UYOVWINROTA RẸ ỌBE NA | OBO RA SA VWỌ MRẸ ERERE VWO NẸ ISESE RẸ BAIBOL NA
Mavọ Me sa Vwọ Tonphiyọ?
Owọẹjẹ vọ yen sa vwẹ ukẹcha kẹ wẹ vwọ mrẹ erere vọnvọn vwo nẹ isese rẹ Baibol wẹn rhe? Vwo oniso rẹ owọẹjẹ iyorin re wian kẹ ihwo buebun re.
Guọnọ asan ro fuoma. Davwẹngba wọ guọnọ asan rọ fọre. Si erọnvwọn ri se mu ẹwẹn wẹn reyọ nẹ etiyin rere wo se vwo mu ẹwẹn phiyọ isese na. Omamọ rẹ orẹmrẹ kugbe odju je sa vwẹ ukẹcha kẹ wẹ.
Se vẹ ẹwẹn ophephẹn. Ọ vwọ dianẹ Ọsẹ rẹ avwanre rọhẹ odjuvwu yen vwo Baibol na, wọ cha mrẹ erere norhe vọnvọn siẹrẹ wo de vwo uruemu rẹ omotete rọ guọnọ yono mie ọsẹ yẹrẹ oni rọyen. Wo de vwo iroro ọchọchọ kpahen Baibol na jovwo, davwẹngba wo wene iroro tiọyena rere Ọghẹnẹ se vwo yono uvwe.
Nẹrhovwo wọ ke tonphiyọ. Eta rẹ Ọghẹnẹ yehẹ Baibol na, ọtiọyena o rhe gbe avwanre unu nẹ a guọnọ ukẹcha rọyen e ki se vwo ẹruọ rẹ Baibol na-a. Ọghẹnẹ veri nẹ ọyen cha “vwẹ [“ẹwẹn,” NW ] ọfuanfon kẹ otu re nọrọ.” (Luk 11:13) Ẹwẹn ọfuanfon na sa vwẹ ukẹcha kẹ wẹ vwo vwo ẹruọ rẹ iroro rẹ Ọghẹnẹ. Ọke vwọ yanran na, ẹwẹn ọfuanfon na che rhie ẹwẹn wẹn vwo vwo ẹruọ rẹ “emu okokodo rẹ Ọghẹnẹ.”
Vwo ẹruọ rẹ obo wo se. Wo brokpakpa se-e. Nabọ roro kpahen obo wo se. Nọ oma wẹn enọ kerẹ: ‘Iruemu vọ yen mi yono mie ohwo rẹ mi se kpahan na? Mavọ me sa vwọ reyọ vwo ruiruo vwẹ akpeyeren?’
Bru ẹkẹn kẹ oma. Wọ vwọ mrẹ erere vwẹ isese rẹ Baibol wẹn, muegbe wo vwo yono erọnvwọn ri che ru akpọ wẹn yovwinphiyọ. Wo se bru ẹkẹn kẹ oma kerẹ: ‘Me guọnọ yono kpahen Ọghẹnẹ kpobarophiyọ.’ ‘Me guọnọ dia omamọ rẹ ohwo, omamọ rẹ ọshare yẹrẹ aye.’ Gba guọnọ ẹkpo rẹ Baibol rọ sa vwẹ ukẹcha kẹ wẹ vwọ yan mu ẹkẹn wo bru kẹ oma na. *
Owọẹjẹ iyorin nana cha vwẹ ukẹcha kẹ wẹ vwọ tonphiyọ. Ẹkẹvuọvo, mavọ wo se vwo ru isese wẹn vwerhen phiyọ? Uyovwinrota rọ vwọ kpahen ọnana vwẹ odjekẹ evo phia.
^ e?ko. 8 Wọ rha riẹn ẹkpo rẹ Baibol ro shekpahen ẹdia wẹn na-a, oma cha vwerhen Iseri rẹ Jihova rẹ ayen vwọ chọn wẹ uko.
