Irere rehẹ uphẹphẹ rẹ Rom yen e de vwiẹ vwẹ ji yọnrọn ovwẹ ghwanre. Imigho yen a hwa kẹ ihwo rehẹ ekogho na vwẹ iruo. Akpeyeren ganre mamọ. Mi vughe oni mẹ-ẹ, mẹ vẹ ọsẹ me je riẹn yerẹ-ẹn. Mi de yono oma mẹ obo me sa vwọ vwẹrote oma mẹ vwẹ urhuvwu ro muoshọ na.

Mi ki te ẹgbukpe ihwe, jẹ mi cho uji re. Obọ rẹsosuọ me vwọ djẹ nẹ uwevwin ọyen ọke me vwọ hẹ ẹgbukpe 12. Ọke buebun yen ọsẹ mẹ vwo kpo ogba rẹ elọkpa de re beli mẹ. Mẹ vẹ ihwo phraphro mamọ, mi gbe ozighi, ophu rẹ ihworakpọ na eje ji mu uwe. Me vwọ hẹ ẹgbukpe 14, mi vwo vrẹn nẹ uwevwin, mi re rhivwin rhe ọfa-a. Ihuvwun egangan kọyen me reyọ, urhuvwu da rhe dia uwevwin mẹ. Kidie nẹ mi vwo asan mi sherhẹ-ẹn, ki mi kpanre ẹchẹ rẹ imoto rẹ ihwo ji sherhẹn evun rọyen kọkirhie. Urhiọke de te, ke me guọnọ ẹtẹrhe ame rere me sa vwọ họ.

Me da rhe tẹn ona rẹ uji echo. Mi fru ekpu miẹ ihwo ji gborho ihwo vwẹ uwevwin rayen vwẹ ason. Ememerha na, ka rhe riẹn vwẹ phiyọ orharhe ohwo. Okriri-i, ẹko rẹ inogbozighi evo de durhie uvwe nẹ mi rhi vwomaba ayen; ọnana da nẹrhẹ mi vwo “uphẹn” mi vwo cho uji vwẹ banki. Kidie nẹ mi djoma, ihwo rehẹ ẹko mẹ ki muọghọ kẹ vwẹ mamọ. Mi mu ọhwunu mẹ kpo kasan kasan; vwọrẹ uyota, mi phio phiyọ otọ rẹ ọchuyovwin mẹ. Ozighi, ihuvwun egangan, uji echo, erharhe eta, kugbe ọfanrhiẹn da rhe dia ẹkuruemu mẹ. Ọkieje yen elọkpa vwọ guọnọ ovwẹ muẹ. E mu vwe abọ buebun, me je ghwọrọ ikpe buebun vwẹ uwodi.

O vwo ọke ọvo re vwo siobọnu vwe nẹ uwodi, mi de bru oniọvo rẹ oni mẹ rọ dia ọmọtẹ ra. Me riẹnre nẹ oniọvo rẹ oni mẹ vẹ emọ rọyen na Iseri ri Jihova-a. Ayen de durhie uvwe kpo omẹvwa rẹ Iseri ri Jihova. Kidie nẹ me guọnọ riẹn oborẹ ayen ruẹ, mi de brorhiẹn mi vwo nene ayen ra. Avwanre vwo te Ọguan Ruvie na, me da tanẹ mi che chidia kẹrẹ ẹchẹ na rere me sa vwọ riẹn ihwo re ruọ vẹ ihwo re ro otafe. Vwọrẹ uyota, ọhwunu mẹ rhe vwe.

Omẹvwa yena wene akpeyeren mẹ. Me karophiyọ nẹ mi rorori nẹ me hẹ akpọ ọfa. Ihwo yerin uvwe sasasa vẹ opharo rẹ ehwẹ. Uruemu esiri rẹ Iseri na djephia je hẹ ẹwẹn mẹ te ọke na. Ọnana fẹnẹ oka rẹ akpọ me riẹnre jovwo dibi dibi!

Me da tuẹn uyono ri Baibol phiyọ vẹ Iseri ri Jihova. Mi vwo yono phiyọ ye, me da rhe mrẹvughe nẹ ofori nẹ mi wene akpeyeren mẹ kare kare. Mi de ru nene eta rehẹ Isẹ 13:20: “Ohwo rọ yan nene ẹvwaghwanre ko vwo aghwanre, ẹkẹvuọvo ugbeyan rẹ ẹkpa kọ re oja.” Me da rhe mrẹvughe nẹ ofori nẹ me kẹnoma kẹ ẹko me hepha na. Ọyena lọhọre-e, ẹkẹvuọvo womarẹ ukẹcha ri Jihova, mi de phikparobọ.

Mi ji wene irhuon vẹ osẹnvwe mẹ. Womarẹ ẹgbaẹdavwọn ọgangan, me da dobọ rẹ isigati ephopho vẹ ihuvwun egangan ẹreyọ ji. Mi de bru ẹton ogrongron mẹ, do erọnvwọn erhọn mẹ kufia, je kẹnoma ke erharhe eta. Ọnana yen obọ rẹsosuọ vwẹ akpeyeren mẹ, ri mi vwo ton sun obo ri mi ruẹ.

Oma rẹ ẹbe ese vẹ eyono vwerhen ovwẹ-ẹ, ọtiọyena kọ dia bẹnbẹn mi vwo muomaphiyọ uyono ri Baibol mẹ. Ẹkẹvuọvo, me vwọ davwẹngba phiyọ ye, ememerha na mi de rhi vwo ẹguọnọ ri Jihova, ẹwẹn obrorhiẹn mẹ ko kpokpo uwe. Ọke buebun mi no oma mẹ sakamu, mi ji vwo ẹwẹn ivivẹ nẹ Jihova che vwo ghovwo uvwe-e fikirẹ emu ebrabra mi rure. Vwẹ uvwre ọke yena, me mrẹ uchebro vwo nẹ isese ro shekpahen oborẹ Jihova vwọ reyọ vwo ghovwo Ovie Devid ọke ro vwo ru umwemwu ọgangan.—2 Samuẹl 11:1–12:13.

Egbaboṣe ọfa ọyen mi vwo ghwoghwo ota vwọ kẹ ihwo vwẹ iruo rẹ nuwevwin kpo uwevwin na. (Matiu 28:19, 20) Oshọ mu vwe nẹ me cha mrẹ ohwo ọvo rẹ mi wonma yẹrẹ gbeku jovwo re! Jẹ ememerha na, mi de rhi phi ọshọ na kparobọ. Me da mrẹ uvi rẹ evunvọnvwẹ re me vwọ vwẹ ukẹcha kẹ ihwo efa vwo yono kpahen Ọsẹ avwanre rọhẹ obo odjuvwu ro vwo ghovwo vọnvọn.

Jihova ri mi yono kpahen yen sivwin arhọ mẹ. Buebun rẹ igbeyan mẹ ri jovwo ghwure, efa hẹ uwodi, ẹkẹvuọvo mi yeren omamọ rẹ akpọ je hẹrhẹ obaro na. Mi yono obo ra vwomakpotọ ji sun ophu ọgangan mẹ. Ukuotọ rọyen, mẹ vẹ ihwo efa se vwo omamọ rẹ oyerinkugbe. Me je rọvwọn uvi rẹ aye re se Carmen. Avwanre ihwo ivẹ mrẹ aghọghọ ra vwọ vwẹ ukẹcha kẹ ihwo efa vwo yono kpahen Baibol na.

Asaọkiephana, omamọ iruo yen mi ruẹ, ọke evo iruo na churobọ si ibanki, ẹkẹvuọvo ukperẹ mi vwo gborho ayen, ki mi ru ibanki na fuan!