UYOVWINROTA RẸ ỌBE NA | OBO RA SA VWỌ MRẸ ERERE VWO NẸ ISESE RẸ BAIBOL NA
Mavọ Yen Baibol na sa Vwọ Nẹrhẹ Akpeyeren Mẹ Yovwinphiyọ?
Baibol na dia ẹbe ghevweghe-e. Uchebro ro nẹ obọ rẹ Ọmemama rẹ avwanre rhe yehẹ evun rọyen. (2 Timoti 3:16) Ovuẹ rọhẹ evun rọyen se djobọte avwanre mamọ. Baibol na da ta: “Ota rẹ Ọghẹnẹ na ọkpokpọ gbrọgbrọ sasasa.” (Hibru 4:12) O vwo ẹgba ro vwo ru akpọ rẹ avwanre yovwinphiyọ vwẹ idjerhe ivẹ. Ọ kẹ avwanre odjekẹ rẹ obo re yeren akpọ wan asaọkiephana, ọ je nẹrhẹ avwanre riẹn Ọghẹnẹ kugbe ive rọyen.
O ru akpeyeren yovwẹnphiyọ asaọkiephana. Baibol na sa vwẹ ukẹcha phia siẹrẹ e de vwo ebẹnbẹn romobọ. Ọ kẹ avwanre uchebro vwẹ ẹdia nana.
- Oyerinkugbe rẹ avwanre vẹ ọ rẹ ihwo efa.
-
Iroro ro fiotọ kugbe omakpokpọ.
—Une Rẹ Ejiro 37:8; Isẹ 17:22. -
Omamọ rẹ uruemu.
—1 Kọrẹnt 6:9, 10. -
Ọdavwẹ rẹ ugboma rẹ avwanre.
—Isẹ 10:4; 28:19; Ẹfesọs 4:28. *
Aye gbe ọshare ọvo vwẹ Asia dje ẹwẹn rẹ akpẹvwẹ phia kpahen uchebro rẹ Baibol na. Kirobo rọ hepha vwọ kẹ ihwo buebun re ghwa rọvwọn obọ, ayen vwo ebẹnbẹn rẹ ayen sa vwọ ro ohwohwo kugbe ebẹnbẹn rẹ otaẹtakuẹgbe. Ẹkẹvuọvo, ayen da vwẹ uchebro rẹ Baibol na vwọba akpọ yerin. Die kọyen nẹ obuko rọyen rhe? Vicent, rọ dia ọshare na da ta: “Obo ri mi se nẹ Baibol na rhe chọn vwẹ uko vwo yerin ghene ebẹnbẹn re vwomaphia vwẹ orọnvwe rẹ avwanre vwẹ idjerhe rẹ ẹguọnọ. Re vwo ru oborẹ Baibol na tare kẹ avwanre omavwerhovwẹn.” Annalou, rọ dia aye rọyen rhọnvwephiyọ oborẹ ọshare na tare: “Re vwo se kpahen idje rehẹ Baibol na chọn avwanre uko. Oma fun vwe vwẹ orọnvwe mẹ enẹna, oma je vwerhen ovwẹ fikirẹ oborẹ avwanre tẹnrovi vwẹ akpeyeren.”
Ra vwọ riẹn Ọghẹnẹ. Vwọ vrẹ obo rọ ta kpahen orọnvwe, Vicent je tanẹ, “Womarẹ isese rẹ Baibol na, mi rhi sikẹre Jihova vrẹ obo ro jovwo.” Oborẹ Vicent mrẹvughe na kanrunumu ẹkpo ọvo ghanghanre, ọyehẹ Baibol na sa chọn wẹ uko vwo sikẹre Ọghẹnẹ. Wo de ru ọtiọyen, wọ cha mrẹ erere vwo nẹ uchebro rọyen rhe, ji sikẹrẹ kerẹ ugbeyan. Wọ je cha mrẹ nẹ ọ vwẹ evuẹ ri shekpahen omamọ rẹ akpọ vwẹ ọke rọ cha obaro na vwọphia, ọke wọ da cha riavwerhen rẹ “uvi rẹ arhọ na” bẹdẹ. (1 Timoti 6:19) Ọyen orọnvwọn rẹ ọbe ọfa cha sa vwọphia-a.
Wọ da ton isese rẹ Baibol na phiyọ, ji muomaphiyọ, wọ sa mrẹ erere yena, kọyen akpọ wẹn che yovwinphiyọ enẹna, wọ je cha riẹn Ọghẹnẹ. Ẹkẹvuọvo wo vwo se Baibol na, wo se roro kpahen enọ buebun. Wo de vwo enọ, karophiyọ omamọ rẹ udje rẹ ohwo rode rẹ Ẹtiopia na ro yerin ikpe 2,000 re wanvrẹ re na. O vwo enọ buebun ri shekpahen Baibol na rọ guọnọ nọ. Ra vwọ nọ sẹ ọ riẹn obo ro se na, ọ da ta: “Komavọ me sa vwọ riẹn, jokpa nẹ ohwo ọvo djere kẹ vwẹ?” * O de rhiabọreyọ ukẹcha rẹ Filip rọ dia ohwo ro muwan ro vwo yono Baibol na, rọ je dia ọvo usun rẹ idibo rẹ Jesu rẹsosuọ. (Iruo Rẹ Iyinkọn Na 8:30, 31, 34) Wọ da guọnọ riẹn kpahen Baibol na kpobarophiyọ, avwanre jiriro kẹ wẹ nẹ wọ vwẹ ovuẹ vwo te avwanre obọ vwẹ www.pr418.com yẹrẹ si kpo adrẹsi rọ kerẹ owẹ vwẹ imagazini nana. Wọ je sa vuẹ Iseri rẹ Jihova re kerẹ owẹ yẹrẹ kpo Ọguan Ruvie rọhẹ ekogho wẹn. Davwen wọ ton ese rẹ Baibol na phiyọ nonẹna rere o sun akpeyeren wẹn.
Wo de vwo ẹwẹn ivivẹ sẹ wọ sa ghene vwẹroso Baibol na, biko ni ividio na, Mavọ O Se Vwo Mu Avwanre Ẹro Nẹ Baibol Na Ọbe rẹ Uyota? Wọ sa mrẹ vwẹ jw.org/urh, kliki rẹ ibọtini rẹ search na, rere wọ nyẹ uyovwinrota na phiyọ.
^ e?ko. 8 Wọ da guọnọ uchebro efa ri nẹ Baibol rhe, kpo wẹbsaiti rẹ avwanre jw.org/urh. Ni ẹbẹre rẹ IYONO RẸ BAIBOL > ẸKPAHỌNPHIYỌ RẸ ENỌ RẸ BAIBOL NA.
^ e?ko. 11 Ji ni uyovwinrota rọhẹ imagazini nana “Imuoshọ rọ Herọ Siẹrẹ E de Vwo Ẹruọ rẹ Baibol na Chọ.”