Ọrẹsosuọ re si Rhe Ihwo ri Tẹsalonaika 4:1-18
4 Ọ rọ koba, iniọvo, kirobo rẹ avwanre vwẹ odjekẹ kẹ ovwan vwọ kpahen obo ro fori nẹ ovwan yan rere oma vwọ vwerhen Ọghẹnẹ, vwọrẹ uyota, ovwan ghene yan ọtiọyen, avwanre bru ovwan uche je rẹ ovwan womarẹ Ọrovwori na Jesu, nẹ ovwan rhe ruẹ ọtiọyen vọnvọn.
2 Kidie ovwan riẹn odjekẹ* rẹ avwanre vwọ kẹ ovwan womarẹ Ọrovwori na Jesu.
3 Ọnana yen ọhọre rẹ Ọghẹnẹ, nẹ ovwan dia fuanfon je kẹnoma kẹ ọfanrhiẹn.*
4 E jẹ ovwan ohwo ọvuọvo riẹn obo ro sun oma* rọyen wan vwẹ ofuanfon kugbe ọghọ,
5 ọ dia ọ rẹ urhurusivwe rẹ ehware re je suo-on, kerẹ ọ rẹ ihwo rẹ ẹgborho na re riẹn Ọghẹnẹ-ẹ na.
6 E jẹ ohwo vuọvo shariẹ ughwru yẹrẹ wan oniọvo rọyen oma vwẹ ota nana-a, kidie Jihova* cha vwẹ oja re ihwo ri ruẹ erọnvwọn nana, kirobo rẹ avwanre vuẹ ovwan jovwo, rẹ avwanre ji si ovwan orhọ gangan kpahen.
7 Kidie ọ dia fikirẹ jẹfuọn yen Ọghẹnẹ vwo se avwanre-e, ẹkẹvuọvo fikirẹ ofuanfon.
8 Ọtiọyena, ohwo rọ jẹ ọnana fia, ọ dia ohworakpọ yen ọ jẹfia-a, ẹkẹvuọvo Ọghẹnẹ rọ kẹ ovwan ẹwẹn ọfuanfon rọyen.
9 Ẹkẹvuọvo, vwọ kpahen ẹguọnọ rẹ iniọvo, o rhe fo nẹ avwanre si rhe ovwa-an, kidie Ọghẹnẹ yono ovwan obo re vwo ẹguọnọ rẹ ohwohwo nure.
10 Vwọrẹ uyota, ovwan ruẹ ọtiọyen vwọ kẹ iniọvo na eje rehẹ Masidonia. Ẹkẹvuọvo, avwanre jiriro kẹ ovwan iniọvo, nẹ ovwan rhe ruẹ ọtiọyen vọnvọn.
11 Ovwan davwẹngba gangan vwo yerin dẹndẹn, ovwan duvwun unu phiyọ eta rẹ ihwo efa-a, ovwan vwẹ abọ rẹ ovwan vwo ruiruo kirobo rẹ avwanre yono ovwan,
12 rere ovwan sa vwọ yan vwẹ idjerhe ro shephiyọ vwẹ ẹro rẹ ihwo rehẹ obotafe, emu vuọvo vwo jẹ ovwan ẹkanrọn.
13 Vwọba, iniọvo, avwanre guọnọre nẹ ovwan dia igbori vwọ kpahen ihwo re vwerhẹn vwọrẹ ughwu-u, rere ovwan vwo jẹ oma evwerhe kirobo rẹ ihwo ri vwo iphiẹrophiyọ-ọ ruẹ.
14 Kidie avwanre de vwo esegbuyota nẹ Jesu ghwuru o de ji vrẹn, ọtiọyen Ọghẹnẹ je cha womarẹ Jesu kpare ihwo re vwerhẹn vwọrẹ ughwu vrẹn rere ayen vẹ ọyen* sa vwọ dia.
15 Kidie ọnana yen oborẹ avwanre vuẹ ovwan womarẹ ota ri Jihova,* nẹ o vwo ọke vuọvo rẹ avwanre ri yerin te ọke rẹ ọrhire* rẹ Ọrovwori na cha vwọ ka obaro kẹ otu re vwerhẹn vwọrẹ ughwu-u;
16 kidie Ọrovwori na komobọ che wontọ nẹ odjuvwu rhe, ko che kperi gangan vẹ upho rẹ onotu rẹ emekashe, vẹ owanre rẹ Ọghẹnẹ, otu ri ghwuru vwevunrẹ Kristi keyen ri che ke vrẹn.
17 Ọyena da wan nu, ke che mu avwanre re herọ yerẹn na vẹ ayen vwo kpo evwru na, ra vwa Ọrovwori na vwevunrẹ ophephe na, avwanre vẹ Ọrovwori na ke cha dia kugbe ọkieje.
18 Ọtiọyena ovwan rha vwẹ eta nana vwo brẹ ohwohwo uche.
Eta rehẹ obotọ na
^ Yẹrẹ “iji.”
^ Vwẹ Grik, por·nei′a. Ni Eta re Vwomaphia.
^ Vwẹ Grik, “ochẹ.”
^ Ni Eta re Vwomaphia.
^ Kọyen, Jesu.
^ Ni Eta re Vwomaphia.
^ Ni Eta re Vwomaphia.