Ọrẹsosuọ ri Jọn 1:1-10
1 Ohwo rọ herọ nẹ ọtonphiyọ rhe na, rẹ avwanre nyori, rẹ avwanre vwẹ ẹro avwanre mrẹ, rẹ avwanre frẹkotọ ni ji djobọte, rọ ghwa ota rẹ arhọ na rhe,
2 (e, a vwẹ arhọ na phia, avwanre mrẹrẹ ji soseri kpahọn, avwanre vuẹ ovwan kpahen arhọ ri bẹdẹ rọhẹ obọ rẹ Ọsẹ na ra vwọ phia vwọ kẹ avwanre),
3 ohwo yena rẹ avwanre mrẹre ji nyo na, ọyen avwanre vuẹ ovwan kpahan na rere ovwan vẹ avwanre se vwo vwo oyerinkugbe. Avwanre vẹ Ọsẹ na kugbe Ọmọ rọyen Jesu Kristi yen evunrẹ oyerinkugbe nana.
4 Avwanre siẹ erọnvwọn nana rere aghọghọ rẹ avwanre sa vwọ dia vọnvọn.
5 Ọnana yen ovuẹ rẹ avwanre nyo mie, rẹ avwanre ji ghwoghwo kẹ ovwan: Ọghẹnẹ yen urhukpẹ, kaka ebri vuọvo hẹ oma rọye-en.*
6 Avwanre da tanẹ, “Avwanre vẹ Ọghẹnẹ yerẹn kuẹgbe,” jẹ avwanre je yan vwevunrẹ ebri, kọyen avwanre gun efian, jẹ avwanre ruẹ nene uyota na-a.
7 Ẹkẹvuọvo, ọ da dianẹ avwanre yan vwevunrẹ urhukpẹ na kirobo rẹ ọyen komobọ hẹ evunrẹ urhukpẹ na, kọyen avwanre vwo oyerinkugbe vẹ ohwohwo, ọbara ri Jesu rọ dia Ọmọ rọyen ji ru avwanre fon vwo nẹ imwemwu ejobi.
8 Avwanre da tanẹ, “Avwanre ruẹ umwemwu-u,” jẹ avwanre phiẹn oma rẹ avwanre, jẹ uyota na hẹ oma rẹ avwanre-e.
9 Avwanre da fan imwemwu rẹ avwanre, o che vwo ghovwo avwanre ji ru avwanre fon vwo nẹ orukuruku eje, kidie ọyen ohwo rẹ uyota, ọ ke rha je dia ọvwata.
10 Ẹkẹvuọvo avwanre da tanẹ, “Avwanre ji ru umwemwu dẹvo-o,” jẹ avwanre tanẹ Ọghẹnẹ ọvwọrofian, ota rọyen jehẹ oma rẹ avwanre-e.
Eta rehẹ obotọ na
^ Yẹrẹ “vuọvo rhere-e.”