Vwẹro roro ọsẹ ro nene ọmọshare rọyen rọhẹ ẹgbukpe ighwrẹn ta ota, ọ da ta kẹ: “Vwẹ ọke grongron re wanre na, Ọghẹnẹ da ma akpọ vẹ erọnvwọn eje rẹhẹ evun rọyen, ọ da ma ọnre, emeranvwe, kugbe isio na. Ọmọshare rọyen na ko roro kpahọn, ọ da nọ: Ọsẹ mẹ, ono kọyen ma Ọghẹnẹ?”

Ọsẹ na da kpahen: “Ohwo vuọvo ma Ọghẹnẹ-ẹ, ọ herọ ọkieje.” Odjefiotọ yena vọn ọmọ na evun asaọkiephana. Ẹkẹvuọvo, ọ vwọ ghwanra na, ọnọ na kọ rhoma kpokpo ẹwẹn. Ọ mrẹ bẹnbẹn ro vwo vwo ẹruọ rọyen nẹ ohwo ọvo herọ ro vwo ọtonphiyọ-ọ. Ẹkẹvuọvo, akpọ vẹ odjuvwu vwo ọtonphiyọ. O se rhe roro: ‘Tivọ yen Ọghẹnẹ nurhe?’

Ọrhọ yen ẹkpahọnphiyọ ri Baibol na? Ẹkpahọnphiyọ vuọvo yen ọsẹ rẹ djudje rọyen na vẹ Baibol na vwọphia. Mosis da ta: “Ọrovwohwo, . . . tavwe rẹ igbenu na ke rhe tan phia, eyẹ tavwe wọ ke rhe mama otọ na vẹ akpọ na, nẹ irhiri re duvwu irhiri wọwẹ ọye Ọghẹnẹ.” (Une Rẹ Ejiro 90:1, 2) Vwẹ idjerhe vuọvo, ọmraro Aizaya de kuenu, rọ vwọ ta: “Wọ je riẹ-ẹn? Wo ji nyo-o? Nẹ Ọrovwohwo na ọye Ọghẹnẹ ri bẹdẹ na, ọye Ọmẹma rẹ oba rẹ akpọ na.” (Aizaya 40:28) Ọtiọyen ileta rẹ Jud siri djere nẹ Ọghẹnẹ herọ “bẹdẹ bẹdẹ.”—Jud 25.

Ẹkpo ri Baibol yena djerephia nẹ Ọghẹnẹ yen “Ovie ri bẹdẹ,” kirobo rẹ ọyinkọn Pọl djere. (1 Timoti 1:17) Ọnana mudiaphiyọ nẹ ọkieje yen Ọghẹnẹ vwọ herọ, otoro obo ọke na gron te-e. Ọ je cha rha dia ọkieje rhi te obaro na. (Ẹvwọphia 1:8) Ọtiọyena, Jihova vwọ herọ ọkieje na djerephia nẹ ọyehẹ Ọromevwẹgba na.

Diesorọ ọ vwọ bẹn e vwo vwo ẹruọ rẹ iroro nana? Kidie akpeyeren avwanre pha krẹkrẹ, eriyina ẹro avwanre vwo ni ọke vẹ o ọ rẹ Jihova fẹnẹre. Ọ vwọ dianẹ Ọghẹnẹ herọ bẹdẹ na, ẹgbukpe urinrin ọvo ghwa họhọ ẹdẹ ọvo vwẹ ẹro rọyen. (2 Pita 3:8) Kerẹ udje, abaka rọ diarọ te omarẹ ẹdẹ 50 sa riẹn obo rọ dias ihworakpọ vwo yerin te ẹgbukpe 70 yẹrẹ 80? Ọ cha bẹn mamọ! Dedena, Baibol na djere nẹ avwanre hepha kerẹ ebaka vwẹ ẹro rẹ Ọmemama Rode na. Vwẹ ẹro rọyen, ẹgba rẹ iroro avwanre tumuku-u. (Aizaya 40:22; 55:8, 9) O rhe fo nẹ o gbe avwanre unu siẹrẹ e rhe vwo ẹruọ rẹ ẹbẹre evo rẹ emama ri Jihova-a.

Dede nẹ ọ sa bẹn e vwo vwo ẹruọ rẹ obo ro mudiaphiyọ a vwọ dia bẹdẹ, jẹ ọhọ hẹ evunrẹ iroro yena. Ọ da dianẹ ohwo ọfa yen ma Ọghẹnẹ jovwo, ohwo yena kọyen e rhe se Ọmemama. Ẹkẹvuọvo, Baibol na tare nẹ Jihova yen “mama emu ejobi.” (Ẹvwọphia 4:11) Vwọba, avwanre riẹnre nẹ o vwo ọke ọvo rẹ akpọ vẹ odjuvwu vwo jẹ dia. (Jẹnẹsis 1:1, 2) Kẹ, tivọ yen ayen nurhe? Ọmemama na cha dia tavwen. Ọ je herọ a ke mrẹ emama efa re vwo aghwanre kerẹ Ọmọ ọvuọvo rọyen vẹ emekasha na. (Job 38:4, 7; Kọlose 1:15) O phẹnre nẹ, ọyen ọvo yen ka dia vwẹ ẹsosuọ. O vwo ọke vuọvo a vwọ ma-a; o vwo emu vuọvo rọ herọ rọ sa ma Jihova-a.

Akpeyeren avwanre vẹ akpọ na kugbe odjuvwu ghwa odjephia nẹ Ọghẹnẹ rọ herọ bẹdẹ yerẹn. O muẹro nẹ ọ rọ ma akpọ vẹ odjuvwu, rọ vwẹ irhi rọyen vwo suẹn ayen herọ notọ votọ rhe. Ọyen ọvo yen sa vwẹ arhọ kẹ kemu kemu eje.—Job 33:4.