Ọrẹsosuọ re si Rhe Timoti 5:1-25
5 Wọ ghwọkuẹ ọshare rọ kpakore gan nọ-ọ. Ukperẹ ọtiọyen, vwẹ unu kpotọ ta ota kẹ kerẹ ọsẹ, ta ota kẹ ighene eshare kerẹ iniọvo eshare,
2 eya re kpakore kerẹ ini, eya re dia ighene kerẹ iniọvo eya, vẹ ẹfuọn ejobi.
3 Dje erorokẹ vwọ kẹ eyauku* re ghene dia eyauku.*
4 Ẹkẹvuọvo, ọ da dianẹ ayeuku vwo emọ yẹrẹ ivwrọmọ, e jẹ enana ke yono obo re dje omaẹvwọkpahotọ kẹ Ọghẹnẹ phia vwevunrẹ evwruwevwin rayen, je hwosa ro fori vwọ kẹ esẹ vẹ ini kugbe esẹ vẹ ini rayen ride, kidie ọnana shephiyọ vwẹ ẹro rẹ Ọghẹnẹ.
5 Asaọkiephana, aye rọ ghene dia ayeuku, ro vwo ohwo vuọvo rọ cha vwẹ ukẹcha kẹ-ẹ, vwẹrosua Ọghẹnẹ, ji muomaphiyọ orẹ vẹ ẹrhovwo te ason te uvo.
6 Ẹkẹvuọvo, ọ ro yerẹn vwọ kẹ eruo rẹ urhurusivwe* romobọ rọyen ọvo ghwuru, dede nẹ ọ je herọ yerẹn.
7 Ọtiọyena wọ me rha vwẹ iji* nana vwọ kẹ ayen, rere ayen vwo jẹ ekan evwo.
8 Vwọrẹ uyota, ọ da dianẹ ohwo ọvo sa vwẹrote e robọ rọye-en,* ma rho kẹ ihwo rẹ evwruwevwin rọyen, kọyen ọ sen esegbuyota na, ọ je bra vrẹ ohwo ro jẹ esegbuyota evwo.
9 E jẹ e si odẹ rẹ ayeuku ro te ẹgbukpe 60 rọ je dia aye rẹ ọshare ọvo jovwo phiyotọ,
10 ra riẹn phiyọ ohwo ro ruẹ omamọ iruo, ọ da dianẹ ọ ghẹrẹ emọ, ọ da dianẹ o vwo ẹkuruemu ra vwọ ghọ erhorha, ọ da dianẹ ọ hworhẹ awọ rẹ ihwo efuanfon na, ọ da dianẹ ọ vwẹ ukẹcha kẹ ihwo re rioja, ọ da dianẹ ọ vwẹ oma rọyen kpahotọ vwọ kẹ kiruo kiruo esiri.
11 Ẹkẹvuọvo wo siẹ edẹ rẹ eyauku re dia ighene phiyotọ-ọ, kidie ọke rẹ urhurusivwe rẹ ehware rayen da rhe ro uvwre rayen vẹ Kristi, ayen ke cha guọnọ rọvwọn.
12 A cha vwẹ ayen guẹdjọ kidie ayen kpairoro vrẹ esegbuyota rẹ ayen ke vwo ẹsosuọ.*
13 Vwẹ ọke vuọvo na, ayen vwo ẹkuruemu ra vwọ ghwọrọ ọke kuẹfia, nẹ uwevwin ọvo kpo ọfa; e, ọ dianẹ ayen de ghwọrọ ọke kuẹfia ọvo-o, ẹkẹvuọvo ayen ji guẹn iguegun, duvwun unu phiyọ eta rẹ ihwo efa, ta eta kpahen erọnvwọn ri fori nẹ ayen ta ota kpahe-en.
14 Ọtiọyena me guọnọre nẹ eyauku re dia ighene na rọvwọn, ayen vwiẹ emọ, ayen vwẹrote evwruwevwin, rere ayen vwo jẹ uphẹn ẹvwọ kẹ ọrọvwọsua na nẹ ọ hanrhe ayen.
15 Vwọrẹ uyota, evo chukoku uyota na re, ayen de nene Eshu.
16 Ọ da dianẹ aye rọ dia Onenikristi vwo imoni re dia eyauku, e jẹ ọ vwẹ ukẹcha kẹ ayen rere ayen vwo jẹ oghwa ẹdia vwọ kẹ ukoko na. Ọke yena, ukoko na kọ sa vwẹ ukẹcha vwọ kẹ ihwo re ghene dia eyauku.*
17 E jẹ e ni ekpako re nabọ ruiruo rẹ ẹroevwote rayen vwẹ idjerhe oyoyovwin kerẹ ihwo ri fo ọghọ rẹ ọhwọhwọ ivẹ, ma rho kẹ e re wian gan vwẹ ota ẹta kugbe eyono.
18 Kidie isiesi ọfuanfon na tare nẹ, “Wọ gba unu rẹ erhuẹn ọke ro de woron eka-a,” ọ je tanẹ, “Ọwiowian muwan rẹ osa ra hwa kẹ.”
19 Wọ rhọnvwaphiyọ obo ra tare nẹ ọshare rọ kpakore* ruru-u, jokpanẹ kẹ ihwo ivẹ yẹrẹ erha soseri kpahọn.
20 Dia irharo rẹ ihwo eje da ghwọku ihwo ri ruẹ umwemwu, rere ọ dia orhọesio vwọ kẹ ihwo ri chekọ.*
21 Mi jurhi kẹ wẹ vwẹ obaro rẹ Ọghẹnẹ kugbe Kristi Jesu kugbe emekashe ra sanere na nẹ wo nene odjekẹ nana vwọ vrabọ rẹ omaẹfẹnẹ yẹrẹ e vwo nẹ ohwo ruẹ.
22 Wo brokpakpa ghwabọ wẹn kpahen ohwo vuọvo-o,* yẹrẹ vwobọ vwẹ imwemwu rẹ ihwo efa-a, sẹro rẹ oma wẹn fuanfon ọkieje.
23 Wọ rha da ame ọfa-a,* ẹkẹvuọvo da emerha rẹ iwaini fikirẹ evun wẹn na, kugbe ọga ro kpokpo uwe kọke kọke na.
24 Imwemwu rẹ ihwo evo vwomaphia vwẹ azagba, a me vwẹ ayen guẹdjọ ugege yena, ẹkẹvuọvo e rẹ ihwo efa, ukuko na e ke vwomaphia.
25 Ọtiọyen iruo esiri je vwomaphia vwẹ azagba, e re dia iruo esiri-i, e ji che se si ayen nu bẹdẹ-ẹ.
Eta rehẹ obotọ na
^ Vwẹ Grik, “Muọghọ kẹ eyauku.”
^ Yẹrẹ “eyauku re ghene hẹ ẹdia rẹ ọkanrovwẹ”; kọyen, ayen vwo ọchuko-o.
^ Ọ sa dia urhurusivwe rẹ ehware.
^ Yẹrẹ “odjekẹ.”
^ Yẹrẹ “vwẹ oborẹ e robọ rọyen guọnọre vwọ kẹ aye-en.”
^ Yẹrẹ “ive rẹ ayen veri jovwo.”
^ Yẹrẹ “eyauku re ghene hẹ ẹdia rẹ ọkanrovwẹ”; kọyen, ayen vwo ọchuko-o.
^ Yẹrẹ “ọkpako.”
^ Vwẹ Grik, “rere oshọ vwo mu ihwo ri chekọ.”
^ Kọyen, wo brokpakpa vwẹ ohwo vwo muẹ-ẹ.
^ Yẹrẹ “Wọ rha da ame ọvo-o.”