Ẹvwọphia ri Jọn 19:1-21
19 Ọnana vwọ wan nu, mi de nyo obo re họhọ urhuru ọgangan rẹ ihwo buebun vwẹ obodjuvwu. Ayen da tanẹ: “Jiri Jah!* Usivwin na kugbe urinrin na kugbe ogangan na e rẹ Ọghẹnẹ rẹ avwanre,
2 kidie ẹdjọeguo rọyen uyota kugbe ọsoso. O brorhiẹn hwe igberadja rode na ro miovwo akpọ na womarẹ ọfanrhiẹn* rọyen, ọ je reihri rẹ ọbara rẹ idibo rọyen rehẹ obọ rọyen re.”*
3 Ugege yena ayen da ta vwẹ obọ rivẹ nẹ: “Jiri Jah!* Jẹ ivwirhi rọyen brẹ kpenu rhirin bẹdi bẹdẹ.”
4 Ekpako 24 na kugbe emama ekpokpọ ẹne na de she teyen otọ, ayen da ga Ọghẹnẹ ro chidia ekete na, ayen da tanẹ: “Isẹ! Jiri Jah!”*
5 Vwọba, urhuru ọvo de nẹ ekete na rhe, ọ da tanẹ: “Ovwan rhe jiri Ọghẹnẹ rẹ avwanre, ovwan idibo rọyen eje re djoshọ rọyen, te itete te iride.”
6 Mi de nyo edo ọvo rọ họhọ urhuru rẹ ihwo buebun, edo rẹ ame buebun kugbe edo rẹ egbraran re vanre gangan. Ayen da tanẹ: “Jiri Jah,* kidie Jihova* Ọghẹnẹ rẹ avwanre, Ọromevwẹgba na, tuẹn usuon phiyọ kerẹ ovie re!
7 E jẹ avwanre ghọghọ rere oma vwerhen avwanre gangan rere a vwẹ urinrin kẹ, kidie orọnvwe rẹ Omogodẹ na te re, aye rọyen ji muegbe rẹ oma rọyen re.
8 E, a rhọnvwe kẹ nẹ o ku ewun oyoyovwin phiyọ rọ fonro ro ji lo—kidie ewun oyoyovwin na mudiaphiyọ irueru ephiọnphiọn rẹ ihwo efuanfon na.”
9 Ọ da ta kẹ vwẹ nẹ, “Si: Omavwerhovwẹn dia vwọ kẹ ihwo re durhie vwo kpo emu ovwọnvwọn rẹ orọnvwe rẹ Omogodẹ na.” Vwọba, ọ da ta kẹ vwẹ nẹ: “Enana eta rẹ uyota rẹ Ọghẹnẹ.”
10 Ọtiọyena mi de she teyen otọ vwẹ obaro rẹ awọ rọyen me vwọ vwẹ ẹga kẹ. Ẹkẹvuọvo ọ da ta kẹ vwẹ nẹ: “Jomaotọ! Wo ruẹ ọtiọye-en! Mẹvwẹ jẹ odibo kirobo rẹ owẹ vẹ iniọvo wẹn ri vwo iruo rẹ ayen vwo soseri kpahen Jesu hepha. Ga Ọghẹnẹ! Kidie oseri re se kpahen Jesu yen nẹrhẹ a mraro.”
11 Me da mrẹ odjuvwu ro rhiephiyọ, nighere! iyesi ọfuanfon ọvo. E se ohwo ro chidia enu rọyen Ohwo rọ Fuevun kugbe Ohwo rẹ Uyota, o guẹdjọ ji phiẹ ofovwin vwevunrẹ ophiọnphiọn.
12 Ẹro rọyen pha kerẹ ẹkuerhanre, erhu rẹ ovie* buebun hẹ uyovwin rọyen. O vwo odẹ ọvo re siri rẹ ohwo vuọvo riẹnre-e jokparẹ ọyen ọvo,
13 o ku ewun rẹ obotafe ọvo phiyọ rẹ ọbara gberi,* e de rhe se odẹ na Ota rẹ Ọghẹnẹ Na.
14 Vwọba, ituofovwin rẹ obodjuvwu ki nene vwẹ enu rẹ iyesi efuanfon, ayen ku iwun efuanfon re pha yoyovwin re je fon phiyọ.
15 Ọlọkọ ogrongron ọvo rọ pha dandan ro che vwo hwe ẹgborho na yoro nẹ unu rọyen rhe, ọ cha vwẹ ọkpọ rẹ utehru vwo sun ayen. Vwọba, o chiyẹn vwẹ asan re de mie iwaini rẹ ophu ọgangan rẹ Ọghẹnẹ, Ọromevwẹgba na.
16 E si odẹ ọvo phiyọ ewun rẹ obotafe rọyen, e, phiyọ ekpoghowọ rọyen, Ovie rẹ ivie kugbe Ọrovwori rẹ irivwori.
17 Me da je mrẹ amakashe ọvo ro mudia vwevunrẹ ọnre na, o de kperi phia vẹ urhuru ọgangan, ọ da ta kẹ emephran na eje re rhan vwẹ uherevie rẹ odjuvwu* na nẹ: “Ovwan yanrhe obonẹ, rere ovwan siomakoko kpo emu ovwọnvwọn rode rẹ Ọghẹnẹ na,
18 rere ovwan sa vwọ re uvwo rẹ ivie kugbe uvwo rẹ inotu ride rẹ isodje kugbe uvwo rẹ egba kugbe uvwo rẹ iyesi kugbe ọ rẹ ihwo ri chidia enu rayen, kugbe uvwo rẹ ihwo eje, ọ rẹ emuvwiẹ ọtiọyen ji te ọ rẹ eviẹn kugbe ọ rẹ ihwo itete kugbe ihwo ride.”
19 Me da mrẹ eranvwe rẹ aghwa na kugbe ivie rẹ akpọ na kugbe ituofovwin rayen ri siomakoko rere ayen họnre vwọso ohwo ro chidia enu rẹ iyesi na kugbe otuofovwin rọyen.
20 E de mu eranvwe rẹ aghwa na vẹ ọmraro rẹ efian na ro ruẹ eka vwẹ obaro rọyen rọ vwọ phiẹn ihwo ri vwo oka rẹ eranvwe rẹ aghwa na kugbe ihwo re vwẹ ẹga kẹ oma rọyen na. Rẹ ayen je vwọ hẹ akpọ na, e de do ayen phiyọ ẹtẹrhe erhanre rọ torhẹ vẹ isọfọ.*
21 Ẹkẹvuọvo a da vwẹ ọlọkọ ogrongron ro yoro nẹ unu rẹ ohwo ro chidia enu rẹ iyesi na vwo hwe i ri chekọ na. Emephran na ejobi da re uvwo rayen vọn evun.
Eta rehẹ obotọ na
^ Yẹrẹ “Haleluyah!; Halelujah!” “Jah” ọyen obrukrẹ rẹ odẹ na Jihova.
^ Vwẹ Grik, por·nei′a. Ni Eta re Vwomaphia.
^ Vwẹ Grik, “idibo rọyen vwo nẹ obọ rọyen re.”
^ Yẹrẹ “Haleluyah!; Halelujah!” “Jah” ọyen obrukrẹ rẹ odẹ na Jihova.
^ Yẹrẹ “Haleluyah!; Halelujah!” “Jah” ọyen obrukrẹ rẹ odẹ na Jihova.
^ Yẹrẹ “Haleluyah!; Halelujah!” “Jah” ọyen obrukrẹ rẹ odẹ na Jihova.
^ Ni Eta re Vwomaphia.
^ Vwẹ Grik, “idayadẹm.”
^ Yẹrẹ ọ sa dia, “sare ku.”
^ Yẹrẹ “vwẹ obenu.”
^ Ọnana ipọda rọ fobọ frẹ erhanre, ro gbon kpain kpain siẹrẹ a da torhẹ.