E vwiẹ vwẹ vwẹ Paddington orho rọ vọnre vẹ ihwo vwẹ London, England. Mẹvwẹ vẹ oni kugbe iniọvo mẹ emetẹ erha ri vien vwe yen gba dia. Ọsẹ mẹ kua cha kua kpo kidie ọgbaudi yen o ruẹ.

Ọke me vwọ hẹ omotete, oni mẹ yono uvwe obo ra nẹrhovwo kason kason. Mi vwo Baibol otete ọvo, Une Rẹ Ejiro ọvo yehẹ evun rọyen, mi de ru uhworo rọyen rere me sa vwọ so ine na. Ota ọvo ri mi se mrẹ vwẹ ọbe ọvo cha sa chọrọ ovwẹ ẹro-o: “Ọke cha, odẹ ọ cha na rha cha dia-a.” Eta nana djẹ vwẹ ovwerhen, ki mi roro kpahen obaro na. ‘Vwọrẹ imuẹro, o vwo erọnvwọn efa me sa vwẹ akpeyeren mẹ vwo ru.’ ‘Diesorọ mi vwo yeren akpọ?’ Me guọnọ ghwu-u!

Ki mi rhi vwo omavwerhovwẹn kpahen uruemu rẹ orhan. Me davwẹngba mi vwo nene ihwo ri ghwuru ta ota, mẹ vẹ igbeyan mẹ vwẹ isikuru kpo asan re shi ihwo phiyọ, ji ni ifimu rẹ orhan. Dede nẹ oshọ mu avwanre, oma je vwerhen avwanre kpahọn.

Ẹgbukpe ihwe yen me pha me vwọ ton akpeyeren rẹ fanrhiẹn fanrhiẹn phiyọ. Ke me rhe ton isigati ephopho phiyọ, ọ da rhe dia ẹkuruemu mẹ. Ukuko na, mi de rhi vwobọ vwẹ igbo ephopho. Mi rhi vwo te ẹgbukpe 11, ke me da udi ọgangan. Dede nẹ udi na vwerhen ovwẹ-ẹ, emuo ro mu vwe na je vwe. Eha-egbe vẹ une ẹsuọ vwerhen ovwẹ oma. Mi kpo ipati kugbe iklọbu kọke kọke. Me bẹbẹ nẹ uwevwin vwẹ ason, me me bẹbẹ ruọ bẹsiẹ urhiọke vwo te. Ẹdẹ rivẹ mi de kpo isikuru, me rhọnvwan ro iklasi-i, me da ro iklasi dede, udi kọyen me da ọke rẹ oyono rha hẹ iklasi-i.

Vwẹ ukpe rẹ mi vwo wontọ nẹ isukuru, mi rhe se ru yovwi-in. Oni mẹ riẹn oka rẹ akpọ ri mi yerẹ-ẹn, ọ rhe vwọ riẹn, ophu de muo. Ọnana da nẹrhẹ avwanre kunu, me da djẹ nẹ uwevwin. Mi de re nene ọnse mẹ re se Tony dia ọmọke. Tony cho uji, ọ shẹ ihunvwun egangan, ji gbe ozighi mamọ. O rhe kri-i, ke me rhe mrevun, ẹgbukpe 16 yen me hepha mi vwo vwiẹ ọmọshare rẹ avwanre.

Ọke me vwọ hẹ asan ra da vwẹrote ini-emọ re je rọvwọ-ọn, ọyen me vwo tu mrẹ Iseri rẹ Jihova. Isun rẹ ekogho yena  yen kẹ vwẹ ubruwevwin ọvo nẹ me dia. Eya ivẹ re dia Iseri rẹ Jihova brẹ eya evo vwẹ etiyin ra kọke kọke re yono ayen. Ẹdẹ ọvo, me da vwomaba ayen. Me guọnọ dje kẹ ayen nẹ oborẹ ayen yono na chọre. Dedena, ayen nabọ reyọ Baibol na vwọ kpahenphiyọ enọ mẹ eje. Ayen pha dẹndẹn, ọyena vwerhen ovwẹ oma. Ọtiọyena, me da vwomakpahotọ vwọ kẹ uyono rẹ Baibol.

O kriri-i, mi de rhi yono orọnvwọn ọvo vwẹ Baibol na ro wene akpọ mẹ. Vwo nẹ ọke emọ rhe ọyen me vwọ djoshọ rẹ ughwu. Asaọkiephana, ke me rhe riẹn uyono rẹ Jesu ro shekpahen evrẹnushi na! (Jọn 5:28, 29) Vwọba, me da je mrẹvughe nẹ Ọghẹnẹ vwo ọdavwẹ mẹ. (1 Pita 5:7) Eta rehẹ Jerimaya 29:11 djobọte vwe mamọ, ọ tare nẹ “Kidie me riẹn iroro ri mi vwo kẹ ovwan, eriyin Ọrovwohwo tare, iroro re erhuvwu ọ dia ọ rẹ umiovwo-o me cha vwọ kẹ ovwan vwẹ ọke rọ cha vẹ iphiẹrohọ.” Ọnana da nẹrhẹ mi rhi vwo iphiẹrophiyọ nẹ me sa dia bẹdẹ vwẹ Iparadaisi vwẹ otọrakpọ na.—Une Rẹ Ejiro 37:29.

Iseri rẹ Jihova dje uvi rẹ ẹguọnọ kẹ vwẹ. Mi vwo tu kpo uyono rayen, me da mrẹ nẹ ihwo na pha dẹndẹn, ayen dede uvwe sasasa! (Jọn 13:34, 35) Me je rhe mrẹ oka rẹ edede yena vwẹ ishọshi re me ra jovwo-o. Iseri na dede uvwe dede nẹ ayen riẹn ẹdia ri mi hepha. Ayen nene uvwe ghwọrọ ọke kugbe, ayen vwẹrote vwe, ayen vwo ọdavwẹ mẹ, ayen vwẹ ukẹcha ro fori kẹ vwẹ. Ki mi rhi mrẹ oma mẹ nẹ mẹvwẹ ẹbẹre ọvo rẹ orua rode rọ vọnre vẹ ẹguọnọ.

Fikirẹ oborẹ mi yono nẹ Baibol na, ke me rhe mrẹvughe nẹ ofori mi vwo ru ewene vwẹ akpeyeren mẹ rere mi se vwo yerin nene oborẹ Ọghẹnẹ tare vwẹ Baibol na. Ọ lọhọ kẹ vwẹ me vwọ dobọ rẹ isigati ephopho ji-i. Me je rhe mrẹvughe nẹ oka rẹ ine evo nẹrhẹ urhurusivwe mi vwo phopho igbo ganphiyọ, ọtiọyena mi de wene ine re me kerhọ kẹ. Kidie me guọnọ muomaphiyọ obo ri mi ruẹ na, me da dobọ rẹ ipati kugbe iklọbu re me ra ji rere me sa vwọ kẹnoma kẹ ẹdia re sa nẹrhẹ me da udi vrẹ oma. Vwọ vrẹ ọyena, me da vwẹ ugbeyan vwo mu ihwo ri vwo omamọ rẹ uruemu re sa vwẹ ukẹcha kẹ vwẹ.—Isẹ 13:20.

Uvwre rẹ ọke yena, Tony je ton uyono rẹ Baibol phiyọ vẹ Iseri rẹ Jihova. Iseri na vwọ kpahenphiyọ enọ rọyen vwo nẹ Baibol na rhe, ko rhi muẹro nẹ obo ro yono na yen uyota. Ko rhi ru ewene evo vwẹ akpeyeren rọyen: ọ dobọ rẹ erharhe rẹ igbeyan ro nene yan ji, ọtiọyen ji te uji-echo vẹ igbo ephopho. Rere avwanre se vwo ru obo re vwerhen Jihova oma, avwanre da dobọ rẹ akpọ rẹ ọfanrhiẹn rẹ avwanre yerẹn ji, je guọnọ omamọ rẹ asan rẹ avwanre vẹ ọmọshare rẹ avwanre sa dia. Avwanre da rọvwọn vwẹ ukpe rẹ 1982.

Me karophiyọ nẹ me guọnọ iyovwinrota vwevunrẹ Uwevwin Orhẹrẹ kugbe Awake! * ri gbikun rẹ ihwo ri ru oka rẹ ewene re me guọnọ ruẹ na, ri ji phikparobọ. Udje rayen na phiuduphiyọ ovwẹ awọ! Ọ nẹrhẹ me davwẹngba mẹ vwọrẹ jẹ obọ-ẹdajẹ. Ọkeneje me vwọ nẹrhovwo rhe Jihova nẹ o chuko ku uvwe-e. Mẹ vẹ Tony de bromaphiyame kerẹ Iseri rẹ Jihova vwẹ July 1982.

Omamọ rẹ oyerinkugbe rẹ mi rhi vwo vẹ Jihova Ọghẹnẹ yen sivwin arhọ mẹ. Mẹvwẹ vẹ Tony mrẹ ukẹcha rẹ Jihova ọke rẹ erọnvwọn vwọ gan kẹ avwanre. Avwanre yono obo ra vwẹrosua Ọghẹnẹ uvwre rẹ ọke yena, avwanre mrẹvughe nẹ okeneje yen ọ vwọ vwẹ ukẹcha kẹ avwanre, je kẹ avwanre oborẹ avwanre guọnọre.—Une Rẹ Ejiro 55:22.

Oma vwerhen ovwẹ nẹ mi sa vwẹ ukẹcha kẹ ọmọshare vẹ ọmọtẹ rẹ avwanre vwọ riẹn Jihova kirobo rẹ mi ruru. Oma je vwerhen ovwẹ me vwọ mrẹ emọ rayen ri ruẹ yovwẹn vwẹ ẹga rẹ Ọghẹnẹ.

Mi rhe vrẹ vwẹ ason fikirẹ udubruvwe rẹ oborẹ akpeyeren mẹ cha dia vwẹ obaro na, yẹrẹ djoshọ rẹ ughwu ọfa-a. Mẹvwẹ vẹ Tony muomaphiyọ ekion rẹ ikoko rẹ Iseri rẹ Jihova kudughwrẹn kudughwrẹn rere avwanre vwọ bọn ayen gan. Avwanre vwomaba ayen vwo yono ihwo efa nẹ siẹrẹ ayen de vwo esegbuyota kpahen Jesu, kẹ ayen vwo arhọ rẹ bẹdẹ.