Ẹvwọphia ri Jọn 9:1-21
9 Amakashe riyorin na de hworo owanre* rọyen. Me da mrẹ isio ọvo ro she nẹ obodjuvwu rhe akpọ na, a da vwẹ usiaphrẹ rẹ unu rẹ ukpotọ ro jẹ oba evwo na kẹ.
2 O de rhie unu rẹ ukpotọ ro jẹ oba evwo na, ivwirhi de bru nẹ evunrẹ unu na rhe kerẹ ivwirhi rẹ ogidi erhanre, ọnre na de muebri, ọtiọyen ji te odju na, fikirẹ ivwirhi ro nẹ unu na rhe.
3 Ebaka* de nẹ evunrẹ ivwirhi na rhe, ayen da ro akpọ na, a da kẹ ayen ogangan, ogangan ọvuọvo rẹ ekpakpasimagha rẹ akpọ na vwori.
4 A da vuẹ ayen nẹ ayen sua omaẹwan kẹ ẹbe aghwa rẹ akpọ na yẹrẹ ekankọn yẹrẹ urhe vuọvo-o, ẹkẹvuọvo vwọ kẹ ihwo ri jẹ oka rẹ Ọghẹnẹ evwo vwẹ arhare rayen.
5 A rhọnvwe kẹ ebaka* na nẹ ayen hwe aye-en, ẹkẹvuọvo ayen gboja kẹ ayen vwẹ emeranvwe iyorin, odjadja rayen pha kerẹsiẹ rẹ akpakpasimagha da sa ohwo.
6 Vwẹ ọke yena ihwo cha guọnọ ughwu ẹkẹvuọvo ayen cha mrẹ-ẹ, ayen che vwo owenvwe rẹ ayen vwo ghwu ẹkẹvuọvo ughwu cha mrẹ ayen djẹ.
7 Ebaka* na họhọ iyesi ri muegbe vwọ kẹ ofovwin; obo re họhọ erhu rẹ oro hẹ uyovwin rayen, epharo rayen họhọ epharo rẹ ihworakpọ,
8 ẹkẹvuọvo ayen vwo ẹton re họhọ ẹton rẹ eya. Akon rayen họhọ akon rẹ ikpohrokpo,
9 ayen vwo ophapha rẹ udu kerẹ ophapha rẹ udu rẹ utehru, edo rẹ ibekpe rayen họhọ edo rẹ akpẹrẹ rẹ iyesi kpono re họrhọ rua ofovwin.
10 Vwọba, ayen vwo irhurhu rẹ ayen sa vwọ sa ohwo kerẹ ọ rẹ akpakpasimagha, evunrẹ irhurhu rayen yen ogangan rẹ ayen cha vwọ vwẹ oja re ihwo vwẹ emeranvwe iyorin na hepha.
11 Ayen vwo ovie vwẹ enu rayen, amakashe rẹ ukpotọ ro jẹ oba evwo na. Vwẹ Hibru odẹ rọyen Abadọn,* ẹkẹvuọvo vwẹ Grik o vwo odẹ na Apoliọn.*
12 Okpetu rode ọvo wanre. Nighere! Ikpetu ride ivẹ efa cha siẹrẹ erọnvwọn nana da wan nu.
13 Amakashe resan na de hworo owanre* rọyen. Mi de nyo urhuru ọvo ro nẹ idjo rẹ agbada rẹ oro rọhẹ obaro rẹ Ọghẹnẹ rhe
14 rọ ta kẹ amakashe resan ro vwo owanre* na nẹ: “Rhan emekashe ẹne na ra gbare vwẹ asan urhie rode ri Yufretis na.”
15 A da rhan emekashe ẹne na re muegbe rayen phiyotọ vwọ kẹ unọke na, ẹdẹ na, emeranvwe na, kugbe ukpe na, rere ayen hwe ẹkẹn ọvo rẹ ẹkẹn erha rẹ ihwo na.
16 Unu rẹ isodje re gua iyesi na da dia uriorin uje mane uriorin ihwe;* mi nyo unu rayen.
17 Enẹ yen iyesi re me mrẹre vwevunrẹ emramrẹ na kugbe ihwo ri chidia enu rayen hepha: Ayen vwo ophapha rẹ udu ro vwo ikọlọ rọ vwara kerẹ erhanre kugbe ikọlọ rẹ iblu ro muru kugbe ikọlọ rẹ isọfọ-yẹlo, uyovwin rẹ iyesi na pha kerẹ uyovwin rẹ ikpohrokpo, erhanre kugbe ivwirhi kugbe isọfọ* de nẹ unu rayen rhe.
18 Etiekọ erha nana de hwe ẹkẹn ọvo rẹ ẹkẹn erha rẹ ihwo na womarẹ erhanre, ivwirhi, kugbe isọfọ* ri nẹ unu rayen rhe na.
19 Kidie ogangan rẹ iyesi na hẹ evunrẹ unu kugbe urhurhu rayen, kidie urhurhu rayen pha kerẹ ọrọdekọ, o vwo uyovwin, ayen reyọ vwọ sua omaẹwan.
20 Ẹkẹvuọvo ihwo ri chekọ rẹ etiekọ nana hweri-i ji kurhẹriẹ nẹ iruo rẹ abọ raye-en; ayen dobọ rẹ ẹga rẹ ayen vwọ kẹ emekashe rẹ Idẹbono ji-i, ọtiọyen ji te ọ rẹ ayen vwọ kẹ edjọ rẹ oro kugbe idọnọ ọfuanfon kugbe ẹrovwo kugbe ukuta kugbe urhe re sa mrorẹ yẹrẹ nyẹme yẹrẹ ya-an.
21 Ayen ji kurhẹriẹ vwo nẹ ozighẹ-ẹdẹ yẹrẹ uruemu re vwo nene emekashe rẹ Idẹbono ruẹ kuẹgbe yẹrẹ ọfanrhiẹn* egbe yẹrẹ ujiecho raye-en.
Eta rehẹ obotọ na
^ Yẹrẹ “ọgban.”
^ Yẹrẹ “igurube.”
^ Yẹrẹ “igurube.”
^ Yẹrẹ “igurube.”
^ O mudiaphiyọ “Oghwọrọ.”
^ O mudiaphiyọ “Ọrọghwọrọ.”
^ Yẹrẹ “ọgban.”
^ Yẹrẹ “ọgban.”
^ Kọyen, 200,000,000.
^ Ọnana ipọda rọ fobọ frẹ erhanre, ro gbon kpain kpain siẹrẹ a da torhẹ.
^ Ọnana ipọda rọ fobọ frẹ erhanre, ro gbon kpain kpain siẹrẹ a da torhẹ.
^ Vwẹ Grik, por·nei′a. Ni Eta re Vwomaphia.