Ẹvwọphia ri Jọn 2:1-29
2 “Si rhe amakashe rẹ ukoko rẹ Ẹfesọs nẹ: Enana yen erọnvwọn rẹ ohwo rọ yọnrọn isio ighwrẹn na vwẹ obọrhen rọyen, rọ je yan vwẹ ohri rẹ igburhukpẹ* rẹ oro ighwrẹn na tare:
2 ‘Me riẹn iruo wẹn kugbe owian ọgangan wẹn kugbe akoechiro wẹn, kugbe nẹ wo rhiabọreyọ ihwo ebrabra-a, wọ je davwan ihwo re tanẹ ayen iyinkọn jẹ ayen dia iyinkọ-ọn nẹ, wọ da rhe mrẹvughe nẹ ayen evwọrefian.
3 Wo ji chirakon, wo vwo erhiorin fikirẹ odẹ mẹ, oma je rhe rhọ wẹ-ẹ.
4 Dedena mi kere ọnana ba wẹ obọ, nẹ wo siobọnẹ ẹguọnọ ru wo vwori ẹsosuọ.
5 “‘Ọtiọyena karophiyọ asan ru wo she nurhe, wo kurhẹriẹ rere wo ruiruo ru wo ruru ẹsosuọ. Wo rhe ru ọtiọye-en, mi che bru we rhe, ki mi che si ogburhukpẹ* wẹn nẹ asan rọ hepha, jokpanẹ ku wo kurhẹriẹ.
6 Dedena mi jiri uwe fikirẹ ọnana: nẹ wo vwo utuoma kpahen irueru rẹ ẹko ri Nikoleọs, kirobo ri mi ji vwo utuoma kpahọn.
7 E jẹ ohwo ro vwo erhọ nyo oborẹ ẹwẹn na ta kẹ ikoko na: Vwọ kẹ ohwo ro phikparobọ, me cha vwẹ uphẹn kẹ nẹ ọ re nẹ urhe rẹ arhọ na rọhẹ evunrẹ iparadaisi rẹ Ọghẹnẹ na.’
8 “Si rhe amakashe rẹ ukoko ri Smaina nẹ: Enana yen erọnvwọn rẹ Ọrẹsosuọ kugbe Ọrọkoba na, ro ghwuru jovwo rọ da rhoma rhe akpọ na tare:
9 ‘Me riẹn ukpokpogho wẹn kugbe ẹdia rẹ ogbere ru wọ hepha—ẹkẹvuọvo wo feri—kugbe eta rẹ ẹgua rẹ ihwo ri se oma rayen ihwo ri Ju jẹ ayen dia ihwo ri Ju-u, ẹkẹvuọvo ayen sinagọg rẹ Eshu.
10 Wọ djoshọ rẹ erọnvwọn ru wọ cha rioja rọyen na-a. Nighere! Idẹbono che rhe do evo vwẹ usun rẹ ovwan na phiyọ uwodi rere a sa vwọ davwen ovwan ni vọnvọn, ovwan che vwo ukpokpogho vwẹ ẹdẹ ihwe. Dje evun-ẹfuọn wẹn phia tobọ te ẹdia rẹ ughwu, ke me cha kẹ wẹ erhu rẹ arhọ na.
11 E jẹ ohwo ro vwo erhọ nyo oborẹ ẹwẹn na ta kẹ ikoko na: O vwo ọke vuọvo rẹ ohwo ro phikparobọ cha vwọ rioja rẹ ughwu rivẹ na-a.’
12 “Si rhe amakashe rẹ ukoko ri Pẹgamọm nẹ: Enana yen erọnvwọn rẹ ohwo ro vwo ọlọkọ ogrongron rọ pha dandan ro vwo akon ivẹ na tare:
13 ‘Me riẹn asan ru wọ dia, kọyen asan rẹ ekete rẹ Eshu hepha; dedena wọ yọnrọn odẹ mẹ kokoroko ọkieje, wọ sen esegbuyota ru wo vwo kpahen ovwẹ-ẹ, tobọ vwẹ ọke rẹ Antipas oseri mẹ rọ fuevun re hweri vwẹ irharo wẹn, vwẹ asan rẹ Eshu dia.
14 “‘Dedena mi kere emerọnvwọn evo ba wẹ obọ, nẹ o vwo ihwo evo vwẹ etiyin ri ruẹ nene uyono ri Balaam, ro yono Balak nẹ o phi ukuta rọ sua ekprowọ phiyọ obaro rẹ ihwo ri Izrẹl, nẹ ayen re erọnvwọn re vwo ze izobo kẹ edjọ rere ayen ji gbe ọfanrhiẹn.*
15 Vwẹ idjerhe vuọvo na, wo ji vwo ihwo ri ruẹ nene uyono rẹ ẹko ri Nikoleọs.
16 Ọtiọyena gbe kurhẹriẹ. Wo rhe ru ọtiọye-en, mi bru we cha kpakpata, me cha reyọ ọlọkọ ogrongron rẹ unu mẹ na vwo nene ayen phi ofovwin.
17 “‘E jẹ ohwo ro vwo erhọ nyo oborẹ ẹwẹn na ta kẹ ikoko na: Vwọ kẹ ohwo ro phikparobọ, me cha vwẹ evo vwẹ usun rẹ imana re sinu na kẹ, me cha vwẹ ubioragha ọfuanfon kẹ, e si odẹ kpokpọ phiyọ ubioragha na, ohwo vuọvo riẹn odẹ na-a jokparẹ ohwo ra vwerọ kẹ.’
18 “Si rhe amakashe rẹ ukoko ri Tayataira nẹ: Enana yen erọnvwọn rẹ Ọmọ rẹ Ọghẹnẹ na, rẹ ẹro rọyen pha kerẹ ẹkuerhanre, rẹ awọ rọyen pha kerẹ ẹrovwo oyoyovwin na tare:
19 ‘Me riẹn iruo wẹn, kugbe ẹguọnọ wẹn kugbe esegbuyota kugbe odibo egbe kugbe akoechiro wẹn, kugbe nẹ iruo wẹn rẹ ukuko na bun vrẹ e ru wo ruru vwẹ ẹsosuọ.
20 “‘Dedena mi kere ọnana ba wẹ obọ, nẹ wọ vwẹ uphẹn kẹ aye yena Jẹzibẹl, ro se oma rọyen ọmraro rẹ aye, ro yono ji suẹn idibo mẹ ghwrẹ, rẹ ayen vwo gbe ọfanrhiẹn* je riemu re vwo ze izobo kẹ edjọ.
21 Me kẹ rẹ uphẹn ro vwo kurhẹriẹ, ẹkẹvuọvo ọ guọnọ kurhẹriẹ vwo nẹ ọfanrhiẹn* egbe rọyen na-a.
22 Nighere! o rhe che kri-i mi che phio phiyọ ehwa rẹ ọga, me me rha so ukpokpogho rode vwọ kẹ ihwo ri nene gbe igberadja na, jokpanẹ kẹ ayen kurhẹriẹ vwo nẹ iruo rọyen.
23 Me cha vwẹ ọtiekọ* vwo hwe emọ rọyen rere ikoko na eje vwọ riẹn nẹ mẹvwẹ yen ohwo rọ hiẹ iroro rẹ obevun kugbe ubiudu* na, ke me hwosa kẹ ovwan ohwo ọvuọvo kirobo rẹ iruo rẹ ovwan hepha.
24 “‘Ẹkẹvuọvo me ta kẹ ovwan ihwo ri chekọ rehẹ Tayataira, ovwan eje ri nene uyono nana-a, ovwan re riẹn oborẹ ihwo se “erọnvwọn ikokodo rẹ Eshu-u” nẹ: mi che krun oghwa ọfa kẹ ovwa-an.
25 Dedena ovwan yọnrọn oborẹ ovwan vwori na bẹsiẹ me vwọ rhe.
26 Vwọ kẹ ohwo ro phikparobọ ro de ji nene iruo mẹ re toba, me cha vwẹ ogangan kẹ vwẹ enu rẹ ẹgborho na,
27 ọ cha vwẹ ọkpọ rẹ utehru vwo sun ihwo na rere ayen vwọ guọghọ chẹghẹchẹghẹ kerẹ echẹ ra vwẹ ọphiẹn ru, kirobo rẹ Ọsẹ mẹ je kẹ vwẹ ogangan.
28 Ke me cha vwẹ isio rẹ urhiọke na vwọ kẹ.
29 E jẹ ohwo ro vwo erhọ nyo oborẹ ẹwẹn na ta kẹ ikoko na.’
Eta rehẹ obotọ na
^ Urhukpẹ nana pha kerẹ ọkpọ ro vwo eghọn ighwrẹn.
^ Urhukpẹ nana pha kerẹ ọkpọ ro vwo eghọn ighwrẹn.
^ Ni Eta re Vwomaphia.
^ Ni Eta re Vwomaphia.
^ Vwẹ Grik, por·nei′a. Ni Eta re Vwomaphia.
^ Yẹrẹ “okpọga.”
^ Yẹrẹ “ọdavwẹ ri me kodo.” Vwẹ Grik, “ibiehun.”