Ọrẹsosuọ re si Rhe Ihwo ri Tẹsalonaika 1:1-10
1 Pọl, Silvanọs* kugbe Timoti, vwo rhe ukoko rẹ ihwo ri Tẹsalonaika re vẹ Ọghẹnẹ rọ dia Ọsẹ na kugbe Ọrovwori na Jesu Kristi gba herọ:
E jẹ ẹse re muwan rọye-en kugbe ufuoma nene ovwan dia.
2 Ọkieje yen avwanre vwọ kpẹvwẹ Ọghẹnẹ ọke rẹ avwanre de djunute ovwan vwẹ ẹrhovwo rẹ avwanre,
3 kidie kọke kọke yen avwanre vwọ karophiyọ iruo rẹ ovwan vwẹ esegbuyota vẹ ẹguọnọ vwo ru, kugbe akoechiro rẹ ovwan fikirẹ iphiẹrophiyọ rẹ ovwan vwo kpahen Ọrovwavwanre Jesu Kristi vwẹ obaro rẹ Ọghẹnẹ kugbe Ọsẹ rẹ avwanre.
4 Iniọvo rẹ Ọghẹnẹ vwo ẹguọnọ kpahen, avwanre riẹn kpahen ẹsanọ rọ sane ovwan,
5 kidie ọ dia womarẹ ota rẹ unu ọvo yen avwanre vwo ghwoghwo iyẹnrẹn esiri na kẹ ovwa-an, ẹkẹvuọvo avwanre ji ru ọtiọyen womarẹ ẹgba kugbe ẹwẹn ọfuanfon kugbe imuẹro ọgangan, kirobo rẹ ovwan riẹn oka rẹ ihwo rẹ avwanre rhe dia vwẹ ohri rẹ ovwan fikirẹ erhuvwu rẹ ovwan.
6 Ovwan da rhe dia ihwo re vwẹrokere avwanre kugbe Ọrovwori na, kidie ovwan rhiabọreyọ ota na vẹ aghọghọ rẹ ẹwẹn ọfuanfon vwẹ ọke rẹ ukpokpogho ọgangan,
7 ovwan da rhe dia udje vwọ kẹ Inenikristi eje rehẹ Masidonia kugbe Akaya.
8 Vwọrẹ uyota, ọ dianẹ ovwan di ghwoghwo ota ri Jihova* vwẹ Masidonia kugbe Akaya ọvo-o, ẹkẹvuọvo esegbuyota rẹ ovwan vwo kpahen Ọghẹnẹ kperusi nene asan ejobi te ẹdia rẹ avwanre rhe vwo ota vuọvo rẹ avwanre cha ta-a.
9 Kidie ọkieje yen ayen komobọ vwo gbikun rẹ oborẹ avwanre vwọ mrẹ ovwan vwẹ ẹsosuọ, kugbe oborẹ ovwan yanjẹ edjọẹgọ vwo, ovwan de bru Ọghẹnẹ rhe, rere ovwan vwọ dia eviẹn kẹ Ọghẹnẹ rẹ uyota ro jeghwo na,
10 ovwan je vwọ hẹrhẹ Ọmọ rọyen ro nẹ obodjuvwu rhe, rọ kpare vrẹn nẹ ughwu, kọyen Jesu ro sivwin avwanre vwo nẹ ophu rọ cha na.