Ẹvwọphia ri Jọn 15:1-8
15 Me da mrẹ oka ọfa vwẹ obodjuvwu rọ pha rhuarho rọ je vọn vẹ igbevwunu, emekashe ighwrẹn vẹ etiekọ ighwrẹn. Enana yen e re koba kidie womarẹ ayen yen a vwọ reyọ ophu rẹ Ọghẹnẹ vwo toba.
2 Me da mrẹ orọnvwọn ọvo rọ họhọ abadi rẹ ughegbe re ku kugbe vẹ erhanre, ihwo ri phi eranvwe rẹ aghwa na kugbe oma rọyen kugbe ukeri rẹ odẹ rọyen kparobọ mudia asan abadi rẹ ughegbe na, ayen yọnrọn isorogun rẹ Ọghẹnẹ.
3 Ayen sua une ri Mosis odibo rẹ Ọghẹnẹ kugbe une rẹ Omogodẹ na, nẹ:
“Iruo wẹn pha rhuarho, e je vọn vẹ igbevwunu, Jihova* Ọghẹnẹ, Ọromevwẹgba na. Ọsoso kugbe uyota yen idjerhe wẹn, Ovie ri bẹdẹ.
4 Ono yen che ghini jẹ oshọ wẹn ẹdjẹ Jihova,* ro de jẹ urinrin ẹ vwọ kẹ odẹ wẹn, kidie wẹwẹ ọvo yen ohwo rọ fuevun? Ẹgborho na eje cha rhe obaro wẹn rhe ga wẹ, kidie e dje irhi ephiọnphiọn wẹn phia re.”
5 Ọnana vwọ wan nu me da mrẹ, e rhie asan ọfuanfon rẹ utughẹ* rẹ oseri na phiyọ vwẹ obodjuvwu,
6 emekashe ighwrẹn vẹ etiekọ ighwrẹn na de nẹ asan ọfuanfon na rhe, ayen ku iwun efuanfon ri lo phiyọ, ayen da rha vwẹ emwa rẹ oro vwọ gba udu rayen.
7 Ọvo vwẹ usun rẹ emama ekpokpọ ẹne na da vwẹ imize rẹ oro ighwrẹn re vọnre vẹ ophu rẹ Ọghẹnẹ, rọ dia ohwo rọ herọ rhirin bẹdi bẹdẹ na vwọ kẹ emekashe ighwrẹn na.
8 Asan ọfuanfon na da rhe vọn vẹ ivwirhi fikirẹ urinrin rẹ Ọghẹnẹ, kugbe fikirẹ ẹgba rọyen, ohwo vuọvo rha sa ro asan ọfuanfon na-a, bẹsiẹ rẹ etiekọ ighwrẹn rẹ emekashe ighwrẹn na vwo re.