O vwo ọke ọvo wọ vwọ guọnọ se Baibol na, rẹ evo vwẹ usun rẹ iroro re djunute vwẹ obenu na da davwobọ ji? Oshọ re vwo se Baibol na muẹ ihwo buebun. Kẹ wọ da riẹn nẹ Baibol na sa vwẹ ukẹcha kẹ wẹ vwo vwo omavwerhovwẹn kugbe evunvọnvwẹ vwẹ akpeyeren vwo? Jẹ wọ da rha riẹn nẹ o vwo ena efa rẹ wo se vwo se Baibol na ọ me vwerhen ese vwo? Wo che vwo owenvwe wo vwo se Baibol na?

Roro kpahen oborẹ ihwo evo tare kpahen erere rẹ ayen mrẹre ọke rẹ ayen vwọ ton ese rẹ Baibol na phiyọ.

Ezekiel rọhẹ omarẹ ẹgbukpe 20 da ta: “Vwẹ obuko jovwo, me họhọ ohwo rọ djẹ imoto, jẹ o vwo asan rọ djẹ ra-a. Ẹkẹvuọvo ese rẹ Baibol na vwẹ ukẹcha kẹ vwẹ vwo yeren uvi rẹ akpeyeren. Uchebro buebun hẹ evun rọyen rẹ me sa reyọ vwo ruiruo kẹdẹ kẹdẹ.”

Frieda rọ jehẹ omarẹ ẹgbukpe 20 da ta: “Ọke rẹ jovwo me djoma. Ẹkẹvuọvo isese rẹ Baibol yono uvwe omaẹriẹnsuon. Ọna kọ nẹrhẹ ihwo se siẹkẹrẹ ovwẹ, mi vwo igbeyan buebun enẹna.”

Aye ọvo rọhẹ omarẹ ẹgbukpe 50 re se Eunice da ta kpahen Baibol na nẹ “Ọ vwẹ ukẹcha kẹ vwẹ vwo wene iruemu mẹ evo ri ghwe shephiyọ-ọ, je nẹrhẹ me dia omamọ rẹ ohwo.”

Kirobo rẹ ihwo yena kugbe iduduru rẹ ihwo efa mrẹvughe, ese rẹ Baibol na cha vwẹ ukẹcha kẹ wẹ vwo yeren akpọ rẹ omavwerhovwẹn. (Aizaya 48:17, 18) Baibol na sa vwẹ ukẹcha kẹ wẹ (1) vwo brorhiẹn ri shephiyọ, (2) vwo mu omamọ rẹ igbeyan, (3) vwo yerin ghene ebẹnbẹn, (4) vwọ riẹn uyota na kpahen Ọghẹnẹ. Obọ rẹ Ọghẹnẹ yen uchebro rọhẹ evunrẹ Baibol na nurhe, ọtiọyena wọ cha sa yan chọ siẹrẹ wọ da vwẹ ayen ruiruo-o. Ọghẹnẹ cha sa vwẹ orharhe rẹ uchebro kẹ avwanre-e.

Obo re ma ghanre kẹ ọna, ton ese rọyen phiyọ. Erhọ yen ena evo re sa vwẹ ukẹcha kẹ wẹ vwọ tonphiyọ phẹrephẹre, je riavwerhen rọyen?