Ẹvwọphia ri Jọn 8:1-13
8 Ọke ro vwo rhie usiaphrẹ righwrẹn na, asan ejobi da fọ riẹi vwẹ obodjuvwu vwẹ omarẹ ibrẹro ọgban.
2 Me da mrẹ emekashe ighwrẹn na ri mudia obaro rẹ Ọghẹnẹ, a da kẹ ayen ewanre* ighwrẹn.
3 Amakashe ọfa ro mu omoze rẹ oro ra vwọ torhẹ insẹnsi* da rhe, o de mudia asan agbada na, a da ghwẹ insẹnsi* buebun kẹ nẹ ọ torhẹ vwẹ enu rẹ agbada rẹ oro rọhẹ obaro rẹ ekete na vwẹ ọke vuọvo rẹ ihwo efuanfon na vwọ nẹrhovwo na.
4 Ivwirhi rẹ insẹnsi* rẹ amakashe na torhẹ na ko brẹ kpenu vẹ ẹrhovwo rẹ ihwo efuanfon na vwẹ obaro rẹ Ọghẹnẹ.
5 Ẹkẹvuọvo vwẹ ugege yena, amakashe na da reyọ omoze rẹ insẹnsi na, ọ da wan erhanre evo nẹ agbada na vọn evun rọyen, o de do rhe akpọ na. Egbraran da van, mi de nyo urhuru sansan, enu da nyavwaro, otọ de kpogho.
6 Emekashe ighwrẹn ra vwẹ ewanre* ighwrẹn kẹ na da choma rẹ ayen vwo hworo ayen.
7 Ọrẹsosuọ na de hworo owanre* rọyen. Imicho kugbe erhanre vẹ ọbara de ku kugbe, e de do rhe akpọ na; ẹkẹn ọvo rẹ ẹkẹn erha rẹ akpọ na da torhẹ, ẹkẹn ọvo rẹ ẹkẹn erha rẹ irhe na da torhẹ, ẹbe aghwa na eje da je torhẹ.
8 Amakashe rivẹ na de hworo owanre* rọyen. E de do orọnvwọn ọvo rọ họhọ ugbenu rode rọ la phiyọ abadi na. Ẹkẹn ọvo rẹ ẹkẹn erha rẹ abadi na de hirhephiyọ ọbara;
9 ẹkẹn ọvo rẹ ẹkẹn erha rẹ emama ri vwo arhọ* rehẹ evunrẹ abadi na de ghwu, ẹkẹn ọvo rẹ ẹkẹn erha rẹ ekọ na de shu.
10 Amakashe rerha na de hworo owanre* rọyen. Isio rode ọvo rọ la kerẹ urhukpẹ de she nẹ obodjuvwu rhe, o de she teyen ẹkẹn ọvo rẹ ẹkẹn erha rẹ irhie na vẹ igbugbu rẹ ame na.
11 Odẹ rẹ isio na yen Okankọn rọ Yara. Ẹkẹn ọvo rẹ ẹkẹn erha rẹ ame na ke yara korokoro, ame na de hwe ihwo buebun, kidie e ru ayen phiyọ obo re yara.
12 Amakashe rẹne na de hworo owanre* rọyen. A da ghwiẹ ẹkẹn ọvo rẹ ẹkẹn erha rẹ ọnre na kugbe ẹkẹn ọvo rẹ ẹkẹn erha rẹ emeranvwe na kugbe ẹkẹn ọvo rẹ ẹkẹn erha rẹ isio na, rere ẹkẹn ọvo rẹ ẹkẹn erha rayen vwo muebri kugbe rere ẹkẹn ọvo rẹ ẹkẹn erha rẹ ẹdẹ na vwo jẹ elo evwo, ọtiọyen ji te ason na.
13 Me da mrẹ ji nyo ugo ọvo rọ rhan vwẹ uherevie rẹ odjuvwu na, rọ ta vẹ urhuru ọgangan nẹ: “Okpetu rode, okpetu rode, okpetu rode vwọ kẹ ihwo re dia akpọ na fikirẹ edo rẹ ewanre* rẹ emekashe erha ri chekọ na re guọnọ hworo ewanre* rayen na!”
Eta rehẹ obotọ na
^ Yẹrẹ “egban.”
^ Yẹrẹ “ugboduma.”
^ Yẹrẹ “ugboduma.”
^ Yẹrẹ “ugboduma.”
^ Yẹrẹ “egban.”
^ Yẹrẹ “ọgban.”
^ Yẹrẹ “ọgban.”
^ Vwẹ Grik, “emama ri vwo erhi.” Ni Eta re Vwomaphia.
^ Yẹrẹ “ọgban.”
^ Yẹrẹ “ọgban.”
^ Yẹrẹ “egban.”
^ Yẹrẹ “egban.”