Ọrẹsosuọ ri Pita 4:1-19
4 Ọ vwọ dianẹ Kristi rioja vwẹ ugboma na, ovwan komobọ gbe vwo oka rẹ iroro vuọvo yena kidie ohwo rọ rioja vwẹ ugboma, jẹ o siobọnu umwemwu re,
2 rere o vwo yerin akpọ rọyen ro chekọ vwẹ ugboma na vwo ru ọhọre rẹ Ọghẹnẹ, ọ dia ojevwe rẹ ihworakpọ ọfa-a.
3 Kidie ọke rọ wanre na te kẹ ovwan rẹ ovwan vwo ru ọhọre rẹ ẹgborho na, ọke rẹ ovwan vwo vwobọ vwẹ iruemu ra ghẹmrẹ,* vwo urhurusivwe re vwo ru obo re brare, siọgba rẹ idi, vwobọ vwẹ idiẹda vroma, akpọẹriọ re de ruẹ obo ri je ohwo, kugbe edjọẹgọ.*
4 Ọ vwọ dianẹ ovwan rhe nene ayen vwobọ vwẹ erharhe iruemu nana rẹ ayen ruẹ na-a, ko gbe ayen unu, ọtiọyena kẹ ayen hanrhe ovwan.
5 Ẹkẹvuọvo, ihwo nana cha niyẹnrẹn kẹ ohwo ro che guẹdjọ rẹ ihwo ri yerẹn kugbe i ri ghwuru.
6 Vwọrẹ uyota, ọnana yen sorọ e ji vwo ghwoghwo iyẹnrẹn esiri na vwọ kẹ ihwo ri ghwuru, rere dede nẹ a vwẹ ayen guẹdjọ vwẹ ugboma na kirobo rẹ ihworakpọ ruẹ, kẹ ayen se yeren akpọ nene ẹwẹn na vwẹ ẹro rẹ Ọghẹnẹ.
7 Ẹkẹvuọvo, oba rẹ emu na eje sikẹre re, ọtiọyena ovwan gbe vwo ọhọ, ovwan rhẹrẹ* je nẹrhovwo ọkieje.
8 Ọ rọ ma rho, ovwan vwo ẹguọnọ okokodo kpahen ohwohwo kidie ẹguọnọ rhurhu imwemwu buebun.
9 Ovwan dede ohwohwo sasasa, we brenu-u.
10 Kirobo ra vwẹ okẹ kẹ ovwan ohwo ọvuọvo bun te, ovwan reyọ vwo gbodibo kẹ ohwohwo, kerẹ omamọ idibo re mrẹ ẹse rẹ Ọghẹnẹ re muwan rọye-en re djephia vwẹ idjerhe sansan.
11 Ohwo rọ ta ota, e jẹ ọ ta ota ro nẹ obọ rẹ Ọghẹnẹ rhe; ohwo ro gbodibo, e jẹ ọ vwẹroso ẹgba rẹ Ọghẹnẹ siobọnẹ kẹ ohwo; rere a sa vwọ vwẹ urinrin vwọ kẹ Ọghẹnẹ vwẹ kemu kemu ejobi womarẹ Jesu Kristi. Urinrin kugbe ẹgba erọyen rhirin bẹdi bẹdẹ. Isẹ.
12 Iniọvo eghanghanre, we jẹ edavwini re họhọ erhanre rẹ ovwan hirharokuẹ na gbe ovwan unu kerẹsiẹ ra da mrẹ nẹ emu ọrhorha yen phia kẹ ovwan na-a.
13 Ukperẹ ọtiọyen, ovwan rha ghọghọ fikirẹ ẹkẹn ro te ovwan vwẹ ojaẹriọ ri Kristi na, rere ovwan je sa vwọ ghọghọ, oma me je vwerhen ovwan gangan vwẹ ọke rẹ ẹvwọphia rẹ urinrin rọyen.
14 A da vwẹ ovwan jehwẹ* fikirẹ odẹ ri Kristi, jẹ oma vwerhen ovwan, kidie ẹwẹn rẹ urinrin, kọyen ẹwẹn rẹ Ọghẹnẹ vẹ ovwan herọ.
15 Ẹkẹvuọvo, e jẹ ohwo vuọvo rioja kerẹ ozighẹ yẹrẹ oji yẹrẹ orumwemwu yẹrẹ ohwo ro gbugbon rẹ eta rẹ ihwo efa-a.
16 Jẹ, ọ da dianẹ ohwo rioja kerẹ Onenikristi, e jẹ oma vuọ-ọ, ẹkẹvuọvo, e jẹ ọ rha vwẹ urinrin kẹ Ọghẹnẹ womarẹ obo ro yerẹn wan kerẹ Onenikristi.
17 Kidie ọnana yen ọke ra rhuẹrẹphiyọ nẹ ẹdjọeguo na vwọ tonphiyọ vwẹ uwevwin rẹ Ọghẹnẹ. Ọ da vwẹ avwanre vwọ tonphiyọ, kẹ mavọ yen ọ cha dia vwọ kẹ ihwo re kerhọ rẹ iyẹnrẹn esiri rẹ Ọghẹnẹ na-a?
18 “Ọ da dianẹ ugbogangan yen e che vwo sivwin ọvwata, kẹ die yen cha phia kẹ ohwo rọ djoshọ rẹ Ọghẹnẹ-ẹ kugbe orumwemwu?”
19 Ọtiọyena, e jẹ ihwo re rioja kidie nẹ ayen ruẹ ọhọre rẹ Ọghẹnẹ, phi oma rayen phiyọ obọ rẹ Ọmemama rọ fuevun na, ayen mi ji rhe ruẹ erhuvwu.
Eta rehẹ obotọ na
^ Yẹrẹ “iruemu rẹ omavovwẹ kanre.” Vwẹ Grik, a·sel′gei·a, siẹrẹ a da reyọ vwọ ta ota kpahen orọnvwọn rọ vrẹ ọvo. Ni Eta re Vwomaphia.
^ Yẹrẹ “ogbegbe gọ rẹ edjọ.”
^ Yẹrẹ “nomaso.”
^ Yẹrẹ “A da hanrhe ovwan.”