Ọke me vwọ hẹ omotete, orua mẹ dia kẹrẹ Leipzig, rọhẹ ẹbẹre ọnre va nẹcha vwẹ Germany, o ghwe sheri kẹ asan ri Czech kugbe Polish da ghare ughwru-u. Me vwọ hẹ ẹgbukpe esan, fikirẹ iruo rẹ ọsẹ mẹ avwanre ke kua nẹ asan kpo asan, avwanre ka kua kpo Brazil kẹsiẹye avwanre ke rhe kua kpo Ecuador.

Mi vwo te ẹgbukpe 14, e de mu vwe kpo ibọdi sku vwẹ Germany. Kidie nẹ obọhwẹre ọnre rẹ America yen ọsẹ vẹ oni mẹ dia, mẹvwẹ ọvo kọyen vwẹrote oma mẹ. Mi de rhi vwo uruemu rẹ mẹvwẹ ọvo yen suẹn oma mẹ. Me nama davwerhọ rẹ oborẹ uruemu mẹ che djobọte ihwo efa wa-an.

Me vwọ hẹ egbukpe 17, ọsẹ vẹ oni mẹ da rhoma kua rhe Germany. Ẹsosuọ, mẹ vẹ ayen gba dia. Ẹkẹvuọvo, uruemu rẹ mẹvwẹ ọvo yen suẹn oma mẹ na da nẹrhẹ ọ bẹn mẹ vẹ ayen vwo ru kugbe kerẹ orua ọvo. Jẹ, mi vwọ ghwanre te ẹgbukpe 18, mi de vrẹn nẹ uwevwin.

Ọkieje kọyen ofu vwo dje vwe, kidie oborẹ me guọnọre vwẹ akpeyeren ji rhi te vwe obọ-ọ. Me vwọ fuẹrẹn akpeyeren rẹ ihwo evo vẹ ẹko rẹ ihwo evo nu, o de rhi muvwẹro nẹ obo ri me yovwin rẹ me sa vwẹ akpeyeren mẹ vwo ru yen mi vwo kin akpọ oyoyovwin nana bẹsiẹ rẹ ihworakpọ ke guọghọ kufia.

Mi vwo vrẹn nẹ Germany, me da dẹ imotosaikoro je kua kpo Africa. O kriri-i, me da rhoma rhivwin kpo Europe ra rhuẹrẹ imotosaikoro mẹ. Ọyena vwọ wan nu, mi de kpo orhoma rẹ abadi ra da họ de ji rovwonma vwẹ Portugal. Me da kpairoro vrẹn imotosaikoro na ra guọnọ okọ re me sa vwọ yan oyan mẹ na.

Mi de kuomakugbe ighene evo ri muegbe rẹ ayen vwọ ro okọ kpo ẹbẹre ochekọ rẹ Atlantic Ocean. Ohri rayen yen me da mrẹ Laurie, rọ dia aye me rhe rọnvwọn ukuko na. Ẹsosuọ, avwanre ke bi kpo okere rẹhe Caribbean. Avwanre vwọ dia Puerto Rico vwẹ ọmọke evo nu, avwanre de rhivwin kpo Europe. Avwanre vwẹ ẹwẹn sẹ avwanre sa mrẹ okọ rẹ avwanre se wene kpo ọ rẹ a sa dia. Ẹkẹvuọvo emeranvwe erha ọvo yen avwanre vwọ guọnọ okọ, kidie ẹguọnọ rẹ okọ na vwoba siẹvuọvo. Isodje ri Germany sane ovwẹ nẹ me rhe dia isodje.

Emeranvwe 15 yen me wianre kerẹ isodje ri Germany. Uvwre ọke yena yen me vẹ Laurie vwọ rọnvwọn, avwanre de brorhiẹn rẹ avwanre vwo muomaphiyọ uruemu ra vwọ yan nẹ asan kpo asan. Mi ki ton iruo rẹ isodje phiyọ, avwanre dẹ urhurho rẹ okọ phiyotọ. Me je vwọ hẹ iruo rẹ isodje na, ememerha na avwanre da rhẹriẹ urhurho rẹ okọ na kpo okọ diodi. Oborẹ avwanre ru dia evun rọyen ji kpo asan sansan vwẹ akpọ na yehẹ ẹwẹn avwanre jovwo. Jẹ, ọke nana mi vrẹ nẹ iruo rẹ isodje re, ẹkẹvuọvo avwanre je rhuẹrẹ okọ na phiyọ. Uvwre ọke nana yen Iseri ri Jihova vwo ghwoghwota kẹ avwanre, avwanre da tuẹn uyono ri Baibol phiyọ.

Ẹsosuọ, me ghwa mrẹ oboresorọ mi vwo ru ewene vwẹ akpeyeren mẹ-e. Mi ruemu rẹ aye ri me vẹ ọyen gba dia uwevwin na, mi ji dobọ rẹ isigati ephopho ji re. (Ẹfesọs 5:5) Kerẹ iroro rẹ avwanre jẹre re vwo kin akpọ na, mi niro nẹ avwanre vwọ ghwọrọ ọke rẹ avwanre vwọ fuẹrẹn emama rẹ Ọghẹnẹ fo obo re ru.

Vwọrẹ uyota, ofori nẹ me ghene ru ewene marho kpahen oka rẹ ohwo me hepha. Kidie nẹ omaẹkparọ vẹ uruemu rẹ mẹvwẹ ọvo yen suẹn oma mẹ gan nọ, kọ nẹrhẹ me vwẹroso oma mẹ ọvo ji tẹnroviẹ ophikparobọ mẹ ọvo. Akpeyeren mẹ ghwa ọromobọ mẹ ọvo.

Ẹdẹ ọvo, ki mi rhi se kpahen Ota ri Jesu vwẹ enu Ugbenu. (Matiu, uyovwinrota 5-7) Ẹsosuọ, mi ghwe vwo ẹruọ rẹ eta ri Jesu ta kpahen aghọghọ na-a. Kerẹ udje, Jesu tare nẹ ihwo rẹ owẹnvwe hwe vẹ itu rẹ urhuru ame siẹ che vwo aghọghọ. (Matiu 5:6) Ko gbevwunu oborẹ ohwo rọ guọnọ orọnvwọn se vwo vwo aghọghọ. Jẹ mi vwo yono yanran, ke me rhe mrẹvughe nẹ avwanre eje vwo ọdavwẹ ra vwọ ga Ọghẹnẹ ẹkẹvuọvo a cha rhọnvwe nẹ e vwo ọdavwẹ yena tavwen e ki se ruo gba. Kirobo rẹ Jesu tarọ; “Omavwerhovwẹn dia kẹ ihwo ri vwo ọdavwẹ rẹ Ota rẹ Ọghẹnẹ.”—Mattiu 5:3.

Avwanre vwọ tuẹn uyono ri Baibol phiyọ vwẹ Germany nu, me vẹ Laurie da kua kpo France, ọke vwọ yanran na, ukuko na avwanre da kua kpo Italy. Kasan kasan avwanre rare, avwanre jẹ Iseri ri Jihova ẹmrẹ-ẹ. Uvi rẹ ẹguọnọ rẹ ayen dje kẹ ohwohwo vẹ ufuoma rọhẹ uvwre rayen vọn vwẹ evun dẹn. Me mrẹrẹ vughe nẹ Iseri ri Jihova rehẹ akpọneje ghene orua ọvuọvo. (Jọn 13:34, 35) O kriri-i, me vẹ Laurie de bromaphiyame kerẹ Iseri ri Jihova.

Mi vwo bromaphiyame nu, mi de ru ewene kpahen oka rẹ ohwo re me hepha. Me vẹ Laurie de brorhiẹn rẹ avwanre vwo bi okọ wan vrẹ Africa kugbe Atlantic Ocean je wan fiẹ United States. Ọke rẹ mẹ vẹ Laurie vwọ hẹ evunrẹ okọ na vwẹ abadi na vẹ ogbugbu rẹ ame rọ riariẹ avwanre phiyọ yen me vwọ riẹn obo me hanvwe te vwẹ obọ rẹ ọmemama na. Kidie nẹ mi vwo ọke buebun jẹ o vwo obo me reyọ vwo ruẹ vwẹ evunrẹ abadi na-a, ki mi mu oma phiyọ ese ri Baibol na. Ikuegbe rẹ akpeyeren ri Jesu vwẹ otọrakpọ na te ẹwẹn mẹ mamọ. Jesu ohwo ọgbagba ro ji vwo ẹgba vrẹ obo me sa vwẹ ẹwẹn roro, jẹ ọ vwẹ ọke vuọvo vwo titi oma rọye-en. Ọkieje yen o vwo roro kpahen ọsẹ rọyen ukperẹ akpeyeren rọyen komobọ.

Mi vwo roro kpahen udje ri Jesu, ọ nẹrhẹ me mrẹ obo rọ ghanre te mi vwo phi uvie rẹ Ọghẹnẹ phiyọ ẹdia rẹsosuọ vwẹ akpeyeren mẹ ukperẹ mi vwo mu ẹwẹn mẹ kpahen obo mi ruẹ. (Matiu 6:33) Ọke rẹ me vẹ Laurie vwo bi te otọ ọyaya vwẹ United States, avwanre de brorhiẹn rẹ avwanre vwọ kpairoro vrẹ iroro rẹ avwanre vwo kin akpọ na riariẹ, ji brorhiẹn rẹ avwanre vwọ dia United States ji mu oma phiyọ ẹga rẹ avwanre.

Ọke ri jovwo re me vwọ vwẹrosua omobọ mẹ, mi vwo ẹwẹn ivivẹ kpahen erhiẹn mi brẹ. Asakiephana me rhe mrẹ uvi rẹ aghwanre ro se sun vwe re. (Aizaya 48:17, 18) Me je rhe mrẹ evunvọnvwẹ vwẹ akpeyeren vrẹ obo ri jovwo, ra vwọ ga Jihova je vwẹ ukẹcha kẹ ihwo efa vwo yono kpahọn.

Womarẹ irhi ri Baibol na re vwo ruiruo, me vẹ Laurie nabọ bọn orọnvwe rẹ avwanre gan. Avwanre ji vwiẹ ọmọtẹ ro vwo ẹguọnọ ri Jihova je ga asakiephana.

Akpeyeren ghwa lọhọ kẹ avwanre-e. Ẹkẹvuọvo womarẹ ukẹcha ri Jihova, avwanre brorhiẹn rẹ avwanre vwọ ga je vwẹrosuọ otoro obo re phiare-e.—Isẹ 3:5, 6.