Puerto Limón, orere rọ kẹrẹ unuerhoro vwẹ ẹbẹre ọnre va nẹ cha rẹ Costa Rica yen me dia ghwanre. Emọ ẹrenren yen ọsẹ vẹ oni mẹ vwiẹre, mẹvwẹ yen ọ rẹ ighwrẹn. Ẹgbukpe ẹrenren me hepha ọke rẹ ọsẹ mẹ vwo ghwu. Oni mẹ ọvo kọyen re yọnrọn avwanre ghwanre.

Baseball ọyen ẹbẹre ọvo rẹ akpọ mẹ jovwo. Nẹ ọkiemọ rhe yen me vwọ fa. Mi vwo te omarẹ ẹgbukpe 18, me da vwomaba iklọbu ro fa baseball ra hwosa kẹ-ẹ. Mẹ vẹ ẹko na vwọ fa vwẹ ọke me vwọ hẹ omarẹ ẹgbukpe 20, ọshare ọvo da vuẹ vwẹ nẹ me rhe vwomaba iklọbu rẹ ihwo re fa baseball ra hwosa kẹ vwẹ Nicaragua. Ẹkẹvuọvo kidie nẹ oma rẹ oni mẹ ganre vwẹ ọke yena-a, jẹ ọmẹvwẹ yen vwẹrote, me rha guọnọ kpo Nicaragua ra dia-a. Me da sen kẹ ọshare na. Ọke vwọ yan obaro, ọshare ọfa da vuẹ vwẹ nẹ me rhe vwomaba iklọbu rẹ ihwo ra sanere vwo nẹ iklọbu sansan rhe re fa kẹ ẹkuotọ rẹ Costa Rica. Me da rhọnvwe. Me da fa vwọ kẹ ẹkuotọ na vwo nẹ ukpe rẹ 1949 re te 1952, me fare vwẹ Cuba, Mexico, kugbe Nicaragua. Me nabọ riẹn fa dẹn, me sa fa abọ 17 kpahen ohwohwo jẹ me cha fa chọ-ọ. Omavwerhovwẹn ọke rẹ ihwo de kpere odẹ mẹ!

Ọ da vwẹ mamọ nẹ vwẹ ọke yena, mi ji yeren akpọ rẹ ọfanrhiẹn. Dede nẹ ọsen ọvuọvo yen mi vwori, ọkieje yen mi vwo muẹ eya efa. Me je da udi mamọ. Ẹdẹ ọvo, me da da udi vroma te ẹdia rẹ mi vwo vrẹ vwẹ ehwa irhiọke, me sa karophiyọ obo re me wan te uwevwi-in! Mi ji te idjogba mamọ.

Ọke mi vwo yeren akpọ yena, yen oni mẹ rhe vwọ dia Oseri rẹ Jihova. Ọ davwẹngba o vwo yono uvwe uyota na, ẹkẹvuọvo ẹgba ẹdavwọn rọyen vwẹ ẹsosuọ shefia, kidie baseball mu we rọ. Me sa kpairoro vrẹ emuọre fikirẹ baseball! Baseball na ọvo yen mi mu ẹwẹn kpahen. Mi vwo ẹguọnọ rọyen vrẹ kemu kemu!

Ẹkẹvuọvo me vwọ hẹ ẹgbukpe 29, me da wan oma ọke me vwọ fa baseball. Ọke rẹ ọmaẹwan na vwo kpo nu, me da  dobọ rẹ baseball ẹfa ji. Dedena, mi ji vwobọ vwẹ baseball womarẹ mi vwo yono iklọbu rẹ ihwo ra hwosa kẹ-ẹ re fa kẹrẹ uwevwin mẹ.

Vwẹ ukpe rẹ 1957, me da rhọnvwephiyọ edurhie mi vwo kpo ọghwẹkoko rẹ Iseri rẹ Jihova vwẹ ọguan rẹ eha rẹ me da fa baseball jovwo. Mi vwo chidia ohri rẹ ihwo na, me da mrẹ ofẹnẹ rọ herọ vwẹ oborẹ Iseri na nabọ hwomamu vẹ edo ri mi nyo vwẹ ohri rẹ ihwo ri nughe rẹ baseball vwẹ ọke me vwọ fa. Obo me mrẹre vwẹ ọghwẹkoko na de mu vwe vwọ ton uyono rẹ Baibol phiyọ vẹ Iseri rẹ Jihova, ki mi ji kpo uyono rayen.

Obo ri mi yonori djobọte vwe mamọ. Kerẹ udje, Jesu tare nẹ vwẹ ẹdẹ rẹ oba na, iyinkọn rọyen che ghwoghwo iyẹnrẹn esiri rẹ Uviẹ Ọghẹnẹ wan akpọ na ejobi. (Matiu 24:14) Mi ji yono nẹ Inenikristi rẹ uyota reyọ igho mie ihwo siẹrẹ ayen de ghwoghwo kẹ aye-en. Jesu tare nẹ “Ọphẹ ovwan mrẹre, ọphẹ ovwan je vwọ kẹ rhe.”—Matiu 10:8.

Mi vwo yono Baibol na, ke me reyọ oborẹ Baibol na tare vwọ vwanvwen oborẹ me mrẹ vwẹ oma rẹ Iseri rẹ Jihova. Ẹgbaẹdavwọn rẹ ayen vwo ghwoghwo iyẹnrẹn esiri rẹ uvie na wan akpọ na ejobi vwerhen ovwẹ oma mamọ. Me je mrẹvughe nẹ ayen vwo ẹwẹn ra vwọ kẹ okẹ kirobo rẹ Jesu jiri kẹ Inenikristi. Ọtiọyena, mi vwo se Mak 10:21, je mrẹ edurhie rẹ Jesu nẹ “rhe rhi nene uvwe,” mi de vwo ẹwẹn rẹ me vwọ dia Oseri.

Ẹkẹvuọvo ọ reyọ ọke mi ki se brorhiẹn na. Kerẹ udje, ikpe buebun yen mi vwo phi idjogba kudughwrẹn kudughwrẹn. Ẹkẹvuọvo, mi de yono vwẹ Baibol na nẹ Ọghẹnẹ vwo utuoma kpahen ivwurhuru vẹ ihwo re ga ọghẹnẹ rẹ “Urhiẹvwe” yẹrẹ erhieyovwon. (Aizaya 65:11; Kọlose 3:5) Ọtiọyena, me da dobọ rẹ idjogba ephio ji. Sunday rọ vwọ kpahen ọ rẹ me vwọ dobọ rẹ idjogba ephio ji, ọ rẹ mi phi kuko de mu! Ihwo ke hwẹ vwẹ kidie mi phiri vwẹ udughwrẹn yena-a, ayen ki kpokpo uvwe me vwọ rhoma re te, ẹkẹvuọvo me senre. Mi rhe rhivwin re phi idjogba ọfa-a.

Ẹdẹ ri mi bromaphiyame vwẹ ọghwẹkoko rẹ Iseri rẹ Jihova, me rhoma mrẹ ọdavwini ọfa rẹ mi vwo ku “ohwo ọkpokpọ na phihọ” nu. (Ẹfesọs 4:24) Ovwọnvwọn rẹ ẹdẹ yena, mi de rhivwin kpo hotẹl re me dia, me da mrẹ ọsen mẹ rẹ mẹvwẹ vẹ ọyen hẹrioma nure, o mudia unu ẹchẹ rẹ uvun mẹ. Ọ da ta “yanrhe rere a ra ghwọrọ ọke kugbe.” Me da ghwa vuẹ ugege yena nẹ “Ẹjo!” Me da vuẹ nẹ mi yeren akpọ mẹ nene oborẹ Baibol tare asaọkiephana. (1 Kọrẹnt 6:18) Ọ da ta “wọ nẹ die?” Ọ da vuẹ vwẹ nẹ me kpairoro vrẹ oborẹ Baibol na tare rere avwanre rhoma ton ọyankugbe rẹ avwanre phiyọ. Me da ro uvun mẹ, me da kanre ẹchẹ gbe vwẹ otafe. Oma vwerhen ovwẹ enẹna nẹ ghwe vwọ nẹ ọke rẹ me vwọ dia Oseri vwẹ ukpe rẹ 1958 rhi te ọke nana, me fuevun yan nene ewene rẹ mi ruru vwẹ akpeyeren.

Mane ki mi se si ẹbe kpahen erere re me mrẹre kidie mi nene odjekẹ rẹ Baibol na! Evo usun rẹ erere na yen, mi rhi vwo uvi rẹ igbeyan, yeren uvi rẹ akpeyeren, ji vwo uvi rẹ omavwerhovwẹn.

Mi ji vwo omavwerhovwẹn rẹ baseball, ẹkẹvuọvo ọ die emu ẹsosuọ kẹ wẹ-ẹ. Ọke me vwọ fa baseball, mi titiri, mi ji vwo igho, ẹkẹvuọvo ayen tọn re-e. Jẹ oyerinkugbe mẹ vẹ Ọghẹnẹ kugbe ukoko rẹ iniọvo re me hẹ ohri rayen na cha dia bẹdẹ. Baibol na tare nẹ “Akpọ na cha wanvrẹn, kugbe ojevwe rọye; ẹkẹvuọvo ohwo ro ru ọhọre rẹ Ọghẹnẹ kọ dia bẹdẹ.” (1 Jọn 2:17) Asaọkiephana, mi vwo ẹguọnọ rẹ Jihova Ọghẹnẹ vrẹ kemu kemu!