Ekogho rọ vọnre vẹ ivwiogbere vwẹ orere ri Montreal yen me dia ghwanre. Ọke me vwọ hẹ emeranvwe esan, ọsẹ mẹ de ghwu, oni mẹ ọvo kọyen vwẹrote oghwa rẹ uwẹvwin na. Mẹvwẹ yen ubrevwiẹ usun rẹ emọ ẹrenren e vwiẹre vwẹ orua avwanre na.

Me vwọ rhua na, mi de mu akpeyeren mẹ ri kẹdẹ kẹdẹ kpahen ihuvwun, idjogba vẹ ozighi egbe, me je vwẹ ugbeyan vwo mu iji. Me vwọ hẹ ẹgbukpe ihwe, ki mi yan uwevwin vwọ kẹ igberadja kugbe ihwo ri momo ihwo igho vẹ orharhe ẹwẹn. Ọkieje kọyen me vwọ ghwa ihwo ria ji gun efian kẹ ayen rere ayen se vwo ru obo re me guọnọre. Kọ pha kerẹ uhuvwun vwọ kẹ vwẹ.

Mi de rhi vwo ona sansan rẹ obo ra ghwa ihwo ria ọke mi vwo te ẹgbukpe 14. Kerẹ udje, me sa dẹ ughọjọ, orọnvwọn ohọre kugbe ubiosa re pha kueku, mi mi ru ayen họhọ oro je shẹ ayen kẹ ihwo. Ighọ rẹ ọghware tiọyena je vwe mamọ. Ọkiọvo, me sa shẹ $10,000 vwẹ ọsoso ẹdẹ!

Ọke me vwọ hẹ ẹgbukpe 15 a da djẹ vwẹ nẹ isikuru re me dia. Ọtiọyena, irhuvwun kugbe asan rẹ imoto de won yẹrẹ iwevwin rẹ igbeyan keyen me dia.

Ọkieje kọyen elọkpa vwọ nọ vwẹ enọ fikirẹ ewian rẹ ọghware ri mi vwobọ vwọ na. Ẹkẹvuọvo, e mu vwe phiyọ uwodi-i, kidie ọ dia ekuakua re chori yen me shẹ-ẹ. Jẹ, ọ dia ọmọrhiẹ igho yen e ho vwe fikirẹ aye-en. Kidie nẹ oshọ rẹ ohwo vuọvo muvwe-e, ke me wian owian re me vwọ vwẹ igho rhe ihwo ri momo ihwo efa igho vẹ orharhe ẹwẹn. Owian yena vọnre vẹ imuoshọ, ọkiọvo mi tobọ ghwa ọhwunu nene oma. Vwẹ ẹdia efa, mi nene ẹko rẹ iji wian kuẹgbe.

Ọke me vwọ hẹ ẹgbukpe 17 yen mi vwo tu nyo kpahen Iseri ri Jihova. Mẹ vẹ ọsen mẹ yen gba dia ọke rọ vwọ ton uyono ri Baibol phiyọ vẹ ayen. Ẹkẹvuọvo, obo ri Baibol na ta kpahen obo ro fori nẹ e yeren akpọ wan je vwe-e, ọtiọyena me da yan jovwo, me vẹ aye ọfa re me kọn phiyọ jovwo kọyen gba dia kuẹgbe.

Akpeyeren mẹ weneri ọke rẹ ọmọtẹ rivẹ re me vẹ oyen gba jẹ ọsen vwọ ton uyono ri Baibol phiyọ vẹ Iseri ri Jihova! O ru ewene vwẹ akpeyeren rọyen, o gbevwunu nẹ kọ rhe dia ohwo rọ pha fuefu ro ji vwo odirin vrẹ obo ri jovwo. Mi de rhiabọreyọ edurhie vwo kpo omẹvwa vwẹ Ọguan Ruvie rẹ Iseri ri Jihova. Ayen emamọ ihwo, ayen da nabọ dede uvwe te oma. Ayen fẹnẹ ihwo me vẹ ayen gba herọ jovwo! Orua mẹ dje ẹguọnọ vẹ uruemu esiri kẹ vwẹ kakaka ọke me vwọ hẹ omotete-e. Ẹguọnọ ri mi rhiẹromrẹ vwẹ uvwre rẹ Iseri ri Jihova na yen obo re me ghwa guọnọ. Ọke rẹ Iseri na vwọ vwẹ uyono ri Baibol vwo mu kẹ vwẹ, mi de rhiabọreyọ vẹ omavwerhovwẹn.

Ọ rha dia Baibol ri mi yono-o, ọkiọvo ji mi ghwure. Mẹ vẹ eshare ivẹ muegbe rẹ ẹwẹn avwanre hẹrhẹ uji rẹ avwanre ke cho, rere avwanre sa vwọ hwa ighọ rẹ idjogba rẹ avwanre riosa rọyen jovwo, re vrẹ $50,000. Ẹkẹvuọvo, oma vwerhen ovwẹ mamọ nẹ mi vwomaba aye-en! Ọke rẹ ayen vwo kpo ujiecho na, e de hwe ọvo ji mu ọ ro chekọ phiyọ uwodi.

Mi ji vwo yono Baibol na, me da rhe mrẹvughe nẹ o vwo ewene buebun ri mi che ru. Kerẹ udje, me mrẹ oborẹ Baibol na tare vwẹ 1 Kọrẹnt 6:​10: “Iji, eyẹ ọvwurhuru, eyẹ ọgbaidi, eyẹ ọharhekan, eyẹ ogborhugborho sa reuku rẹ uvie rẹ Ọghẹnẹ na-a.” Owọrota yena da nẹrhẹ me viẹ, kidie mi vwobọ vwẹ erọnvwọn ebrabra buebun re. Me da rhe mrẹvughe nẹ o fori nẹ mi wene akpeyeren mẹ tototo. (Rom 12:⁠2) Mẹvwẹ ohwo ro gbozighi ro ji muophu djọghrọ djọghrọ, mi mu akpeyeren mẹ eje kpahen ofian ẹvwọrọn.

Ẹkẹvuọvo, Baibol na ji yono uvwe nẹ Jihova ọyen ohwo ro gbe arodọnvwẹ, ro ji vwo ghovwo. (Aizaya 1:​18) Me nẹrhovwo gangan me vwọ rẹ Jihova nẹ ọ chọn vwẹ uko vwo wene nẹ oka rẹ akpọ mi yerẹn jovwo. Womarẹ ukẹcha rọyen, mi de ru ewene vwẹ akpeyeren mẹ. Emu ọghanghanre ọvo rọ phiare yen mẹ vẹ ọsen mẹ vwọ rọvwọn vwo nene urhi.

Ẹgbukpe 24 yen me hepha me vwọ rọvwọn vẹ emọ erha. Asaọkiephana, o fori nẹ mi guọnọ omamọ iruo. Ẹkẹvuọvo, mi kpo isikuru sheri-i, mi ji vwo ohwo vuọvo ro che jiri uvwe vwọ kẹ ihwo efa-a. Vwẹ obọ ọfa, me da nẹrhovwo gangan rhe Jihova. Me da jowọ ra guọnọ iruo. Me vuẹ ihwo ri che phi vwe phiyọ iruo nẹ me guọnọ wene akpeyeren mẹ je dia ohwo rọ fuevun vwẹ iruo mẹ. Ọkiọvo, me je vuẹ ayen nẹ mi yono Baibol na, me je guọnọ dia omamọ ohwo. Buebun rayen senre nẹ ayen che phi vwe phiyọ iruo-o. Vwẹ okuphiyotọ rọyen, me da vuẹ ọshare ọvo erọnvwọn ebrabra eje ri mi ru wan re, ọshare na da ta: “Me ghwa riẹn oboresorọ-ọ, jẹ ẹmu ọvo vuẹ vwẹ nẹ mi vwẹ iruo kẹ wẹ.” O de rhi muvwẹro nẹ ọna yen ẹkpahọnphiyọ rẹ ẹrhovwo mẹ. Ọke vwọ yanran na, mẹ vẹ aye mẹ de bromaphiyame kerẹ ọvo vwẹ usun rẹ Iseri ri Jihova.

Me je hẹ akpọ nonẹna kidie me kerhọ rẹ iyono ri Baibol na. Mi vwo orua rẹ obọ mẹ rẹ oma vwerhan. Mi vwo ẹwẹn obrorhiẹn rọ nabọ fon kidie o muvwẹro nẹ Jihova vwo ghovwo uvwe nure.

Vwẹ ẹgbukpe 14 re wanre na yen me vwọ ga kerẹ ọkobaro ọkieje vwo yono ihwo oborẹ Baibol na tare. O krinọ-ọ na, aye mẹ da vwomaba vwẹ vwẹ ẹga rẹ ọkieje na. Oma vwerhen ovwẹ mamọ nẹ me vwẹ ukẹcha kẹ ihwo re me vẹ ayen gba wian ri te 22 vwọ ga Jihova vwẹ ikpe re vrẹ ẹgbukpe 30 re wanre na. Mi ji kpo asan ra da shẹ emu​​—⁠ẹkẹvuọvo ọ dia ọ rẹ me vwọ ghwa ihwo re kirobo rẹ mi ruẹ jovwo-o. Enẹna me vuẹ ayen kpahen esegbuyota mẹ ọkieje mi de kpo oboyin. O vwo oborẹ me guọnọ vwọ kẹ ayen: Iphiẹrophiyọ rẹ ayen vwọ dia akpọ kpokpọ rẹ ọghware kanre.​​—⁠Une Rẹ Ejiro 37:​10, 11.