Ọrẹsosuọ re si Rhe Timoti 4:1-16
4 Ẹkẹvuọvo, ota ro nẹ obọ rẹ Ọghẹnẹ rhe* tarọ phephẹn nẹ vwẹ ọke rọ cha vwẹ obaro, ihwo evo che she nẹ esegbuyota na, rẹ ayen cha vwọ kerhọ rẹ eta rẹ ophiẹnvwe ri nẹ obọ rẹ ẹwẹn umwemwu* rhe, kugbe iyono rẹ emekashe rẹ Idẹbono,
2 womarẹ omeru rẹ ihwo ri guẹn efian, rẹ ẹwẹn obrorhiẹn rayen ghwuru timẹ kerẹsiẹ ra da mrẹ nẹ a vwẹ ogba* rọ tuabọ gidigidi vwo bru oka phiyọ.
3 Ayen gha orọnvwe ji jurhi kẹ ihwo nẹ ayen kẹnoma kẹ emuọre rẹ Ọghẹnẹ ma vwọ kẹ ihwo ri vwo esegbuyota kugbe erianriẹn ọgbagba rẹ uyota na nẹ ayen re vẹ akpẹvwẹ.
4 Kidie erọnvwọn eje rẹ Ọghẹnẹ mare yovwirin, ofori nẹ a sen ọvuọvo-o siẹrẹ e de rhiabọreyọ vẹ akpẹvwẹ,
5 kidie e ruro fon womarẹ ota rẹ Ọghẹnẹ kugbe ẹrhovwo ra nẹ phiyọ.
6 Wọ da vwẹ uchebro nana vwọ kẹ iniọvo na, wọ cha dia omamọ rẹ odibo ri Kristi Jesu, ra nabọ vwẹ ota rẹ esegbuyota na kugbe omamọ rẹ uyono ru wo neneri kpẹkpẹkpẹ na vwọ ghẹre.
7 Ẹkẹvuọvo sen ikuegbe rẹ efian ri dje ọghọ phia kẹ Ọghẹnẹ-ẹ, kerẹ oka rẹ eya re ghwore gbe, ukperẹ ọyena, yono oma wẹn vẹ ẹwẹn ru wo vwo dje omaẹvwọkpahotọ wẹn kẹ Ọghẹnẹ phia.
8 Omaẹsasọ rẹ ugboma vwo erere tutuno, ẹkẹvuọvo omaẹvwọkpahotọ kẹ Ọghẹnẹ vwo erere vwẹ erọnvwọn ejobi, kidie o vwo ive rẹ arhọ asaọkiephana kugbe arhọ rọ cha vwẹ obaro na.
9 A sa vwẹroso ota yena, o ji fo nẹ e rhiabọreyọ karekare.
10 Ọnana yen sorọ rẹ avwanre vwọ wian gangan je davwẹngba mamọ, kidie avwanre mu iphiẹrophiyọ rẹ avwanre kpahen Ọghẹnẹ ro jeghwo, rọ dia Osivwin ri koka koka rẹ ihwo, ma rho kẹ ihwo re fuevun.
11 Wọ me rha vwẹ iji nana phia, ji yono ayen.
12 Wo jẹ ohwo vuọvo vwẹ ẹro ri phovwin vwo ni we kidie nẹ wẹwẹ eghene-e, ukperẹ ọtiọyen, dia udje vwọ kẹ ihwo re fuevun vwọrẹ ota ẹta, vwẹ uruemu, vwẹ ẹguọnọ, vwẹ esegbuyota, vwẹ ẹfuọn.
13 Bẹsiẹ me vwọ rhe, wo mi rhe muoma wẹn phiyọ isese rẹ azagba, rhe brẹ ihwo uche,* rhe yono.
14 Wọ kpairoro vrẹ okẹ ra vwọ kẹ wẹ womarẹ aroẹmrẹ vwẹ ọke rẹ ẹko rẹ ekpako na vwọ ghwabọ kpahen owẹ-ẹ.
15 Wo mi rhe roro kpahen erọnvwọn nana, muomaphiyọ ayen, rere ẹyan-obaro wẹn sa vwọ teyenphia gbonozẹ vwọ kẹ ihwo eje mrẹ.
16 Nabọ ni oma wẹn kugbe uyono wẹn so ọkieje, wọ me rha davwẹngba wo vwo ru erọnvwọn nana, kidie wo de ru ayen, wo che sivwin oma wẹn kugbe otu re kerhọ wẹn.
Eta rehẹ obotọ na
^ Vwẹ Grik, “ẹwẹn na.”
^ Vwẹ Grik, “ẹwẹn re phiẹn ihwo.”
^ Yẹrẹ “utehru.”
^ Yẹrẹ “rhe phiuduphiyọ ihwo awọ.”