Ayen djẹ phia vwọrẹ edo! Ikuegbe rẹ iyesi ẹne na vẹ ihwo re gua ayen nabọ vwẹ uhoho ro fiotọ vwọphia te ẹdia rọ da ghwa họhọ nẹ a mrẹ ayen ọke re de se Baibol na! Iyesi ẹsosuọ na ọfuanfon, ohwo rọ gua na vwẹ erhu rẹ ovie tughẹ, ọ je gua yanran vwọrẹ urinrin. Iyesi ọfa rọ pha vwavware da vwọ kpahọn, ohwo rọ gua si ufuoma vwo nẹ akpọ na. Iyesi rerha da vwọ kpahọn, ọ pha biebi kerẹ ebri, ohwo rọ gua yọnren ovwanvwen vwẹ obọ rọyen, ro ghwoghwo ovuẹ rẹ omaemuophiyọ kpahen ọkanrovwẹ rẹ emu. Iyesi rẹne na vwara munẹ munẹ, iyesi na ọyen oka rẹ ega vẹ erọnvwọn re so ughwu, Ughwu yen gua. Ushi vwọ kpahọn kpẹkpẹkpẹ, rọ reyọ arhọ rẹ ihwo!—Ẹvwọphia 6:1-8.

“Oshọ mu vwe ọke rẹsosuọ mi vwo se kpahen iguiyesi ẹne na. Mi rorori nẹ Ẹdẹ Ẹdjọeguo na sikẹrire, ọ vwọ dianẹ mi ji muegbe na-a, ki mi roro nẹ mi che ghwu.”—Crystal.

“Ikuegbe rẹ iguiyesi ẹne re fẹnẹ ohwohwo vẹ iyesi ri vwo ohọroma sansan na vwerhen owẹ oma mamọ. Ugege me vwọ riẹn oborẹ emramrẹ na mudiaphiyọ, ki mi rhi vwo ọhọ rọyen.”—Ed.

Oshọ ro mu Crystal fikirẹ iguiyesi ẹne rehẹ ọbe Ẹvwọphia na ji mu we jovwo re? Gbanẹ oma vwerhen owẹ kirobo rọ vwerhen Ed? Obo rọ wanre eje, ikuegbe rẹ iguiyesi ẹne rẹ ọbe Ẹvwọphia na, ọyen ọvo usun rẹ ikuegbe rẹ ihwo ma riẹn vwẹ ọbe rẹ Ẹvwọphia rọ dia ọbe rọ koba vwẹ Baibol na. Wọ riẹnre nẹ wọ sa mrẹ erere siẹrẹ wọ da riẹn otọ rẹ emramrẹ na? Vwẹ idjerhe vọ? Ọghẹnẹ veri nẹ wọ sa mrẹ uvi rẹ omavwerhovwẹn womarẹ ese, eyono, kugbe e vwo yeren akpọ nene obo re si phiyọ ọbe rẹ aroẹmrẹ na.—Ẹvwọphia 1:1-3.

Dede nẹ oshọ muẹ ihwo kpahen emramrẹ rẹ iguiyesi ẹne na, ọ dia e siro oshọ vwo mu we-e. Vwọrẹ uyota, emramrẹ nana ru esegbuyota rẹ iduduru ihwo buebun ganphiyọ, ọ je nẹrhẹ ayen vwo iphiẹrophiyọ kpahen obaro na. Ọ je sa dia ọtiọyen kẹ wẹ! Biko se yan.