Vwo Rhe Ihwo rẹ Ẹfesọs 4:1-32
4 Ọtiọyena mẹvwẹ re mu phiyọ uwodi fikirẹ Ọrovwori na, rẹ ovwan nẹ ovwan yan vwẹ idjerhe ro fo use re se ovwan na,
2 vẹ omaevwokpotọ eje kugbe dẹndẹn vẹ edirin, ovwan rhe chirakon rẹ ohwohwo vwọrẹ ẹguọnọ,
3 ovwan rha davwẹngba rẹ ovwan eje ovwan vwọ sẹro rẹ okugbe rẹ ẹwẹn na nẹrhẹ e vwo, womarẹ ufuoma ro churu ihwo kuẹgbe.
4 Ugboma ọvuọvo yen herọ, kugbe ẹwẹn ọvuọvo, kirobo re se ovwan vwọ rhe iphiẹrophiyọ ọvuọvo rẹ use rẹ ovwan na;
5 Ọrovwori ọvuọvo, esegbuyota ọvuọvo, omaebrophiyame ọvuọvo;
6 Ọghẹnẹ ọvuọvo kugbe Ọsẹ rẹ ihwo eje, rọhẹ enu rẹ ihwo eje womarẹ ihwo eje kugbe vwevunrẹ ihwo eje.
7 Asaọkiephana a vwẹ ẹse rẹ Ọghẹnẹ re muwan rọye-en na vwọ kẹ avwanre ohwo ọvuọvo kirobo rẹ Kristi ghare ẹserọphẹ na vwẹ uvwre rẹ avwanre.
8 Kidie ọ tare nẹ: “Ọke ro vwo kpo obenu, o mu eviẹn yanran, ọ da vwẹ eshare vwo ruẹse.”
9 Asaọkiephana, die yen ota na, “ro vwo kpo obenu” mudiaphiyọ? O mudiaphiyọ nẹ ọ ka rhe otọrakpọ na jovwo re.
10 Ohwo ro wontọ rhe na yen ji kpo obenu shesheri vwọ vrẹ idjuvwu na eje, rere erọnvwọn ejobi sa vwọ vọn wan oma rọyen.
11 Ọ da vwẹ evo mu kerẹ iyinkọn, evo kerẹ emraro, evo kerẹ ihwo ri ghwoghwo,* evo kerẹ isuigodẹ kugbe iyono,
12 vẹ ẹwẹn re vwo yono ihwo efuanfon na rere ayen se vwo ruiruo rẹ odibo egbe, ra vwọ bọn ugboma ri Kristi na gan,
13 bẹsiẹ avwanre eje vwo vwo esegbuyota ọvuọvo* kugbe erianriẹn ọgbagba rẹ Ọmọ rẹ Ọghẹnẹ na, rere avwanre sa vwọ dia kerẹ ihwo ri tedje, bẹsiẹ iruemu rẹ avwanre sa vwọ dia kerẹ ọ rẹ ohwo ro tedje, kerẹ Kristi.
14 Ọtiọyena, e rhe jẹ avwanre dia emọ-ọ, rẹ ọkẹre muẹcha muẹkpo, rẹ odju ri kuyono kuyono djuẹcha djuẹkpo womarẹ ọghware rẹ ihwo, womarẹ ona rẹ ophiẹnvwe sansan.
15 Ukperẹ ọtiọyen, e jẹ avwanre ta uyota ji dje ẹguọnọ phia, ọtiọyena kẹ avwanre sa rho tedje vwẹ kidjerhe kidjerhe, rere avwanre vẹ Kristi rọ dia uyovwin na se vwo yerin kugbe.
16 Wan oma rọyen ọyen ugboma na ejobi vwọ tan kugbe re je vwọ wian kuẹgbe womarẹ kẹrhon kẹrhon rọ vwẹ obo ra guọnọre vwọ phia. Ọke rẹ ẹbẹre ọvuọvo da riẹn wian, ọnana toroba ọrho rẹ ugboma na rọ vwọ bọn oma rọyen gan vwevunrẹ ẹguọnọ.
17 Ọtiọyena, ọnana yen obo re me ta, ri mi ji jiri kẹ ovwan gangan vwevunrẹ Ọrovwori na, nẹ ovwan rha yan kirobo rẹ ihwo rẹ ẹgborho na yan vwevunrẹ iroro ofefe* raye-en.
18 Ayen hẹ evunrẹ ebri vwọrẹ iroro, a je hẹriẹ ayen vwo nẹ arhọ ro nẹ obọ rẹ Ọghẹnẹ rhe, fikirẹ ughẹnghẹn rọhẹ evunrẹ oma rayen, fikirẹ ubiudu rayen ro ghwuru timẹ.
19 Rọ vwọ dianẹ oma rha vua aye-en na, ayen da vwẹ oma rayen vwọ kpahotọ vwọ kẹ uruemu ra ghẹmrẹ,* kẹ ayen vwobọ vwẹ koka koka rẹ uruemu ri jẹfuọn ejobi vẹ urhuru.
20 Ẹkẹvuọvo, ovwan riẹn Kristi phiyọ oka rẹ ohwo ọtiọye-en,
21 ọ da ghene dianẹ ovwan nyo ota ri Jesu, ovwan ji yono mie kirobo rẹ uyota na hẹ evunrẹ oma rọyen.
22 E yono ovwan nẹ ovwan ku uruemu rẹ awanre na nu, rọ vẹ oka rẹ akpọ rẹ ovwan yerẹn jovwo gbe shephiyọ na, rẹ ojevwe rẹ ophiẹnvwe rọyen gbe kuẹ na.
23 Ovwan vwẹ ọkieje vwo ru ẹgba rẹ iroro* rẹ ovwan phiyọ ọkpokpọ,
24 rere ovwan ku uruemu ọkpokpọ na phiyọ, ra mare vwo nene ọhọre rẹ Ọghẹnẹ, vwẹ obọdẹn rẹ ophiọnphiọn kugbe evun-ẹfuọn.
25 Ọtiọyena, rẹ ovwan vwo siobọnẹ ophiẹnvwe re na, e jẹ ohwo ọvuọvo ta uyota kẹ ọrivẹ rọyen, kidie avwanre ẹbẹre sansan rẹ ugboma ọvo.
26 Muophu, ẹkẹvuọvo wo ruẹ umwemwu-u, wo jẹ ọnre she ghene uwe rẹ wo ji vwo muophu na-a;
27 wọ vwẹ uphẹn kẹ Idẹbono-o.
28 E jẹ ohwo ro chuji rhe cho ọfa-a; ukperẹ ọtiọyen, e jẹ ọ wian gangan, ọ vwẹ obọ rọyen ruiruo esiri rere ọ sa mrẹ orọnvwọn vwọ kẹ ohwo ọfa rọ guọnọ ukẹcha.
29 We jẹ ota ogbongbon nẹ unu rẹ ovwan cha-a, ẹkẹvuọvo ota esiri rọ sa bọn ihwo gan ọvo, ro che fierere kẹ ihwo ri nyoro.
30 Vwọba, ovwan rha sua omaemuophiyọ* kẹ ẹwẹn ọfuanfon rẹ Ọghẹnẹ-ẹ, ra vwọ ka oka phiyọ ovwan hẹrhẹ ẹdẹ rẹ obọesiono womarẹ ọtanhirhe.
31 We siobọnu koka koka rẹ ivun emiovwo ọgangan, ophu, ophu ọgangan, ovan kugbe ekan ẹhanrhọn, ọtiọyen ji te kemu kemu rọ sua omaẹwan.
32 Ẹkẹvuọvo we dje uruemu esiri kẹ ohwohwo, we gbe arodọnvwẹ kẹ ohwohwo, we vwo ghovwo ohwohwo ọphẹ kirobo rẹ Ọghẹnẹ je womarẹ Kristi vwo ghovwo ovwan ọphẹ.
Eta rehẹ obotọ na
^ Yẹrẹ “ihwo ri ghwoghwo iyẹrẹn esiri na.”
^ Yẹrẹ “vwo vwo okugbe rẹ esegbuyota na.”
^ Yẹrẹ “odiodi.”
^ Yẹrẹ “uruemu rẹ omavovwẹ kanre.” Vwẹ Grik, a·sel′gei·a. Ni Eta re Vwomaphia
^ Yẹrẹ “ẹgba ro suẹn iroro rẹ ovwan.” Vwẹ Grik, “ẹwẹn rẹ iroro rẹ ovwan.”
^ Yẹrẹ “ivun emiovwo.”