Ọmọtẹ rọhẹ omarẹ ẹgbukpe 4 mrẹ ivwirhi ro brẹ nẹ unu rẹ asan rẹ ivwirhi wan nẹ ifatri ọvo cha, ivwirhi na họhọ evwru vwẹ obenu. Ko rorori nẹ evwru yen e ruẹ vwẹ ifatri na. Ororochọ rẹ omotete nana ro fiemu-u na se fovwon ohwo phiyọ ehwẹ. Ẹkẹvuọvo, ororochọ se djobọte akpeyeren rẹ avwanre. Kerẹ udje, e de se odjekẹ re si phiyọ ọgọ rẹ uhunvwun chọ, ọ sa so imuoshọ.

Ororochọ kpahen Ota rẹ Ọghẹnẹ sa so imuoshọ ọgangan. Kerẹ udje, ihwo evo vwẹ ẹruọ rẹ iyono rẹ Jesu-u. (Jọn 6:48-68) Ukperẹ ayen vwo yono kpobarophiyọ, ayen da sen kemu kemu rẹ Jesu yonori. Okpemu yen va ayen abọ!

Wo se Baibol na vwọ kẹ odjekẹ? Ọyen omamọ rẹ uruemu. Oshọ mu we nẹ wo se vwo ẹruọ rẹ asan evo chọ vwevunrẹ Baibol na? Ọ phia kẹ ihwo buebun. Roro kpahen ẹdia erha rẹ ihwo de me rorochọ.

• Iji rẹ Baibol na rọ tare nẹ “djẹ oshọ rẹ Ọghẹnẹ,” ihwo evo se vwo ẹruọ rọye-en. Kẹ ayen roro nẹ ọyena mudiaphiyọ a vwọ djoshọ rẹ Ọghẹnẹ fikirẹ oja rọ cha vwọ re ohwo. (Aghwoghwo 12:13) Ẹkẹvuọvo, Ọghẹnẹ guọnọ oka rẹ oshọẹdjẹ tiọyena miẹ ihwo re ga-a. Ọ da ta: “Wọ djẹ oshọ-ọ, kidie me vẹ owẹ herọ, wo jẹ ofu dje we-e, kidie Mẹvwẹ Ọghẹnẹ wẹn. Me kẹ wẹ ogangan, Me cha wẹ uko.” (Aizaya 41:10) Oshọẹdjẹ rẹ Ọghẹnẹ mudiaphiyọ e vwo nyupho rọyen, ji muọghọ kẹ.

• Ihwo evo vwo ẹruọ rẹ ẹkpo rẹ Baibol nana chọ: “Kidie vwọ kẹ kemu kemu o vwo . . . ọke, . . . ọke re vwo vwiẹ vẹ ọke re vwo ghwẹ.” Kẹ ayen roro nẹ Ọghẹnẹ brorhiẹn rẹ ọke ohwo ọvuọvo che vwo ghwu phiyotọ. (Aghwoghwo 3:1, 2) Ẹkẹvuọvo, ẹkpo yena ta ota kpahen akpeyeren rẹ ohworakpọ vwo nẹ ọke re vwo vwiẹ re te ughwu, ọ je tanẹ ohworakpọ vrabọ rẹ ughwu-u. Baibol na je tanẹ orhiẹn-ebro rẹ avwanre se djobọte akpeyeren rẹ avwanre. Kerẹ udje, avwanre de se: “Oshọẹdjẹ rẹ Ọrovwohwo na nẹrhẹ atọn.” (Isẹ 10:27; Une Rẹ Ejiro 90:10; Aizaya 55:3) Vwẹ idjerhe vọ? Kerẹ udje, e vwo muọghọ kẹ Ota rẹ Ọghẹnẹ sa nẹrhẹ avwanre kẹnoma kẹ udi ẹda vroma vẹ ọfanrhiẹn.—1 Kọrẹnt 6:9, 10.

• Baibol na vwọ tanẹ a vwẹ akpọ vẹ idjuvwu vwọ “kpahe enu kẹ erhanre” na, ihwo evo ki roro nẹ akpọ vẹ odjuvwu re rhiẹromrẹ na yen Ọghẹnẹ cha ghwọrọ. (2 Pita 3:7) Ẹkẹvuọvo Ọghẹnẹ veri nẹ ọyen cha rhọnvwe nẹ a ghwọrọ otọrakpọ na-a. Ọghẹnẹ yen “vwẹ uchivwo rẹ otọ na vi, rere o vwo je kpogho bẹdẹ.” (Une Rẹ Ejiro 104:5; Aizaya 45:18) Irueru rẹ akpọ nana ro miovwin ku na yen che no bẹdẹ, kerẹsiẹ ra da mrẹ nẹ a vwẹ erhanre guọghọ, ọ dia otọrakpọ na re rhiẹromrẹ na-a. A da vwẹ idjuvwu na vwọ ta ota idjerhe ghevweghe, o se mudiaphiyọ ophephe na, obenu na rẹ isio hepha na yẹrẹ asan rẹ Ọghẹnẹ dia. A cha ghwọrọ ọvuọvo usun rẹ enana-a.

Kirobo wọ sa mrẹ vwo nẹ idje yena rhe, ọke buebun ihwo vwo ẹruọ rọ chọre kpahen ẹkpo rẹ Baibol rẹ ayen seri. Jẹ diesorọ Ọghẹnẹ vwọ vwẹ uphẹn kẹ emu ọtiọyena? Ihwo evo se roro: ‘Ọghẹnẹ da riẹn emu eje, ji vwo aghwanre, manẹ ọ kẹ avwanre ọbe rọ nabọ si vwẹ idjerhe rẹ kohwo kohwo de se vwo ẹruọ rọyen. Diesorọ o rhe ruo ọtiọye-en?’ Gba fuẹrẹn iroro erha re nẹrhẹ ihwo vwo ẹruọ rẹ Baibol na chọ ọke buebun.

1.   E si Baibol na vwẹ idjerhe rẹ ihwo re vwomakpotọ, ri ji vwo owenvwe ri vwo yono se vwo vwo ẹruọ rọyen. Jesu da ta kẹ Ọsẹ rọyen: “Me kpẹvwẹ owẹn, Ọsẹ, Ọrovwohwo ro vwo odjuvwu vẹ akpọ, ru wo vwo si imu nana nu kẹ evwaghwanre kugbe otu ri vwo ẹruọ wọ da vwẹ ayen phia kẹ emọboba.” (Luk 10:21) E si Baibol na vwẹ idjerhe rẹ ihwo ri vwo omamọ rẹ ẹwẹn kpahọn ọvo yen se vwo ẹruọ rọyen. Ihwo ri vwo uruemu rẹ omaẹkparọ, rọ dia ẹkuruemu rẹ “evwaghwanre,” yen me vwo ẹruọ rẹ Biabol na chọ. Ẹkẹvuọvo, ihwo ri vwo uruemu rẹ “emọboba” rọ dia omaevwokpotọ kugbe owenvwe re vwo yono, yen vwo ẹruọ rẹ Ota rẹ Ọghẹnẹ. Ọghẹnẹ nabọ riẹn Baibol na si dẹn!

2. E si Baibol na vwọ kẹ ihwo re guọnọ ukẹcha rẹ Ọghẹnẹ ri vwo vwo ẹruọ rọyen. Jesu djerephia nẹ ihwo cha guọnọ ukẹcha tavwen ayen ki se vwo ẹruọ rẹ obo ro yono gbagba. Mavọ yen ayen sa vwọ mrẹ? Jesu da ta: “Obruche na, [“ẹwẹn,” NW ] ọfuanfon na, rẹ Ọsẹ na che ji rhe vwẹ odẹ mẹ na, ko che yono ovwan emu ejobi.” (Jọn 14:26) Ọtiọyena Ọghẹnẹ vwẹ ẹwẹn ọfuanfọn rọyen rọ dia ẹgba ro vwo ruiruo, vwọ chọn ihwo uko vwo vwo ẹruọ oborẹ ayen seri vwẹ Baibol na. Ẹkẹvuọvo, Ọghẹnẹ siobọ nẹ ẹwẹn ọfuanfon rọyen kẹ ihwo re vwẹroso ukẹcha rọye-en, ọtiọyena ayen rhe se vwo ẹruọ rẹ Baibol na-a. Ẹwẹn ọfuanfon na ji muẹ Inenikristi ri vwo erianriẹn vwo brẹ ihwo re guọnọ ukẹcha ra rere ayen se vwo vwo ẹruọ rẹ Baibol na.—Iruo Rẹ Iyinkọn Na 8:26-35.

3. O vwo asan rẹ ọke che te tavwen ihwo ki se vwo ẹruọ rẹ ẹkpo rẹ Baibol evo. Kerẹ udje, a vuẹ ọmraro Daniẹl nẹ o si ovuẹ ọvo phiyotọ kpahen obaro na. Amakashe ọvo da vuẹ: “Daniẹl, rhurhu eta na, ko ọbe na gbe, bẹsiẹ rẹ ọke rẹ oba na vwo te.” Vwẹ ikpe buebun re wanre, buebun rẹ ihwo se ọbe rẹ Daniẹl na, jẹ ayen se vwo ẹruọ rọye-en. Vwọrẹ uyota, Daniẹl tobọ vwo ẹruọ rẹ eta na evo ro siri na-a. Ọ da ta: “Mi nyori, ẹkẹvuọvo yọ ro vwẹ-ẹ.” Ukuotọ rọyen, ihwo cha nabọ vwo ẹruọ rẹ aroẹmrẹ rẹ Ọghẹnẹ vwọ phia womarẹ Daniẹl na, ẹkẹvuọvo vwẹ ọke rẹ Ọghẹnẹ muegbe rọyen de te. Amakashe na da ta: “Yanran kpo asan wọ ra, Daniẹl kidie erhurhu eta na e de rhe ko ayen gbe bẹsiẹ rẹ ọke rọ oba na vwo te.” Ihwo vọ yen che vwo ẹruọ rẹ eta rẹ Ọghẹnẹ? “Ohwo umwemwu ọvuọvo che vwo ọhọ rọye-e ẹkẹvuọvo otu re ghwanre ki vwo ọhọ rọye.” (Daniẹl 12:4, 8-10) Ọtiọyena, Ọghẹnẹ hẹrhẹ ọke ro fori tavwen ọ ke vwẹ ẹruọ rẹ ẹkpo rẹ Baibol evo vwọ phia.

O vwo ọke ọvo rẹ Iseri rẹ Jihova vwo vwo ẹruọ rẹ Baibol na chọ re? E. Jẹ ọke vwo te rẹ Ọghẹnẹ vwo ru eta na phẹn, ayen de ji wene ẹruọ rẹ ayen vwori jovwo. Ayen vwo imuẹro nẹ ayen vwẹrokere iyinkọn rẹ Kristi ri wene oborẹ ayen riẹnre kọke kọke rẹ Jesu da kpọ ayen vi.—Iruo Rẹ Iyinkọn Na 1:6, 7. 

Iroro rẹ ọmọtẹ yena kpahen asan rẹ evwru nẹ cha sa dia ororochọ ro fiemu-u. Ẹkẹvuọvo, obo rẹ Baibol na yonori ghanre kẹ wẹ mamọ. Ohwo che se vwo ẹruọ rẹ Baibol na womarẹ ẹgbaẹdavwọn romobọ-ọ. Ọtiọyena, guọnọ ukẹcha wo vwo vwo ẹruọ rẹ obo wo se. Guọno ihwo ri se Baibol na vẹ ẹwẹn rẹ omaevwokpotọ, re vwẹroso ẹwẹn ọfuanfon rẹ Ọghẹnẹ rere ayen vwo vwo ẹruọ rẹ Baibol na, ri vwo imuẹro nẹ avwanre yerẹn vwẹ ọke rẹ Ọghẹnẹ vwọ guọnọ nẹ a riẹn Baibol na. Ta ota kẹ Iseri rẹ Jihova yẹrẹ kpo wẹbsaiti rayen jw.org re se ehiahiẹ rẹ ayen ruru. Baibol na veri: “Wo de bunu kẹ erianriẹn . . . , ku wọ mrẹ erianriẹn rẹ Ọghẹnẹ.”—Isẹ 2:3-5.