Vwo Rhe Ihwo rẹ Ẹfesọs 3:1-21
3 Fikirẹ ọnana, mẹvwẹ ri Pọl rọhẹ uwodi fikirẹ Kristi Jesu, kugbe fikirẹ ovwan re dia ihwo rẹ ẹgborho na—
2 ọ da ghene dianẹ ovwan nyo kpahen iruo ra vwọ kẹ vwẹ me vwọ cha ovwan uko, rere ovwan vwọ mrẹ erere vwo nẹ ẹse rẹ Ọghẹnẹ re muwan rọye-en,
3 nẹ a vwẹ odjahọn ọfuanfon na phia kẹ vwẹ womarẹ ẹvwọphia ọvo, kirobo ri mi si rhe ovwan kprẹn jovwo.
4 Ọtiọyena ovwan de se ọnana, kẹ ovwan sa riẹn obo ri mi vwo ẹruọ rẹ odjahọn ọfuanfon ri Kristi na te.
5 Vwẹ uvwiẹ re wanre, a vwẹ odjahọn nana phia vwọ kẹ ihwo kirobo ra vwerọ phia vwọ kẹ iyinkọn efuanfon kugbe emraro rọyen womarẹ ẹwẹn enẹna-a,
6 nẹ ihwo rẹ ẹgborho na de rhiabọreyọ iyẹnrẹn esiri na ji kuomakugbe Kristi Jesu nu, avwanre vẹ ayen ke cha dia iriuku kugbe ẹbẹre sansan rẹ ugboma ọvuọvo, ive rẹ Ọghẹnẹ mi ji rugba vwẹ oma rayen kugbe ọ rẹ avwanre.
7 Me rhe dia odibo rẹ odjahọn ọfuanfon na fikirẹ ẹse rẹ Ọghẹnẹ re muwan rọye-en, ra vwọ kẹ vwẹ womarẹ ẹgba rọyen.
8 Mẹvwẹ rọ hanvwe vrẹ ọ rọ ma hanvwe vwẹ usun rẹ ihwo efuanfon na eje, yen a vwẹ ẹse nana re muwan rọye-en na vwọ kẹ rere mi se vwo ghwoghwo iyẹnrẹn esiri ro shekpahen efe ri Kristi re che se djisẹ rọye-en na vwọ kẹ ẹgborho na,
9 rere ihwo eje sa vwọ mrẹ obo ra reyọ odjahọn ọfuanfon rẹ Ọghẹnẹ rọ ma erọnvwọn eje sinu rhabae na vwo ruiruo wan.
10 Ọnana phiare kidie asaọkiephana, womarẹ ọrhuẹrẹphiyotọ rẹ ukoko na, Ọghẹnẹ guọnọ dje aghwanre rọyen ra vwọ phia vwẹ idjerhe sansan na kẹ isuon kugbe egangan rehẹ asan rehẹ obodjuvwu na.
11 Ọnana shephiyọ vẹ ọhọre ri bẹdẹ na, rọ jiroro rọyen nẹ ọyen che ru womarẹ Kristi Jesu Ọrovwavwanre,
12 ohwo rọ nẹrhẹ avwanre vwo ugbomọphẹ rẹ ota nana je nẹrhẹ avwanre se bru Ọghẹnẹ ra odedede fikirẹ esegbuyota rẹ avwanre vwo kpahọn.
13 Me rẹ ovwan nẹ ovwan jẹ oma rhọ ovwan fikirẹ ukpokpogho ri mi rhiẹromrẹ fikirẹ ovwa-an, kidie enana mudiaphiyọ urinrin vwọ kẹ ovwan.
14 Fikirẹ ọnana yen mi vwo shiguẹ kẹ Ọsẹ na,
15 rọ nẹrhẹ korua korua rọhẹ obodjuvwu kugbe otọrakpọ na sa dia.
16 Me nẹrhovwo nẹ e jẹ ọ womarẹ urinrin* rọyen rode na vwọ nẹrhẹ ohwo rẹ ovwan hepha vwẹ obevun goma, womarẹ ẹgba rẹ ẹwẹn rọyen,
17 kugbe nẹ womarẹ esegbuyota rẹ ovwan, Kristi vẹ ẹguọnọ re vwo kpahen ihwo efa sa vwọ dia evunrẹ ubiudu rẹ ovwan. E jẹ ovwan tan awọ muotọ ji mudia vwẹ enu rẹ uchivwo rọ pha kokoroko na,
18 rere ovwan vẹ ihwo efuanfon na eje sa vwọ nabọ vwo ẹruọ rẹ ohẹhẹre, ugrongron, enuẹra kugbe ukokodo na vọnvọn,
19 ovwan je vwọ riẹn ẹguọnọ ri Kristi rọ vrẹ erianriẹn, rere ovwan se vwo vwo ovọnvọn na ejobi rẹ Ọghẹnẹ kẹ ohwo.
20 Asaọkiephana, ohwo rọ sa womarẹ ẹgba rọyen rọ wian vwẹ oma rẹ avwanre vwo ru shesheri vrẹ erọnvwọn eje rẹ avwanre nokpẹn rọyen yẹrẹ rorori,
21 ọyen ofori nẹ a vwẹ urinrin kẹ womarẹ ukoko na kugbe womarẹ Kristi Jesu, ra ro uvwiẹ na ejobi rhirin bẹdi bẹdẹ. Isẹ.
Eta rehẹ obotọ na
^ Vwẹ Grik, “efe rẹ urinrin.”