko, me nọ wẹn onọ ọvo nẹ ọ da dianẹ Ọghẹnẹ vwo ẹgba ro vwo si ojaẹriọ no, kẹ, diesorọ o rhe siono-o.

Sophia: Uyota, me karophiyọ.

Michelle: Tavwen a ke fuẹrẹn ẹkpahọnphiyọ ri Baibol na, je djunute ẹkpo evo ra ta ota kpahen kuko.

Sophia: Oyoma.

Michelle: Avwanre yonori nẹ odibo ri Jihova ọvo vwẹ ọke awanre je nọ kpahen oboresorọ Ọghẹnẹ vwọ vwẹ uphen kẹ ojaẹriọ. Dedena Ọghẹnẹ ghwọkuo fikirẹ onọ rọ nọre na-a yẹrẹ kọ vuẹrẹ nẹ ọ guọnọ esegbuyota-a.

Sophia: Mi ji roro kpahen ọyena.

Michelle: E ji yono nẹ ọ da Ọghẹnẹ siẹrẹ avwanre da rioja. Kerẹ udje, Baibol na tare nẹ ọke rẹ ihwo rọyen vwo hirharoku ukpokpogho, kọ họhọ nẹ “ọye e kpokpori.” b Ọ rha vwerhen oma ra vwọ riẹn nẹ ọ da Ọghẹnẹ siẹrẹ avwanre da riọja?

Sophia: Uyota wọ tare.

Michelle: Ukuotọ rọyen, avwanre vwo roro kpahen ẹgba rẹ Ọghẹnẹ vwori, avwanre da rhe mrẹvughe nẹ Ọghẹnẹ se phioba phiyọ ojaẹriọ na eje vwẹ ọke rọ guọnọre eje.

Sophia: Ẹbẹre yena ro vwẹ-ẹ. Diesorọ Ọghẹnẹ vwọ vwẹ uphẹn kẹ ojaẹriọ, jẹ o vwo ẹgba rọ vwọ dobọ rọyen ji?

Michelle: A sa mrẹ ẹkpahọnphiyọ wẹn na vwẹ ọbe ri Jẹnẹsis. Wọ riẹn ikuegbe rẹ Adam vẹ Ivi kugbe omamọ na?

Sophia: E, mi yono kpahọn vwẹ ishọshi. Ọghẹnẹ tare nẹ ayen ria omamọ rẹ urhe ọvo-o, ẹkẹvuọvo ayen kerhọ-ọ, ayen da riọ.

Michelle: Ọyena gbare. Asaọkiephana gbe jẹ a ta ota kpahen obo re so umwemwu rẹ Adam vẹ Ivi. Obo re phiare vwẹ ọke yena churobọ si oboresorọ avwanre vwọ rioja. Biko wo se se Jẹnẹsis uyovwin 3 owọ 1 re te 5?

Sophia: Oyoma. “Asakiephana ọrọdekọ kọye me vwo aghwanre nọ eranvwe ri chekọ vwẹ aghwa rẹ Ọrovwohwo Ọghẹnẹ mare na. Ọ da ta kẹ aye na, Ọ dianẹ Ọghẹnẹ tare nẹ, Wọ re emamọ rẹ irhe rẹ udju na vuọvo-o? Aye na da ta kẹ ọrọdekọ na, Avwanre sa re emamọ rẹ irhe rẹ udju na; ẹkẹvuọvo Ọghẹnẹ tare nẹ, Wa ria emamọ rẹ urhe rọ uherevie rẹ udju na-a, eyẹ wa vwẹ obọ te-e, we de rhe ghwu. Ẹkẹvuọvọ ọrọdekọ na da ta kẹ aye na, We che ghwu-u. Kidie Ọghẹnẹ riẹnre nẹ ọke wa da riọ ẹro rẹ ovwan ko rhie, ku wa họhọ Ọghẹnẹ, rọ riẹn erhuvwu vẹ umiovwo.”

Michelle: Wẹ kobiruo. Jẹ a fuẹrẹn awọreta nana ọvuọvo. Ẹsosuọ, noso nẹ ọrọdekọ ọvo ta ota kẹ aye na, Ivi. Asan ọfa vwẹ Baibol na tare nẹ Idẹbono yen ta ota kẹ aye na womarẹ ọrọdekọ. c Idẹbono nọ Ivi kpahen urhi rẹ Ọghẹnẹ jiri kpahen urhe ọvo. Wọ vwo oniso rẹ oborẹ Ọghẹnẹ tare nẹ ọ cha phia siẹrẹ ayen da re omamọ na?

Sophia: Ọ nẹ ayen che ghwu.

Michelle: Ọgbare. Vẹ eta re vwọ kpahọn na, Idẹbono de gun efian nyẹ Ọghẹnẹ. Jokaphiyọ obo rọ tare: “We che ghwu-u,” Idẹbono ko se Ọghẹnẹ ọvwọrofian!

Sophia: Mi ji rhi nyo ẹbẹre yena vwẹ ikuegbe na dẹvo-o.

Michelle: Ọ cha reyọ ọke a ke sa rhuẹrẹ ofian nana rẹ Idẹbono gunru na phiyọ. Wọ riẹn oboresorọ ọ vwọ dia ọtiọyen?

Sophia: Hmm. Me ghwa riẹ-ẹn.

Michelle: Gbe je djudje rọyen vwẹ idjerhe tiọna. Vwẹ ẹwẹn roro nẹ mi bru we rhe ẹdẹ ọvo je vuẹ wẹ nẹ me gan oma nọ wẹ. Mavọ yen wo se vwo djephia nẹ wọ gan nọ vwẹ?

Sophia: Mi niro nẹ a cha davwen oma ni.

Michelle: Ota na yen. Ọkiọvo a sa tanẹ a sane orọnvwọn ọvo rọ pha họhọhọ rere a mrẹ ohwo ro se muo. Vwọrẹ uyota, a vwọ guọnọ ohwo rọ ma gan oma bẹnre-e.

Sophia: Mi vwo ẹruọ wẹn dẹn.

Michelle: Kẹ, me da rha tanẹ me fuevun nọ wẹ ukperẹ me vwọ tanẹ me gan oma nọ wẹ vwo? Ọyena bẹnre, gbanẹ ọ dia ọtiọyen?

Sophia: Ọtiọyen mi niro.

Michelle: Abavo, kidie evun-efuọn fẹnẹ ẹgba ra sa davwen ni womarẹ orọnvwọn rọ họhọre.

Sophia: Ọtiọyen dẹn.

Michelle: Ọyen, a sa vwọ rhuẹrẹ ota na phiyọ, a guọnọ ọke ogrongron rere ihwo efa vwọ fuẹrẹn ovwẹ vẹ owẹ a vwọ riẹn ohwo rọ ghene ta uyota.

Sophia: Ota wẹn na gbare.

Michelle: Gbe jẹ a rhoma ni ẹkpo na vwẹ Jẹnẹsis. Idẹbono tare nẹ ọyen goma vrẹ Ọghẹnẹ?

Sophia: Ẹjo.

Michelle: Ọghẹnẹ rhe ghwe hwe ichichiyin na. Ẹkẹvuọvo, Idẹbono djephia womarẹ ota rọyen nẹ ọyen fuevun nọ Ọghẹnẹ. Kọyen ọ vuẹ Ivi nẹ, ‘Ọghẹnẹ gun ofian kẹ wẹ, ẹkẹvuọvo uyota yen me ta kẹ wẹ na.’

Sophia: Me mrẹ ọhọ na re.

Michelle: Ọghẹnẹ rọ vọnre vẹ aghwanre na, riẹnre nẹ ofori ọke buebun vwọ wanvrẹ a sa vwọ rhuẹrẹ ẹvwọsua nana phiyọ. Ukuko na, ka cha riẹn ohwo ro guẹn efian vẹ ọ rọ ta uyota.

Sophia: Kẹ ugege rẹ Ivi vwo ghwu nu, ọyena rhe djephia nẹ Ọghẹnẹ yen ta uyota-a?

Michelle: Vwọrẹ uyota, e se no ọtiọyen. Ẹkẹvuọvo, o ji vwo emuọfa ro fori nẹ a riẹn kpahen ẹvwọsuọ rẹ Idẹbono na. Rhoma ni owọ 5. Wọ jokaphiyọ oborẹ Idẹbono vuẹ Ivi?

Sophia: Ọ nẹ Ivi da re vwẹ omamọ na ẹro rọyen ko rhie.

Michelle: Ọtiọyen, ọ je tanẹ kọ cha “họhọ Ọghẹnẹ, rọ riẹn erhuvwu vẹ umiovwo.” Kọyen Idẹbonọ tanẹ Ọghẹnẹ si emu rẹ erhuvwu nu kẹ ihworakpọ.

Sophia: Ọ ro vwẹ re.

Michelle: Ọnana yen tobọ ẹvwọsuọ rọ ma rho.

Sophia: Die nẹrhẹ wọ ta ọtiọyen?

Michelle: Womarẹ eta yena, Idẹbonọ ghwa tanẹ Ivi kugbe ihworakpọ eje se yerin omamọ rẹ akpọ ababọ rẹ usuon rẹ Ọghẹnẹ. Vwẹ ẹdia nana dede, Jihova riẹnre nẹ idjerhe ro me yovwin rọ vwọ rhuẹrẹ ẹvwọsuọ na phiyọ, ọyen ọ vwọ vwẹ uphẹn kẹ Idẹbono sẹ o muwan ro vwo sun. Ọtiọyena, Ọghẹnẹ da vwẹ uphẹn kẹ Idẹbono ro vwo sun akpọ na omọke. Ọnana ghwe dje oboresorọ ojaẹriọ vwọ vọn akpọ na nonẹna​—kidie Idẹbono yen sun akpọ, ọ dia Ọghẹnẹ-ẹ. d Ẹkẹvuọvo iyẹnrẹn esiri herọ.

Sophia: Ọyen die?

Michelle: Baibol na yono uyota eghanghanre ivẹ kpahen Ọghẹnẹ. Ẹsosuọ, Jihova davwerhọ rẹ avwanre siẹrẹ a da rioja. Kerẹ udje, roro kpahen eta rẹ Ovie Devid re si phiyọ Une Rẹ Ejiro 31:7. Devid rhiẹromrẹ oja buebun vwẹ akpeyeren rọyen, ẹkẹvuọvo jokaphiyọ obo rọ ta kẹ Ọghẹnẹ vwẹ ẹrhovwo. Biko wo se se owọrota yena?

Sophia: Oyoma. Ọ da ta: “Oma vwerhe ovwẹ re me ghọghọ fiki rẹ ẹguọnọ wẹn ro jẹ rhẹriẹ, fikiridie wọ mrẹ oma ẹlagha mẹ, wọ nabọ vughe ọdjarhe mẹ.”

Michelle: Dede nẹ Devid rioja mamọ vwẹ akpeyerẹn, ọ mrẹ obọngan womarẹ ukẹcha ri Jihova. Ọyena vwerhen owẹ oma, wọ vwọ riẹn nẹ Jihova vwo oniso rẹ erọnvwọn eje re phia kẹ avwanre, tobọ te obo ri kpokpo avwanre ẹwẹn rẹ ihworakpọ che se vwo ẹruọ raye-en?

Sophia: E.

Michelle: Uyota rivẹ yen, Ọghẹnẹ cha rhọnvwe nẹ ojaẹriọ rẹ avwanre dia bẹdẹ bẹdẹ-ẹ. Baibol na tare nẹ Ọghẹnẹ che phioba phiyọ usuon rẹ Idẹbono kẹrẹkpẹ. O ji che si umiovwo eje no, ọtiọyen ji te oborẹ wẹ vẹ oni wẹn hirharokuẹ enẹna. Me sa rhe udughwrẹn rọ cha na, rere a ta ota kpahen oboresorọ o vwo mu avwanre ẹro nẹ Ọghẹnẹ che si ojaẹriọ eje no? e

Sophia: Ọyena shephiyọ.