Ẹvwọphia ri Jọn 10:1-11
10 Me da mrẹ amakashe ọfa ro vwo ẹgba ro wontọ nẹ odjuvwu cha, ọ vwẹ evwru vwo phopho, aphoro hẹ uyovwin rọyen, opharo rọyen pha kerẹ ọnre na, awọ rọyen họhọ ichivwo rẹ erhanre,
2 ọ yọnrọn umukpirhin ọbe ọvo re kpirhiri-in. O mu owọrhen rọyen kpahen abadi na, o de rhe mu owọhwẹre rọyen kpahen akpọ na,
3 o de kperi phia vẹ urhuru ọgangan kerẹ ọke rẹ okpohrokpo da guan. Ọke ro vwo kperi phia, urhuru rẹ egbraran ighwrẹn na da ta ota.
4 Asaọkiephana rẹ egbraran ighwrẹn na vwọ ta ota, ke me guọnọ siẹ, ẹkẹvuọvo mi de nyo urhuru ọvo ro nẹ obodjuvwu rhe rọ tanẹ: “Kanre erọnvwọn rẹ agbraran ighwrẹn na tare, wo siẹ ayen phiyotọ-ọ.”
5 Amakashe re me mrẹre ro mudia enu rẹ abadi kugbe akpọ na da kpare obọrhen rọyen kpo obodjuvwu,
6 ọ da vwẹ Ohwo rọ herọ rhirin bẹdi bẹdẹ na vwo duvwun iyorin, ohwo rọ ma odjuvwu na vẹ erọnvwọn rehẹ evun rọyen, kugbe akpọ na vẹ erọnvwọn rehẹ evun rọyen, kugbe abadi na vẹ erọnvwọn rehẹ evun rọyen: “O rhe vwo ọke ehwe-e.
7 Ẹkẹvuọvo vwẹ ọke rẹ amakashe righwrẹn na vwọ guọnọ hworo owanre* rọyen, a da vwẹ odjahọn ọfuanfon na rẹ Ọghẹnẹ ghwoghwori kerẹ iyẹnrẹn esiri vwọ kẹ idibo rọyen re dia emraro na vwo toba.”
8 Mi de nyo urhuru na rọ rhoma nene uvwe ta ota nẹ odjuvwu cha, ọ da tanẹ: “Yanran, wọ reyọ ukpirhin ọbe re rhieri na rọhẹ obọ rẹ amakashe ro mudia enu rẹ abadi kugbe akpọ na.”
9 Mi de bru amakashe na ra, me da vuẹ nẹ ọ vwẹ umukpirhin ọbe na kẹ vwẹ. Ọ da vuẹ vwẹ nẹ: “Reyọ rere wọ riọ, ọ cha nẹrhẹ evun wẹn yara, ẹkẹvuọvo ọ cha miẹmiẹ vwẹ ugbunu wẹn kerẹ ame ọnyọn.”
10 Me da reyọ umukpirhin ọbe na nẹ obọ rẹ amakashe na, me da riọ, ọ miẹmiẹre vwẹ ugbunu mẹ kerẹ ame ọnyọn, ẹkẹvuọvo me vwọ riọ nu evun mẹ kọ yara.
11 Ayen da ta kẹ vwẹ nẹ: “Wọ cha rhoma mraro kpahen ihwo kugbe ẹgborho kugbe ẹrẹnvwe* kugbe ivie buebun.”