Ẹvwọphia ri Jọn 13:1-18
13 O* de mudia enu rẹ ekpẹn rẹ abadi na.
Me da mrẹ eranvwe rẹ aghwa ọvo ro nẹ evunrẹ abadi na cha, o vwo idjo ihwe kugbe iyovwin ighwrẹn, erhu rẹ ovie* ihwe hẹ idjo rọyen, edẹ rẹ ẹgua hẹ iyovwin rọyen.
2 Asaọkiephana eranvwe rẹ aghwa re me mrẹre na họhọ ubido, ẹkẹvuọvo awọ rọyen pha kerẹ awọ rẹ okorhi, unu rọyen pha kerẹ unu rẹ okpohrokpo. Okpodje na da vwẹ ẹgba rọyen kugbe ekete rọyen kugbe ogangan rode vwọ kẹ eranvwe na.
3 Me da mrẹ nẹ uyovwin rọyen ọvo họhọ obo re wan oma brabra jovwo, ẹkẹvuọvo e sivwin ora na ro se hwe jovwo na kpo re, akpọ na eje de nene jẹ o gbe ayen unu.
4 Ayen da vwẹ ẹga kẹ okpodje na kidie ọ vwẹ ogangan na kẹ eranvwe rẹ aghwa na, ayen da vwẹ eta nana vwọ ga eranvwe rẹ aghwa na: “Ono yen họhọ eranvwe rẹ aghwa na, ono yen se nene họnre?”
5 A da vwẹ unu rọ ta erọnvwọn ride vẹ eta rẹ ẹgua vwọ kẹ, a da je kẹ ogangan ro vwo ruiruo vwẹ emeranvwe 42.
6 O de rhie unu rọyen vwọ ta eta rẹ ẹgua kpahen Ọghẹnẹ, ọ da ta eta rẹ ẹgua kpahen odẹ rọyen kugbe asan rọ dia, tobọ ji te ihwo re dia obodjuvwu.
7 A da rhọnvwe kẹ nẹ o nene ihwo efuanfon na phi ofovwin rere o phi ayen kparobọ, a da kẹ ogangan vwẹ enu ri kuvwiẹ kuvwiẹ kugbe ihwo kugbe ẹrẹnvwe* kugbe ẹgborho.
8 Ihwo eje re dia akpọ na ke cha vwẹ ẹga kẹ. Vwo nẹ ọtonphiyọ rẹ akpọ na rhe, o vwo ọvuọvo vwẹ usun rayen re si odẹ rọyen phiyọ ukpirhin ọbe rẹ arhọ rẹ Omogodẹ re hweri na-a.
9 Ọ da dianẹ ohwo vwo erhọ, e jẹ o nyo.
10 Ọ da dianẹ e che mu ohwo ọvo kpo ọviẹn, o che jẹ ọviẹn na ẹra-a. Ọ da dianẹ ohwo ọvo cha vwẹ ọlọkọ hwe,* o vwo obo rọ wanre-e, a je cha vwẹ ọlọkọ hwe ohwo yena. Ẹdia nana yen a da guọnọ akoechiro kugbe esegbuyota vwo mie ihwo efuanfon na.
11 Ọyena vwọ wan nu, me da mrẹ eranvwe rẹ aghwa ọfa ro nẹ evunrẹ akpọ na cha, o vwo idjo ivẹ kerẹ omogodẹ, ẹkẹvuọvo kọ ta ota kerẹ okpodje.
12 Ọ da reyọ ogangan eje rẹ eranvwe rẹ aghwa rẹsosuọ rọhẹ obaro rọyen na vwo ruiruo. Ọ da nẹrhẹ akpọ na vẹ ihwo rehẹ evun rọyen vwẹ ẹga kẹ eranvwe rẹ aghwa rẹsosuọ na, re sivwin ora rọyen rọ sa so ughwu kẹ jovwo na kpo.
13 O de ru eka ride, ọ tobọ nẹrhẹ erhanre nẹ obodjuvwu rhe otọrakpọ na vwẹ irharo rẹ ihworakpọ.
14 Kọ phiẹn ihwo re dia akpọ na fikirẹ eka ra rhọnvwe kẹ nẹ o ru vwẹ irharo rẹ eranvwe rẹ aghwa na, jẹ ọ vuẹ ihwo re dia akpọ na nẹ ayen ma oma vwọ kẹ eranvwe rẹ aghwa na ra vwẹ ọlọkọ nyavwe jẹ o ghwuru-u na.
15 A da rhọnvwe kẹ nẹ ọ vwẹ ẹwẹn kẹ oma rẹ eranvwe rẹ aghwa na rere oma rẹ eranvwe rẹ aghwa na vwọ ta ota, je nẹrhẹ e hwe ihwo eje re rhọnvwe vwẹ ẹga kẹ oma rẹ eranvwe rẹ aghwa na-a.
16 Ọ da gba ihwo eje—te itete te iride, te edafe te ivwiogbere, te emuvwiẹ te eviẹn—nẹ a ka oka phiyọ obọrhen yẹrẹ arhare rayen,
17 kugbe nẹ ohwo vuọvo sa dẹ yẹrẹ shẹ-ẹ, jokparẹ ohwo ro vwo oka na, odẹ rẹ eranvwe rẹ aghwa na yẹrẹ ukeri rẹ odẹ rọyen.
18 Ẹdia nana yen a da guọnọ aghwanre: E jẹ ohwo ro vwo ẹruọ roro ukeri rẹ eranvwe rẹ aghwa na, kidie ọyen ukeri rẹ ohworakpọ, ukeri rọyen yen 666.
Eta rehẹ obotọ na
^ Kọyen, Okpodje na.
^ Vwẹ Grik, “idayadẹm.”
^ Yẹrẹ “ejajẹ.”
^ Yẹrẹ ọ sa dia, “Ọ da dianẹ a cha vwẹ ọlọkọ vwo hwe ohwo ọvo.”