Ọrẹsosuọ re si Rhe Timoti 3:1-16
3 A sa vwẹroso ota nana: Ọ da dianẹ ohwo ọvo davwẹngba rọ vwọ dia oniruo, jẹ iruo esiri yen ọ guọnọ ru.
2 Ọtiọyena ofori nẹ oniruo dia ohwo ro vwo eka-an, ọshare ro vwo aye ọvo, ro ruẹ emu vrẹka-a, ro vwo iroro ro fiotọ,* ro nene ọrhuẹrẹphiyotọ, rọ ghọ erhorha, ro muwan ro vwo yono,
3 ọ dia ọgbaudi-i, ọ dia ohwo ro gbe ozighi-i,* ẹkẹvuọvo ohwo rọ nuẹ,* ọ dia ohwo rẹ ẹghwọ-ọ, ọ dia ohwo ro vwo ẹguọnọ rẹ igho-o,
4 ọ me dia ọshare rọ nabọ vwẹrote* evwruwevwin rọyen vwẹ idjerhe ro shephiyọ, ro vwo emọ re vwomakpotọ, ri ji nyẹme
5 (kidie ọ da dianẹ ohwo riẹn obo rọ vwẹrote* evwruwevwin rọye-en, kẹ mavọ yen ọ sa vwọ vwẹrote ukoko rẹ Ọghẹnẹ?),
6 ọ dia ohwo ro kurhẹriẹ obọ-ọ, kidie ọ sa rhe kparoma, o mi rhi shero oka rẹ ẹdjọeguo ro te Idẹbono oma na.
7 Vwọba, e jẹ ihwo rẹ obotafe je ta omamọ rẹ ota kpahọn* rere o vwo je shephiyọ ophọphọvwe kugbe ufi rẹ Idẹbono.
8 Vwẹ idjerhe vuọvo na, e jẹ idibo rowian dia ihwo ri se emu gboja, ri vwo ẹrẹnvwe ivẹ-ẹ,* re da idi gan nọ-ọ, ri vwo urhuru rẹ erere rẹ ọghware-e,
9 ihwo re yọnrọn odjahọn ọfuanfon rẹ esegbuyota na vẹ ẹwẹn obrorhiẹn rọ fonro.
10 Vwọba, e jẹ a davwen ayen ni tavwen sẹ ayen muwan; e de ru ọyena nu, e gbe jẹ ayen ga kerẹ idibo, rọ vwọ dianẹ ayen vrabọ rẹ ekan na.
11 Vwẹ idjerhe vuọvo na, e jẹ eya dia ihwo ri se emu gboja, ri miovwo ihwo efa-a, ri ruẹ emu vrẹka-a, re fuevun vwẹ erọnvwọn eje.
12 E jẹ odibo rẹ owian dia ọshare ro vwo aye ọvo, rọ nabọ vwẹrote emọ kugbe evwruwevwin rọyen vwẹ idjerhe ro shephiyọ.
13 Kidie eshare ri gbodibo vwẹ idjerhe ro shephiyọ na vwo omamọ emudia kugbe uvi rẹ ugbomọphẹ rẹ ota vwọ kpahen esegbuyota rayen vwẹ Kristi Jesu.
14 Mi siẹ erọnvwọn nana rhe we, dede nẹ mi rhẹro rọyen nẹ mi che bru we rhe kẹrẹkpẹ,
15 ẹkẹvuọvo, ọ da dianẹ me fobọ rhe-e, rere wọ vwọ riẹn obo ro fori nẹ wọ ghwa oma wẹn wan vwevunrẹ evwruwevwin rẹ Ọghẹnẹ, rọ dia ukoko rẹ Ọghẹnẹ ro jeghwo na, uchivwo kugbe obicha vwọ kẹ uyota na.
16 Vwọrẹ uyota, odjahọn ọfuanfon rẹ omaẹvwọkpahotọ kẹ Ọghẹnẹ na rhoro mamọ: ‘A vwerọ phia vwọrẹ ugboma, e ghwoghwiro nẹ ọvwata vwọrẹ ẹwẹn, ọ vwomaphia kẹ emekashe, e ghwoghwiro vwẹ ohri rẹ ẹgborho na, e sere gbuyota vwẹ akpọ na, e rhiabọreyọ vwẹ obodjuvwu vwọrẹ urinrin.’
Eta rehẹ obotọ na
^ Yẹrẹ “iroro abavo.”
^ Yẹrẹ “rọ ghwiẹ ihwo-o.”
^ Yẹrẹ “ohwo ro roro emu fiotọ.”
^ Yẹrẹ “suẹn.”
^ Yẹrẹ “ro sun.”
^ Yẹrẹ “e jẹ ọ dia ohwo ro vwo omamọ uruemu vwẹ ẹro rẹ ihwo rẹ obotafe.”
^ Yẹrẹ “re ta eta rẹ ophiẹnvwe-e.”