Ọrẹsosuọ re si Rhe Ihwo ri Tẹsalonaika 3:1-13
3 Ọtiọyena ọke rẹ avwanre rhe se chiro ọfa-a, avwanre de no nẹ obo ri me yovwin ọyen ọ rẹ avwanre ọvo vwọ daji Atẹns;
2 avwanre de ji Timoti oniọvo rẹ avwanre kugbe odibo rẹ Ọghẹnẹ,* ro ghwoghwo iyẹnrẹn esiri ro shekpahen Kristi na, nẹ ọ rhe bọn ovwan gan* ji bru ovwan uche kpahen esegbuyota rẹ ovwan,
3 rere ukpokpogho nana eje vwo jẹ ohwo ọvuọvo ekpogho.* Kidie ovwan komobọ riẹnre nẹ avwanre cha sa kẹnoma kẹ ojaẹriọ rẹ erọnvwọn tiọyena-a.*
4 Kidie ọke rẹ avwanre vẹ ovwan vwọ herọ, ọkieje yen avwanre vwọ vuẹ ovwan nẹ a cha rioja rẹ ukpokpogho, ọyena yen obo re phiare na kirobo rẹ ovwan riẹnre.
5 Kọyensorọ ọke mi rhe se chiro ọfa-a, mi de ji ohwo rhe, rhe riẹn kpahen esegbuyota rẹ ovwan, sẹ vwẹ idjerhe evo Idẹbono* davwen ovwan ni re, kugbe sẹ iruo rẹ avwanre ruru vwẹ ohri rẹ ovwan hirhephiyọ ofefe.
6 Ẹkẹvuọvo Timoti ghwe nẹ obo rẹ ovwan bru avwanre rhe na, o gbikun esiri kẹ avwanre kpahen esegbuyota kugbe ẹguọnọ rẹ ovwan, nẹ ọkieje yen ovwan vwọ karophiyọ avwanre vwọrẹ ẹguọnọ, kugbe nẹ urhuru rẹ avwanre siẹ ovwan kirobo rẹ urhuru rẹ ovwan ji siẹ avwanre.
7 Iniọvo, kọyensorọ vwevunrẹ ojaẹriọ* vẹ ukpokpogho rẹ avwanre eje, avwanre mrẹ uduephiophiyawọ fikirẹ ovwan kugbe esegbuyota rẹ ovwan djephia.
8 Kidie emudiagan rẹ ovwan vwevunrẹ Ọrovwori na rhoma rhi phi ẹgba phiyọ avwanre oma.*
9 Mavọ yen avwanre sa vwọ kpẹvwẹ Ọghẹnẹ fikirẹ aghọghọ rode rẹ ovwan nẹrhẹ avwanre vwo vwẹ obaro rọyen fikirẹ ovwan?
10 Te ason te uvo yen avwanre vwọ rẹ gangan rere avwanre sa vwọ mrẹ ovwan,* je vwẹ obo re cha bọn esegbuyota rẹ ovwan ganphiyọ vwọ kẹ ovwan.
11 Asaọkiephana, e jẹ Ọghẹnẹ rọ dia Ọsẹ rẹ avwanre kugbe Ọrovwavwanre Jesu, rhie idjerhe phiyọ rẹ avwanre vwo bru ovwan rhe.
12 Vwọba, e jẹ Ọrovwori na ru ẹguọnọ rẹ ovwan vwo kpahen ohwohwo kugbe ihwo efa ganphiyọ kirobo rẹ avwanre ji vwo ẹguọnọ rẹ ovwan na,
13 rere o se vwo ru ubiudu rẹ ovwan gan, ovwan vwo jẹ ekan evwo vwevunrẹ ẹfuọn vwẹ obaro rẹ Ọghẹnẹ kugbe Ọsẹ rẹ avwanre, vwẹ ọke rẹ ọrhire* rẹ Ọrovwavwanre Jesu vẹ ihwo efuanfon rọyen eje.
Eta rehẹ obotọ na
^ Yẹrẹ ọ sa dia, “ohwo rọ vẹ Ọghẹnẹ gba wian kuẹgbe.”
^ Yẹrẹ “phiuduphiyọ ovwan awọ.”
^ Vwẹ Grik, “eyeghe.”
^ Yẹrẹ “ra vwẹ fiki rọyen vwẹ avwanre vwo mu na-a.”
^ Vwẹ Grik, “Ọ rọ davwan ihwo nẹ na.”
^ Vwẹ Grik, “ọkanrovwẹ.”
^ Vwẹ Grik, “nẹrhẹ avwanre dia akpọ.”
^ Vwẹ Grik, “mrẹ opharo rẹ ovwan.”
^ Ni Eta re Vwomaphia.