Iguiyesi ẹne na sa nẹrhẹ oshọ mu ohwo, ẹkẹvuọvo ofori nẹ ọ dia ọtiọye-en. Diesorọ? Kidie Baibol na vẹ obo re phia vwẹ ikuegbe rẹ ihworakpọ asaọkiephana vwẹ ukẹcha kẹ avwanre vwọ riẹn oborẹ ọguiyesi ọvuọvo mudiaphiyọ. Dede nẹ ẹgua rayen ọyen oka rẹ okpetu vwọ kẹ akpọ na, ọ je sa dia iyẹnrẹn esiri vwọ kẹ wẹ vẹ orua wẹn. Vwẹ idjerhe vọ? Ẹsosuọ, e jẹ a riẹn oborẹ ọguiyesi ọvuọvo mudiaphiyọ.

Ọna yen ọtonphiyọ rẹ emramrẹ na: “Me da mrẹ, nighe, esi ọfuanfon, kugbe ohwo rọ gua de vwo umurhabọ: a da vwẹ erhu kẹ, ọ da yanran re phi, o de phi kparobọ.”—Ẹvwọphia 6:2.

Ono yen gua iyesi ọfuanfon na? A sa riẹn ohwo na siẹrẹ e de se ọbe rẹ Ẹvwọphia, rọ rhoma se ohwo na “Ota rẹ Ọghẹnẹ.” (Ẹvwọphia 19:11-13) Jesu Kristi yen a vwẹ odova na Ota rẹ Ọghẹnẹ vwo se, kidie ọyehẹ ọtota rẹ Ọghẹnẹ. (Jọn 1:1, 14) Vwọba, e se Jesu “Ovie rẹ ivie kugbe Ọrovwohwo ro vwo ihwo,” e de ji djisẹ rọyen kerẹ “Ọresiri kugbe Uyota.” (Ẹvwọphia 19:16) Vwọrẹ uyota, ọyen ovie ro vwo ẹgba ro vwo ru obo ri jere, ẹkẹvuọvo, ọ vwẹ ẹgba rọyen vwo ruiruo vwẹ idjerhe rọ chọre-e. Dedena enọ evo je vwomaphia.

Ono yen kẹ Jesu ẹgba ro vwo phikparobọ? (Ẹvwọphia 6:2) Ọmraro Daniẹl mrẹ emramrẹ ọvo rẹ “Ohwo rọ herọ nẹ Awanre rhe” na rọ dia Jihova Ọghẹnẹ * vwọ “vwẹ isuesun kugbe urinrin vẹ uvie” kẹ Mesaya na re vwo dje “ọmọ rẹ ohwo.” (Daniẹl 7:13, 14) Kọyen Ọghẹnẹ Romevwẹgba yen vwẹ ẹgba vẹ uturhi vwọ kẹ Jesu nẹ o sun, ji guẹdjọ. Iyesi ọfuanfon na ọyen omamọ udje rẹ ofovwin ọvwata rẹ Ọmọ rẹ Ọghẹnẹ che phi, kidie ọke buebun, Baibol na vwẹ ọfuanfon vwo djisẹ rẹ ọvwata.—Ẹvwọphia 3:4; 7:9, 13, 14.

Ọke vọ yen iguiyesi na vwọ tọn ẹgua phiyọ? Noso tanẹ ọguiyesi rẹsosuọ na rọ dia Jesu ton ẹgua phiyọ ọke ra vwọ vwẹ erhu rẹ ovie tughe. (Ẹvwọphia 6:2) Ọke vọ yen a vwọ vwẹ Jesu mu Ovie vwẹ odjuvwu? Ọghwa dia ugege ro vwo rhivwin kpo odjuvwu-u. Baibol tare nẹ ọ hẹrhẹre. (Hibru 10:12, 13) Jesu dje obo re cha vwẹ ukẹcha kẹ iyinkọn rọyen vwọ riẹn ọke rẹ ẹhẹrhẹ na che vwo vwoba vẹ ọke rọ cha vwọ ton usuon phiyọ vwẹ odjuvwu. Ọ tare nẹ ọ da ton usuon phiyọ re, akpọ na che miovwinphiyọ. Ofovwin, ọkanrovwẹ rẹ emu, vẹ ega cha dia. (Matiu 24:3, 7; Luk 21:10, 11) Ọmọke krẹn re ghwe vwo phi Ofovwin Akpọeje I vwẹ ukpe rẹ 1914 nu, ko ghwe phẹn gbolozẹ nẹ avwanre ro ọke yena re, ẹdẹ ebrabra rẹ Baibol na seri nẹ “oba rẹ ẹdẹ” na.—2 Timoti 3:1-5.

Jẹ diesorọ akpọ na ji vwo miovwẹnphiyọ rhanvwẹ ọke rẹ Jesu vwọ dia Ovie vwẹ ukpe rẹ 1914? Kidie obodjuvwu yen Jesu de suẹn ọke yena, ọ dia akpọ na-a. Ofovwin de she vwẹ odjuvwu, Jesu rọ dia ovie kpokpọ re vwo mu re seri nẹ Maekẹl da djẹ Eshu vẹ emekashe rọyen rhe otọrakpọ na. (Ẹvwọphia 12:7-9, 12) Kidie nẹ Eshu rhe che se rhivwin kpo odjuvwu na-a, ophu ko muo djọghrọ djọghrọ, kidie ọ riẹnre nẹ ọke rọyen pha krẹkrẹ. Vwọrẹ uyota, o rhe che kri-i, Ọghẹnẹ che ru ọhọre rọyen gba kpahen Eshu vwẹ otọrakpọ na. (Matiu 6:10) Asaọkiephana, e je a fuẹrẹn oborẹ iguiyesi erha ri chekọ na vwẹ ukẹcha kẹ avwanre vwọ riẹn nẹ avwanre yerẹn vwẹ “oba rẹ ẹdẹ” re pha brabra na. Vwọ fẹnẹ ọguiyesi rẹsosuọ ro mudiaphiyọ ohwo vuọvo na, iguiyesi erha  re vwọ kpahọn mudiaphiyọ ẹdia rẹ ihworakpọ eje che hirharoku.

“Esi ọfa da rhe, ọ pha vwavwanre gbagbagba; a da ta kẹ ohwo rọ gua na nẹ ọ reyọ ufuoma nẹ akpọ na, rere ayen nyavwe ohwohwo hwe; a da vwẹ ọlọkọ rode vwọ kẹ.”—Ẹvwọphia 6:4.

Ọguiyesi nana mudiaphiyọ ofovwin. Noso tanẹ ọ reyọ ufuoma vwo nẹ akpọ na ejobi. Vwẹ ukpe rẹ 1914 yen e vwo tu phi ofovwin akpọeje rẹsosuọ. Ofovwin akpọeje rivẹ da vwọ kpahọn, rọ tobọ so oghwọrọ vwọ vrẹn ọrẹsosuọ. Ihwo evo tare nẹ uchunu rẹ ihwo rẹ ofovwin hweri vwo nẹ ukpe rẹ 1914 rhe bun vrẹn oduduru 100! Vwọba, ofovwin na je so oja ọgangan kẹ ihwo buebun.

Mavọ yen ofovwin vwo ẹgba te vwẹ ọke rẹ avwanre na? Ihworakpọ vwo ekuakua rẹ ofovwin re sa ghwọrọ ihworakpọ ejobi siẹvuọvo enẹna. Tobọ ikoko rẹ ufuoma re vwo mu kerẹ United Nations sa dobọ rẹ ọguiyesi ọvwavware na ji-i.

“Me vwọ mrẹ, nighe, esi obiebi, kugbe ohwo rọ gua ro vwo ovwanvwọn vwẹ obọ; mi de nyo obo re họhọ urhuru vwẹ uherevie rẹ eranvwe ekpokpọ ẹne na re tanẹ, Uchunu rẹ ọka ikọba, uchunu rẹ irosu erha ikọba, ẹkẹvuọvo evwri vẹ udi re herọ e miovwẹ aye-en.”—Ẹvwọphia 6:5, 6.

Ọguiyesi nana mudiaphiyọ ọkanrovwẹ rẹ emu. Ọnana djephia nẹ emu cha ghanre te asan rẹ uchunu rẹ ọka da cha dia ikọba yẹrẹ iko ẹne rẹ ọka re se wheat da cha dia idinarọs, idinarọs ọyen osa ra hwa kẹ ohwo vwẹ owian rẹ ẹdọke vwẹ ẹgbukpe ujorin rẹsosuọ! (Matiu 20:2) A je sa vwẹ ikọba na vwọ dẹ iko ihwivẹ rẹ ọka re se barley, rọ dia ọka re niri kueku vwọ vrẹ ọ re se wheat. Kẹ mavọ a sa vwọ vwẹ iko ihwivẹ rẹ ọka vwọ ghẹrẹ orua rode? Ọtiọyena, a da vwẹ orhọn esio kẹ ihwo ọke yena nẹ ayen si obọ rẹ emu rẹ ayen ria kẹdẹ kẹdẹ kpotọ, emu kerẹ evwri vẹ udi rọ dia obo ra mrẹ mamọ.

Avwanre sa mrẹ obo ri djerephia nẹ ọguiyesi obiebi na gua iyesi rọyen rhanvwẹ ukpe rẹ 1914 rhire? E! Vwẹ ẹgbukpe ujorin 20 rẹ ọke avwanre na, owẹnvwe hwe ihwo ri te oduduru 70 ghwu. Iyẹnrẹn ọvo djere nẹ “vwo nẹ 2012 re te 2014, omarẹ ihwo oduduru 805, kọyen a da ghare ihworakpọ na kpo ẹkẹn irhirin, ẹkẹn ọvo rọyen yen owẹnvwe hweri okaroka.” Iyẹnrẹn ọfa da rha ta: “Ihwo rẹ owẹnvwe hwe kukpe kukpe bun vrẹn ihwo rẹ AIDS, odo vẹ owọnrhe ofe hwe siẹrẹ e de ku ayen kugbe.” Dede nẹ ihwo davwẹngba rẹ ayen vwo si owẹnvwe no, jẹ ọguiyesi obiebi na je gua yanran.

“Me vwọ mrẹ, nighe, esi rọ vwara munẹ munẹ, e de se odẹ rẹ ọ rọ gua na nẹ Ughwu, Ushi da vwọ kpahọ ukuko; a da vwẹ ogangan kẹ ayen vwẹ enu rẹ akane rẹ akpọ na, rọ vwẹ ọlọkọ hwe kugbe owẹvwe kugbe ọtiekọ ji kugbe eranvwe re djoma vwẹ akpọ na.”—Ẹvwọphia 6:8.

Ọguiyesi rẹne na mudiaphiyọ ughwu rẹ ọga vẹ erọnvwọn efa soro. Ọmọke krẹn rẹ ukpe rẹ 1914 vwọ wan nu, ọga rẹ dagbo dagbo de hwe ihwo iduduru buebun. Ọ sa dianẹ ihwo ri bun te oduduru 500 yen ọga na te oma, kọyen a da ghare ihwo rẹ akpọ na kpo ẹkẹn erha, ẹkẹn ọvo yen ọga na te oma vwẹ ọke yena.

Jẹ ọga rẹ dagbo dagbo na ọyen ọtonphiyọ rẹ ega. Ihwo evo tare nẹ ihwo iduduru uriorin buebun yen imibe hweri vwẹ ẹgbukpe ujorin rẹ ọke avwanre na. Rhi te nonẹna, ega kerẹ AIDS, odo vẹ owọnrhe ofe ji hwe ihwo iduduru buebun dede nẹ ona rẹ omaesivwo rhoma yovwinphiyọ.

Ughwu ọyen ughwu, owenẹ ọ dia ofovwin, owẹnvwe yẹrẹ ọga yen sorọ. Ushi re koko ihwo jẹ evun vọ-ọn.

O rhe che kri-i, ẹdẹ ebrabra na che vwoba. Karophiyọ nẹ Jesu “yanran re phi” ofovwin vwẹ ukpe rẹ 1914, ọ da kanre Eshu dje otọrakpọ na, ẹkẹvuọvo, ophikparobọ rẹ Jesu ji rhi re-e. (Ẹvwọphia 6:2; 12:9, 12) O rhe che kri-i, vwẹ Amagidọn, Jesu che si erọnvwọn rẹ Eshu soro eje no, ji te ihwo ri biẹcha ejobi. (Ẹvwọphia 20:1-3) Jesu cha dobọ rẹ iguiyesi erha ri chekọ na ji, je rhuẹrẹ umiovwo ejobi rẹ ayen soro phiyọ. Mavọ yen o che ruo wan? Roro kpahen ive rẹ Baibol na.

Ufuoma cha dia asan eje, ukperẹ ofovwin. Jihova “nẹrhẹ ofovwi fue re te oba rẹ akpọ na; o vwirhi umurhabọ, o de wurhu ubiri.” (Une Rẹ Ejiro 46:9) Vwọ kẹ ihwo ri vwo ẹguọnọ rẹ ufuoma, “vwe evun rẹ oyovwe rode kọye ayen da gọlọ.”—Une Rẹ Ejiro 37:11.

Emuọre cha vọn asan eje ukperẹ ọkanrovwẹ rẹ emu. “E jẹn ọka buebu dia otọ na; vwẹ enu rẹ igbenu na etiyin i de kpogho.”—Une Rẹ Ejiro 72:16.

Ukperẹ ega vẹ ughwu, ihwo ejobi che vwo omakpokpọ vẹ arhọ rẹ bẹdẹ. Ọghẹnẹ che “ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a.”—Ẹvwọphia 21:4.

Ọke rẹ Jesu vwọ hẹ otọrakpọ na, ọ da vwẹ odjephia rọ vwerhen oma vwọphia kpahen oborẹ akpọ na cha dia vwẹ obaro na ọke ro de che sun. O titi ufuoma, ọ ghẹrẹ ihwo uriorin buebun vwẹ idjerhe rẹ igbunu, o sivwin ihwo re muọga, ọ je tobọ rhọvwọn ihwo ri ghwuru.—Matiu 12:15; 14:19-21; 26:52; Jọn 11:43, 44.

Oma cha vwerhen Iseri rẹ Jihova rẹ ayen vwo dje kẹ wẹ vwo nẹ Baibol wẹn rhe, obo wo se vwo muegbe hẹrhẹ ọke ra da cha dobọ rẹ iguiyesi na ji. Wọ guọnọ yono kpobarophiyọ?