Ọsẹ mẹ kua nẹ Australia kpo Germany vwẹ ukpe ri 1949. Iruo ra da tọn otọ guọnọ ikoru kugbe owian rẹ ikọmpini ri ruẹ ẹlẹtriki yen ọ guọnọ kpo oboyin, ọko ri Victoria kọyen ọ diare. Etiyin yen ọ da rọvwọn oni mẹ, e de vwiẹ vwẹ vwẹ ukpe ri 1953.

Ẹgbukpe evo vwọ wan nu, oni mẹ da ton uyono ri Baibol phiyọ vẹ Iseri ri Jihova, eriyina, iyono ri Baibol na da dia ẹbẹre ọvo rẹ ọkiemọ mẹ. Ẹkẹvuọvo, ọsẹ mẹ vwo omavwerhovwẹn kpahen ẹga vuọvo phiephie-e. Ko gbozighi, oni mẹ kọ djoshọ rọyen. Odjahọn kọyen oni mẹ de ruẹ uyono ri Baibol rọyen, iyono rọyen ji je. Ọsẹ mẹ de nẹ uwevwin, oni mẹ me vuẹ oniọvo mẹ ọmọtẹ vẹ ovwẹ kpahen obo ro yonori. Ọ vuẹ avwanre kpahen iparadaisi vwẹ otọrakpọ na rọ cha vwẹ obaro kugbe oborẹ avwanre se vwo vwo omavwerhovwẹn siẹrẹ avwanre da yan nene irhi ri Baibol na.​​—Une Rẹ Ejiro 37:​10, 29; Aizaya 48:17.

Me vwọ hẹ ẹgbukpe 18, mi de vrẹn nẹ uwevwin fikirẹ orharhe uruemu rẹ ọsẹ mẹ na. Dede nẹ mi vwo imuẹro rẹ oborẹ oni mẹ yono uvwe nẹ Baibol na rhe, jẹ mi niro fiemu-u. Ọtiọyena me rha vwẹ ayen ba akpọ yeri-in. Me da ton iruo rẹ ẹlẹtrishani phiyọ vwẹ asan ra da tọn otọ guọnọ ikoru. Mi vwo te ẹgbukpe 20, me da rọvwọn. Avwanre vwiẹ ọmọtẹ rẹ avwanre vwẹ ẹgbukpe erha re vwọ kpahọn, me da rhoma roro kpahen obo re ghene ghanre vwẹ akpeyeren mẹ. Me riẹnre nẹ Baibol na sa chọn orua mẹ uko, eriyina me vẹ Oseri ri Jihova ọvo da ton uyono ri Baibol phiyọ. Ẹkẹvuọvo aye mẹ vwọso Iseri na mamọ. Mi vwo kpo uyono rayen ẹdẹ ọvo, aye mẹ de sianro vuẹ vwẹ nẹ​​—wọ rha dobọ rẹ uyono ri Baibol na ji-i, gba ghwa kpairoro vrẹ orua nana. Unu gbi rhie vwe ota-a, mi de ru nene oborẹ aye mẹ nokpẹn rọyen na je kẹnoma kẹ Iseri na. Me viẹ idiekpọvwẹ kidie mi se ru nene oborẹ me riẹnre nẹ ọyen gbare-e.

Ẹdẹ ọvo, ihwo re me vẹ ayen gba wian kuẹgbe de dje uhoho rẹ ihwo re banphiyọ kẹ vwẹ. Ughe na je vwe, ẹkẹvuọvo ọ nẹrhẹ mi vwo ẹwẹn rẹ abe, ọ je nẹrhẹ mi vwẹ orharhe ẹro vwo ni oma mẹ. Me vwọ karophiyọ oborẹ mi yonori vwẹ Baibol na, o de ghini muvwẹro nẹ Ọghẹnẹ che gboja kẹ vwẹ. Kidie nẹ mi ni ihoho tiọyena buẹnphiyọ, ọ da nẹrhẹ ẹro mi vwo ni ayen wene. Ọke vwọ yanran, ughe na da riẹnriẹn ovwẹ oma.

Ẹgbukpe 20 re kpahenrọ na, uruemu mẹ kọ braphiyọ braphiyọ. Iruemu mẹ dje obo rehẹ evunrẹ ubiudu mẹ phia. Eta igbongbon keyen nẹ unu mẹ cha, obo ri titẹ ọfanrhiẹn re fovwon ohwo phiyọ ehwẹ keyen je vwe. Ẹro mi vwo nẹ ovwerhẹn rẹ aye gbe ọshare da rhẹriẹ. Dede nẹ me vẹ aye mẹ jehẹ uwevwin ọvo, jẹ mi ji gbe ọfanrhiẹn vwẹ otafe. Ẹdẹ ọvo mi de ni ughegbe je ta kẹ oma mẹ, ‘wo tuvwoma.’ Mi de vwo utuoma kpahen oma mẹ.

Orọnvwe mẹ fanre, akpeyeren mẹ da je yanghan ku. Eriyina, me da ta ẹwẹn mẹ eje kẹ Jihova. Me da rhoma ton uyono ri Baibol na phiyọ, dede nẹ o te ẹgbukpe uje re me dobọ rọyen ji re. Vwẹ ọke yena, jẹ ọsẹ mẹ ghwure, oni mẹ ji bromaphiyame kerẹ ọvo vwẹ usun rẹ Iseri ri Jihova re.

Idjerhe ri mi yeren akpọ mẹ nene fẹnẹ iwan rehẹ Baibol na. Ẹkẹvuọvo, mi sere gboja nẹ mi guọnọ vwo ufuoma rẹ ẹwẹn ri Baibol na ta ota kpahen. Mi de brorhiẹn me vwọ kẹnoma kẹ ogbegbeta ji sun ophu mẹ. Mi de ji brorhiẹn mi vwo siobọnu akpọ rẹ ọfanrhiẹn, dobọ rẹ idjogba ete, udiẹda obuebun, kugbe uruemu mi vwo cho mie ohwo ro phi vwe phiyọ iruo ji.

Ihwo re me vẹ ayen gba wian vwẹ obiruo che se vwo ẹruọ rẹ oboresorọ mi vwo ru ewene nana-a. Vwẹ ẹgbukpe erha yen ayen vwọ davwẹngba kpare ovwẹ ophu rere mi vwo rhivwin kpo oka rẹ akpeyeren ri mi yerẹn jovwo. Mi de dje uruemu ọvo phia rọ chọ vwẹ obọ, kerẹ mi de muophu yẹrẹ ta ota rọ brare, kẹ ayen che kuvwie: “Ẹhẹn! Ọna yen Joe rẹ avwanre vugheri jovwo.” Eta yena kuọrọn ovwẹ ẹwẹn mamọ! Ki mi no nẹ mi che se wene obọ-ọ.

A ghwẹ ihoho rẹ ihwo re banphiyọ vọn asan eje vwẹ asan ri mi de ruiruo. Ọkieje yen ihwo re me vẹ ayen gba wian vwọ vwẹ ihoho rẹ ihwo re banphiyọ vwo rhe ohwohwo womarẹ ikọmputa rayen, kirobo rẹ mi ruẹ jovwo. Me davwẹngba me vwọ kẹnoma kẹ ihoho tiọyena, ẹkẹvuọvo, ayen davwẹngba vwo ruo vwẹ idjerhe mi vwo shufi rọyen. Me da guọnọ ukẹcha vẹ ọbọngan mie oniọvo re me vẹ ọyen gbe yono Baibol na. Ọ nabọ kerhọ kẹ vwẹ vẹ odirin ọke me vwọ ta ẹwẹn mẹ eje vwọ kẹ. O de dje ẹkpo ri Baibol evo kẹ vwẹ, re sa chọn vwẹ uko vwo phi uruemu rọ riẹnriẹn ovwẹ oma na kparobọ ji jiro kẹ vwẹ nẹ mi muomaphiyọ ẹrhovwo ẹnẹ ọkieje vwo rhe Jihova.​​—Une Rẹ Ejiro 119:37.

Ẹdẹ ọvo vwo te, mi de se ihwo re me vẹ ayen gba wian rhe echidiotọ ọvo. Ayen vwọ rhe, me da vuẹ ayen nẹ ayen vwẹ udi ro mu ohwo vwọ kẹ eshare ivẹ re dia egbaidi jovwo. Ayen da tane, “Ẹjo! Eshare ivẹ nana davwẹngba rẹ ayen vwọ kẹnoma kẹ udi egangan!” Me da kpahen: “E, eriyin mi ji nene ọmẹ muabọ.” Nẹ ẹdẹ yena yanran, eshare na de vwo ẹruọ rẹ ẹgbaẹdavwọn re me vwọ dobọ rẹ ihoho tiọyena ji, ayen rhe kpokpo uvwe ọfa kpahọ-ọn.

O rhe kri-i, vẹ ukẹcha rẹ Jihova, mi de phi uruemu mi vwo ni ihoho rẹ ihwo re banphiyọ kparobọ. Vwẹ 1999, mi de bromaphiyame kerẹ ọvo vwẹ usun rẹ Iseri ri Jihova. Oma vwerhen ovwẹ nẹ mi vwo uphẹn mi vwo yeren omamọ akpọ rọ je vọn vẹ omavwerhovwẹn obọ ọfa.

Mi rhi vwo ẹruọ rẹ oboresorọ Jihova vwo vwo utuoma kpahen erọnvwọn ri je vwe ọke grongron rhire na. Kerẹ ọsẹ rẹ ẹguọnọ, ọ guọnọ sẹro mẹ vwo nẹ abọ rẹ imuoshọ rẹ ihoho rẹ ihwo re banphiyọ sua kẹ ohwo. Mavọ yen eta rehẹ Isẹ 3:​5, 6 na dia uyota te! Ẹkpo yena da ta: “Vwẹ udu wẹn ejobi vwọ kpahe Ọrovwohwo, wọ vwẹ ẹro suọ oma obọ wẹ-ẹn. Vwẹ idjerhe wẹn ejobi rhọvwọ; kọ cha kpọ idjerhe wẹn ejobi vi.” Ẹkpo ri Baibol nana sẹro mẹ je nẹrhẹ mi vwo omavwerhovwẹn.​​—Une Rẹ Ejiro 1:​1-3.

Vwẹ ọke ri jovwo, mi vwo orharhe ẹro vwọ ni oma mẹ, jẹ enẹna oma vwerhen ovwẹ, mi ji vwo ẹwẹn ri dọe. Mi yeren omamọ akpọ, me je mrẹ evwoghovwo vẹ obicha ri Jihova vwẹ akpeyeren mẹ. Vwẹ 2000, me da rọvwọn aye oyoyovwin mẹ Karolin, Onenikristi ro vwo ẹguọnọ ri Jihova ọtiobo ri mi ji vwo ẹguọnọ rọyen. Ufuoma hẹ uwevwin avwanre. Oma vwerhen avwanre nẹ avwanre hẹ usun rẹ iniọvo rẹ akpọeje ri dje ẹguọnọ phia ji yeren omamọ akpọ.