Ọrẹsosuọ ri Jọn 4:1-21
4 Iniọvo eghanghanre, ọ dia kota kota ra tare nẹ o nẹ obọ rẹ Ọghẹnẹ rhe* yen ovwan che segbuyota-a, ẹkẹvuọvo ovwan davwen eta* na ni sẹ obọ rẹ Ọghẹnẹ yen i nurhe, kidie emraro rẹ efian buebun ro evunrẹ akpọ na re.
2 Ọnana yen ovwan vwọ riẹn ota ro nẹ obọ rẹ Ọghẹnẹ rhe: Kota kota rọ rhọnvwere nẹ Jesu Kristi rhere vwọrẹ ugboma, jẹ o nẹ obọ rẹ Ọghẹnẹ rhe.
3 Ẹkẹvuọvo kota kota rọ rhọnvwephiyọ Jesu-u, jẹ o nẹ obọ rẹ Ọghẹnẹ rhe-e. Vwọba, ọnana ota rẹ ohwo rọ vwọsua Kristi na tare, rẹ ovwan nyori nẹ ọ cha na, asaọkiephana ọ hẹ evunrẹ akpọ na re.
4 Imitete, obọ rẹ Ọghẹnẹ yen ovwan nurhe, ovwan ji phi ayen kparobọ re, kidie ohwo rọ vẹ ovwan gbe vwo oyerinkugbe na rho vrẹ ohwo rọ vẹ akpọ na gbe vwo oyerinkugbe.
5 Akpọ na yen ayen nurhe, kọyensorọ ayen vwọ ta eta ri nẹ akpọ na rhe, akpọ na kọ kerhọ rayen.
6 Obọ rẹ Ọghẹnẹ yen avwanre nurhe. Kohwo kohwo rọ riẹn Ọghẹnẹ kerhọ rẹ avwanre; kohwo kohwo ro nẹ obọ rẹ Ọghẹnẹ rhe-e kerhọ rẹ avwanre-e. Womarẹ ọnana yen avwanre vwo phi ofẹnẹ phiyọ eta rẹ uyota ri nẹ obọ rẹ Ọghẹnẹ rhe vẹ eta rẹ efian ri nẹ obọ rẹ Ọghẹnẹ rhe-e.
7 Iniọvo eghanghanre, e jẹ avwanre vwo ẹguọnọ rẹ ohwohwo ọkieje, kidie ẹguọnọ nẹ obọ rẹ Ọghẹnẹ rhe, kohwo kohwo ro vwo ẹguọnọ, jẹ ọmọ rẹ Ọghẹnẹ, ọ je riẹn Ọghẹnẹ.
8 Kohwo kohwo ro vwo ẹguọnọ-ọ jẹ ọ je rhe riẹn Ọghẹnẹ-ẹ, kidie Ọghẹnẹ yen ẹguọnọ.
9 Womarẹ ọnana yen e vwo dje ẹguọnọ rẹ Ọghẹnẹ phia kẹ avwanre, nẹ Ọghẹnẹ ji Ọmọ rọyen ọvuọvo rhe akpọ na rere avwanre sa vwọ wan oma rọyen vwo arhọ.
10 Ọnana yen ẹguọnọ na, ọ dia avwanre yen vwo ẹguọnọ rẹ Ọghẹnẹ-ẹ, ẹkẹvuọvo ọyen vwo ẹguọnọ rẹ avwanre, o de ji Ọmọ rọyen rhe kerẹ izobo rẹ arhuẹrẹ* fikirẹ imwemwu rẹ avwanre.
11 Iniọvo eghanghanre, ọ da dianẹ enẹ yen Ọghẹnẹ vwo ẹguọnọ rẹ avwanre te, kọyen avwanre vwo oghwa re vwo vwo ẹguọnọ rẹ ohwohwo.
12 Ohwo vuọvo je mrẹ Ọghẹnẹ dẹvo-o. Avwanre de vwo ẹguọnọ rẹ ohwohwo ọkieje, kọyen Ọghẹnẹ vẹ avwanre herọ, e ji ru ẹguọnọ rọyen gba vwẹ oma rẹ avwanre.
13 Womarẹ ọnana yen avwanre vwọ riẹn nẹ avwanre vẹ ọyen vwo oyerinkugbe, ọ vẹ avwanre ji vwo oyerinkugbe, kidie ọ kẹ avwanre ẹwẹn rọyen.
14 Vwọba, avwanre komobọ mrẹre ji soseri nẹ Ọsẹ na ji Ọmọ rọyen rhe kerẹ osivwin rẹ akpọ na.
15 Kohwo kohwo rọ rhọnvwere nẹ Jesu Ọmọ rẹ Ọghẹnẹ, Ọghẹnẹ vẹ ohwo yena vwo oyerinkugbe, ohwo na vẹ Ọghẹnẹ ji vwo oyerinkugbe.
16 Avwanre rhe riẹn re, ji vwo imuẹro rẹ ẹguọnọ rẹ Ọghẹnẹ vwo kpahen avwanre,
Ọghẹnẹ yen ẹguọnọ, ohwo rọhẹ evunrẹ ẹguọnọ, jẹ ọ vẹ Ọghẹnẹ vwo oyerinkugbe, Ọghẹnẹ vẹ ohwo na ji vwo oyerinkugbe.
17 Idjerhe nana yen e vwo ru ẹguọnọ gba vwẹ oma rẹ avwanre rere avwanre vwo vwo ugbomọphẹ rẹ ota* vwẹ ẹdẹ rẹ ẹdjọeguo na, kidie kirobo rẹ ohwo yena hepha na, ọtiọyen avwanre je hepha vwẹ akpọ nana.
18 Oshọ hẹ evun rẹ ẹguọnọ-ọ, ẹkẹvuọvo ẹguọnọ ọgbagba djẹ oshọ phia, kidie oshọ dobọ rẹ avwanre jẹ. Vwọrẹ uyota, ohwo rọ djoshọ, jẹ e ji rhi ruo gba vwevunrẹ ẹguọnọ-ọ.
19 Avwanre vwo ẹguọnọ kidie ọyen ke vwo ẹguọnọ rẹ avwanre.
20 Ohwo da tanẹ, “Mi vwo ẹguọnọ rẹ Ọghẹnẹ,” jẹ o vwo utuoma kpahen oniọvo rọyen, ohwo yena ọvwọrofian. Kidie ohwo ro vwo ẹguọnọ rẹ oniọvo rọyen ro rhiẹromrẹ-ẹ che se vwo ẹguọnọ rẹ Ọghẹnẹ rọ je mrẹ dẹvo-o.
21 Ọ vwẹ iji nana kẹ avwanre, nẹ kohwo kohwo ro vwo ẹguọnọ rẹ Ọghẹnẹ, ko ji vwo ẹguọnọ rẹ oniọvo rọyen.
Eta rehẹ obotọ na
^ Vwẹ Grik, “kẹwẹn kẹwẹn.”
^ Vwẹ Grik, “ẹwẹn na.”
^ Yẹrẹ “izobo ra vwọ tan ohwo; izobo re vwo fuẹn ophu.”
^ Yẹrẹ “avwanre vwo fiudugberi ta ota.”