Ọrẹsosuọ re si Rhe Ihwo ri Kọrẹnt 7:1-40
7 Enẹna, vwọ kpahen erọnvwọn rẹ ovwan si rhe vwe na, o che yovwin siẹrẹ ọshare rhe djobọte* aye-e;
2 ẹkẹvuọvo fikirẹ ọfanrhiẹn* rọ vọn asan eje na, e jẹ kọshare kọshare vwo aye robọ rọyen, kaye kaye mi ji vwo ọshare robọ rọyen.
3 E jẹ ọshare vwẹ oborẹ aye rọyen guọnọre* vwọ kẹ, aye na mi ji ru ọtiọyen vwọ kẹ ọshare rọyen.
4 Aye na vwo ogangan vwẹ enu rẹ oma rọye-en, ẹkẹvuọvo ọshare rọyen yen vworo; ọshare na ji vwo ogangan vwẹ enu rẹ oma rọye-en, ẹkẹvuọvo aye rọyen yen vworo.
5 Ovwan sen ovwerhẹn kẹ ohwohwo-o, jokpanẹ kẹ ovwan rhuẹrẹ ọke phiyọ vwọ kẹ, rere ovwan mrẹ ọke vwọ nẹrhovwo, we de ru ọyena nu, ovwan gba rhoma kuomagbe, rere Eshu vwo jẹ ovwan ẹdavwọn fikirẹ jẹ oma ẹriẹn suon rẹ ovwan.
6 Obo re me tare na, ọyen oborẹ ovwan se ru, ẹkẹvuọvo ọ dia urhi-i.
7 Mane kẹ ihwo eje sa dia kerẹ omẹvwẹ. Ẹkẹvuọvo dohwo dokẹ rẹ Ọghẹnẹ vwọ kẹ, kọyensorọ ihwo evo vwọ rọvwọn, efa me rha dia kpoghono.
8 Enẹna me ta kẹ otu rehẹ ẹdia ri jẹrọvwọn* kugbe eyauku na nẹ, o che yovwin siẹrẹ ayen da dia kirobo re me hepha na.
9 Ẹkẹvuọvo ayen rhe se sun oma raye-en, e gbe jẹ ayen rọvwọn kidie o yovwirin rẹ ayen vwọ rọvwọn nẹ ọ rẹ urhurusivwe rẹ ehware de mu ayen rọ.
10 Me vwẹ iji kẹ ihwo re rọvwọn re, ọ dia omẹvwẹ-ẹ ẹkẹvuọvo Ọrovwori na, nẹ aye hẹrioma vwo nẹ ọshare rọye-en.
11 Ẹkẹvuọvo ọ da hẹrioma, e jẹ ọ rọvwọ-ọn, jẹ ọ rha sa dia ọtiọye-en, ọ vẹ ọshare rọyen gba rhuẹrẹ kugbe. E jẹ ọshare yanjẹ aye rọyen vwo-o.
12 Ẹkẹvuọvo me ta kẹ ihwo efa, e, mẹvwẹ, ọ dia Ọrovwori na-a: Oniọvo de vwo aye rọ dia Onenikristi-i, jẹ aye na rhọnvwere nẹ ọyen nene dia, e jẹ ọ yan jovwo-o;
13 ọ da je dianẹ aye vwo ọshare rọ dia Onenikristi-i, jẹ ọshare na rhọnvwere nẹ ọyen nene dia, e jẹ ọ yanjẹ ọshare na vwo-o.
14 Kidie e ru ọshare rọ dia Onenikristi-i na fon fikirẹ aye rọyen, e ji ru aye rọ dia Onenikristi-i na fon fikirẹ ọshare rọyen; ọ rha dia ọtiọye-en, emọ rẹ ovwan ke dia ẹdia ri jẹfuọn, jẹ asaọkiephana ayen fonro.
15 Ẹkẹvuọvo, ọ rọ dia Onenikristi na-a da tanẹ ọyen cha hẹrioma, e jẹ ọ hẹrioma; vwẹ ẹdia ọtiọyena, o vwo urhi vuọvo rọ yọnrọn oniọvo ọshare yẹrẹ oniọvo aye na-a, ẹkẹvuọvo Ọghẹnẹ se ovwan rhe ufuoma.
16 Aye, wọ riẹnre sẹ wo che sivwin ọshare wẹn? Yẹrẹ, ọshare, wọ riẹnre sẹ wo che sivwin aye wẹn?
17 Dedena vwẹ kẹdia kẹdia ri Jihova* vwẹ uphẹn kẹ ohwo ọvuọvo nẹ ọ dia tavwen o ki se, e jẹ o yeren akpọ nene ọtiọyen. Ọtiọyena, me vwẹ odjekẹ nana phia vwẹ ikoko na eje.
18 O vwo ohwo rọ yanvwe nu e ki se? E jẹ o rhivwin kpo ẹdia ri jẹyanvwọ-ọ. O vwo ohwo rọ je rhe yanvwe-e ọke re vwo se? E jẹ ọ yanvwa-a.
19 Oyanvwe fiemu-u, jẹyanvwọ ji fiemu-u; obo ri fiemu yen ẹyọnrọn rẹ iji rẹ Ọghẹnẹ.
20 E jẹ kohwo kohwo dia ẹdia rọ hepha ọke re vwo se.
21 Wẹwẹ ọviẹn ọke re vwo se we? Wo jẹ ọyena kpokpo uwe ẹwẹ-ẹn; ẹkẹvuọvo uphẹn wọ vwọ dia ọmuvwiẹ de rhiephiyọ, rhiabọreyọ.
22 Kidie kohwo kohwo rọ dia ọviẹn ọke re vwo se nẹ ọ rhe dia odibo rẹ Ọrovwori na, ọyen ohwo rẹ Ọrovwori na siobọnu, ọtiọyen kohwo kohwo rọhẹ ẹdia rẹ ọmuvwiẹ ọke re vwo se, je dia ọviẹn ri Kristi.
23 O vwo uchunu ra dẹ ovwan; ọtiọyena, ovwan rha vwẹ oma ruẹ eviẹn vwọ kẹ ihworakpọ-ọ.
24 Iniọvo, e jẹ kohwo kohwo dia ẹdia rọ hepha vwẹ obaro rẹ Ọghẹnẹ ọke re vwo se.
25 Vwọ kpahen emetobẹ,* Ọrovwori na kẹ vwẹ iji vuọvo-o, ẹkẹvuọvo me vwẹ iroro romobọ mẹ vwọ phia, kidie Ọrovwori na gbe arodọnvwẹ kẹ vwẹ rere me vwọ dia ohwo ra sa vwẹroso.
26 Ọtiọyena, mi rorori nẹ obo ri me yovwin yen ọshare vwọ dia kirobo rọ hepha na, fikirẹ ebẹnbẹn re herọ asaọkiephana.
27 Wo vwo aye? Wọ guọnọ idjerhe wo vwo siobọno-o. Wẹwẹ ọshare ro jẹ aye evwo? Wọ guọnọ aye-e.
28 Jẹ wọ da tobọ rọvwọn dede, wo ru umwemwu-u. Ọmọtobẹ* da je rọvwọn, o ru umwemwu-u. Ẹkẹvuọvo, ihwo ri ru ọtiọyen che vwo ukpokpogho vwẹ ugboma rayen.* Jẹ me guọnọre nẹ enana te ovwan oma-a.
29 Vwọba, iniọvo, mi jẹ ovwan riẹn nẹ ọke ro chekọ na rhe gro-on. Vwo nẹ ọke nana yanran, e gbe jẹ otu ri vwo eya ru kerẹsiẹ ra da mrẹ nẹ ayen vwori-i,
30 otu re viẹ kerẹsiẹ ra da mrẹ nẹ ayen viẹ-ẹ, otu re ghọghọ kerẹsiẹ ra da mrẹ nẹ ayen ghọghọ-ọ, otu re dẹ kerẹsiẹ ra da mrẹ nẹ ayen vwori-i,
31 otu re reyọ akpọ na vwo ruiruo ru kerẹ ihwo re reyọ vwo ruiruo vọnvọ-ọn; kidie akpọ na rẹ avwanre mrẹ na wene.
32 Vwọrẹ uyota, me guọnọre nẹ ovwan ro ẹnwa-an. Ọshare rọhẹ ẹdia ri jẹrọvwọn, ro ẹnwan kpahan erọnvwọn rẹ Ọrovwori na, kidie ọ guọnọre nẹ oma vwerhen Ọrovwori na.
33 Ẹkẹvuọvo, ọshare rọ rọvwọn re ro ẹnwan kpahan erọnvwọn rẹ akpọ na, kidie ọ guọnọre nẹ oma vwerhen aye rọyen,
34 ọtiọyena, ẹwẹn rọyen ghare. Vwọba, aye rọhẹ ẹdia ri jẹrọvwọn kugbe ọmọtobẹ ro ẹnwan kpahan erọnvwọn rẹ Ọrovwori na rere ayen sa vwọ fon vwẹ ugboma vẹ iroro rayen. Ẹkẹvuọvo aye rọ rọvwọn re, ro ẹnwan kpahan erọnvwọn rẹ akpọ na, kidie ọ guọnọre nẹ oma vwerhen ọshare rọyen.
35 Ẹkẹvuọvo, me ta ọnana fikirẹ erere rẹ ovwan, ọ dia ọ rẹ mi vwo gbere ughwru* kẹ ovwa-an, ẹkẹvuọvo mi vwo mu ovwan vwo ru obo ri shephiyọ, je vwomakpahotọ kẹ ẹga rẹ Ọrovwori na ọkieje ababọ rẹ obo ri se mu ẹwẹn rẹ ovwan reyọ.
36 Ọ da dianẹ ohwo rọhẹ ẹdia ri jẹrọvwọn rorori nẹ ọyen se suẹn urhurusivwe rẹ ehware rọye-en, jẹ o tedje re, ọnana yen obo ro che ru: E jẹ o ru obo rọ guọnọre; o ru umwemwu-u. E jẹ ayen rọvwọn.
37 Ẹkẹvuọvo, ọ da dianẹ ohwo ọvo brorhiẹn vwevunrẹ ubiudu rọyen je yọnrọn orhiẹn na kokoroko, o de ji roro nẹ o vwo oboresorọ rẹ ọyen vwọ rọvwọ-ọn, o ji vwo ogangan ro vwo sun urhurusivwe rọyen, jẹ ọ riẹn ru.
38 Ọtiọyen ohwo rọ rọvwọnre je riẹn ru, ẹkẹvuọvo ohwo rọ rọvwọnre-e kọyen cha ma riẹn ru.
39 Aye hẹ otọ rẹ ọshare rọyen vwẹ uchọke rẹ ọshare na vwọ hẹ akpọ. Ẹkẹvuọvo, ọshare na da vwerhẹn vwọrẹ ughwu, aye na vwo ugbomọphẹ rọ vwọ rọvwọn ohwo ro je re, takpe nẹ evunrẹ Ọrovwori na ọvo.
40 Ẹkẹvuọvo, mi no nẹ ọ da dia obo rọ hepha na yen oma da cha ma vwerhọn; mi vwo imuẹro dẹn nẹ mi ji vwo ẹwẹn rẹ Ọghẹnẹ.
Eta rehẹ obotọ na
^ Kọyen, ọshare nene aye vwerhẹ-ẹn.
^ Vwẹ Grik, por·nei′a. Ni Eta re Vwomaphia.
^ Ọnana shekpahen ovwerhẹn rẹ aye gbe ọshare.
^ Ota ri Grik ra fan phiyọ otu rehẹ ẹdia ri jẹrọvwọn na ji se shekpahen eyauku, ihwo re hẹrioma yẹrẹ ihwo re fan orọnvwe.
^ Ni Eta re Vwomaphia.
^ Ota ri Grik ra fan phiyọ emetobẹ na se shekpahen eya vẹ eshare.
^ Ota ri Grik ra fan phiyọ ọmọtobẹ na se shekpahen eya vẹ eshare.
^ Vwẹ Grik, “Vwo ukpokpogho vwẹ uvwo rayen.”
^ Vwẹ Grik, “ọ dia ọ re me vwọ kpahen ufi.”