Ọ cha bẹn ese? Gbanẹ ọ cha vwerhen ese? Mavọ yen isese rẹ Baibol na cha dia kẹ wẹ? Ona wo vwo se yen che djephia. Jẹ a fuẹrẹn obo wo se ru wọ vwọ riavwerhen rẹ isese rẹ Baibol wẹn kpobarophiyọ.

Guọnọ ọ ra vwẹroso, rẹ efanfan rọyen je lọhọ. Wo de se ọbe rẹ ibieta re vwo sio kpo awanre re, rọ je bẹn ese, wọ cha sa riavwerhen rọye-en. Ọtiọyena, gba guọnọ Baibol rẹ efanfan rọyen lọhọre, ro se te ubiudu wẹn. O ji fo nẹ Baibol na dia ọ ra nabọ fan gbagba. *

Reyọ ekuakua rẹ ona re ruru vwo ruiruo. Ọ dia Baibol ra teyenphia ọvo yen herọ enẹna-a, a je sa mrẹ vwevunrẹ erọnvwọn efa. E se se Baibol evo vwẹ intanẹti yẹrẹ danlodu rayen phiyọ ikọmputa, itablẹti, yẹrẹ ifonu. Baibol evo vwo asan wọ sa vwọ guọnọ ẹkpo efa ri shekpahen uyovwinrota vuọvo, yẹrẹ tobọ reyọ ẹkpo na vwọ vwanvwen oborẹ Baibol efa tare. Wọ rha guọnọ se komobọ-ọ, e ji ru Baibol na phiyọ uhworo rẹ wọ sa kerhọ rọyen. Ihwo buebun kerhọ rẹ Baibol na ọke rẹ ayen da evunrẹ imoto kpo iruo, ayen da fọnrhọn emwa, yẹrẹ ru erọnvwọn efa re kẹ ayen uphẹn ayen sa vwọ kerhọ kẹ uhworo na. Diesorọ wọ rha davwen evo usun rẹ enana-a?

Reyọ ekuakua re vwo yono Baibol na vwo  ruiruo. E sa vwẹ ukẹcha kẹ wẹ vwọ riavwerhen rẹ isese rẹ Baibol wẹn vọnvọn. Imapu rẹ asan sansan rẹ Baibol ta ota kpahen herọ re cha chọn wẹ uko vwọ riẹn kpahen asan wo se na, je nẹrhẹ wo vwo ẹruọ rọyen. Iyovwinreta kerẹ e rehẹ evunrẹ imagazini nana yẹrẹ e rehẹ ẹbẹre rẹ “Iyono rẹ Baibol” vwẹ jw.org wẹbsaiti sa vwẹ ukẹcha kẹ wẹ vwọ guọnọ otọ oborẹ ẹbẹre sansan rẹ Baibol na ta.

Wene ona wo vwo ruiruo. Ọ da dianẹ e vwo se nẹ Jẹnẹsis re te Ẹvwọphia bẹn kẹ wẹ, gba davwen re wọ tonphiyọ vwẹ ẹbẹre rọ ma vwerhen owẹ vwẹ Baibol na. Wọ da guọnọ riẹn kpahen ihwo ri titiri vwẹ Baibol na, wọ sa ton isese na phiyọ vẹ ikuegbe ri shekpahen ihwo. E si ona rẹ obo re se ruo wan phiyọ ekpeti na “ Hiẹ Baibol na Kodo re Wọ Riẹn Ihwo Rehẹ Evun Rọyen.” Yẹrẹ wo se se uyovwinrota ọvuọvo vwẹ Baibol na, yẹrẹ se nene oborẹ ikuegbe na phia wan. Wọ sa davwen ọvo usun rẹ ivẹ na?