Ọrẹsosuọ re si Rhe Timoti 6:1-21
6 E jẹ eviẹn rhe nẹ inini rayen kerẹ ihwo ri fo ọghọ re karekare, rere e vwo jẹ ota ọbrabra ẹta kpahen odẹ rẹ Ọghẹnẹ kugbe uyono rọyen.
2 Vwọba, e jẹ ihwo ri vwo inini re dia Inenikristi dje uruemu ri jẹ ọghọ emuo phia kẹ ayen kidie nẹ ayen iniọvo-o. Ukperẹ ọtiọyen, e jẹ ayen nabọ ga ayen nẹ otọ ẹwẹn rhe, kidie ihwo re mrẹ erere vwo nẹ iruo esiri rayen na Inenikristi re vwo ẹguọnọ kpahen.
Wo mi rhe yono erọnvwọn nana, wọ me je rha vwẹ uchebro nana vwọ phia.
3 Ọ da dianẹ ohwo ọvo yono uyono ọfa rọ rhọnvwephiyọ uyono rọ vọnre vẹ erere ro nẹ obọ rẹ Ọrovwavwanre Jesu Kristi rhe na-a, yẹrẹ rọ rhọnvwephiyọ uyono ro shephiyọ vẹ omaevwọkpahotọ kẹ Ọghẹnẹ-ẹ,
4 jẹ ọ kparoma, o ji vwo ẹruọ rẹ emu vuọvo-o. O mu ẹwẹn rọyen eje kpahen uruemu* ra vwọ phraphro ji siẹ isiesi kpahen eta. Erọnvwọn nana sua omaẹriọ ọgangan, ẹghwọ, emiovwo rẹ odẹ rẹ ohwo,* orharhe ẹro re vwo nẹ ohwo,
5 aphro ri kọke kọke kpahen eta ri fi emuọvo-o rẹ eshare rẹ ẹwẹn rayen miovwirin re je riẹn uyota na-a phra, rẹ ayen vwo roro nẹ omaẹvwọkpahotọ kẹ Ọghẹnẹ cha nẹrhẹ ayen vwo erere romobọ.
6 Vwọrẹ uyota, erere rode herọ siẹrẹ a da vwomakpahotọ kẹ Ọghẹnẹ ji vwo ẹwẹn rẹ otekẹvwẹ.
7 Kidie avwanre ghwa orọnvwọn ọvuọvo rhe akpọ na-a, avwanre ji che se mu orọnvwọn ọvuọvo no-o.
8 Ọtiọyena, avwanre de vwo emuọre* kugbe obo re kuphiyọ,* enana te vwọ kẹ avwanre.
9 Ẹkẹvuọvo ihwo ri brorhiẹn nẹ ayen che je fe-e she rua ọdavwini kugbe ufi kugbe urhurusivwe sansan rẹ ọhọ epha-a re sua omaẹwan ji suẹn ihwo kpo oghwọrọ re karekare.
10 Kidie ẹguọnọ rẹ igho ọyen esiri rẹ koka koka rẹ erọnvwọn re sua omaẹwan ejobi, fikirẹ ẹguọnọ nana rẹ ihwo evo vwọtua, ayen de bo ghwru vwo nẹ esegbuyota na, ayen da je so ọmiaovwẹ buebun kẹ oma rayen.*
11 Ẹkẹvuọvo, wẹwẹ, E ohwo rẹ Ọghẹnẹ, djẹ vwọ kẹ erọnvwọn nana, rere wọ vwọtua ophiọnphiọn, omaẹvwọkpahotọ kẹ Ọghẹnẹ, esegbuyota, ẹguọnọ, akoechiro, kugbe dẹndẹn.
12 Họnre omamọ ohọnre rẹ esegbuyota na; yọnrọn arhọ ri bẹdẹ na kokoroko, ra vwẹ fiki rọyen vwo se we, ru wọ je nabọ ghwoghwo vwẹ azagba vwẹ irharo rẹ iseri buebun na.
13 Mi jurhi kẹ wẹ vwẹ obaro rẹ Ọghẹnẹ rọ sẹro rẹ arhọ rẹ erọnvwọn ejobi, kugbe Kristi Jesu rọ dia oseri rọ nabọ ghwoghwo vwẹ azagba vwẹ obaro ri Pọntiọs Pailet,
14 nẹ wọ yọnrọn iji na vwẹ idjerhe rọ vrabọ rẹ upe kugbe ekan bẹsiẹ ra vwọ vwẹ Ọrovwavwanre Jesu Kristi phia,
15 rẹ ọ rẹ oma vwerhan na, Ọrovwori rẹ ọyen ọvo vwo Ẹgba na cha vwọ phia vwẹ ọke ro bruphiyọ. Ọyen yen Ovie rẹ ihwo ri suẹn kerẹ ivie kugbe Ọrovwori rẹ ihwo ri suẹn kerẹ irivwori,
16 ohwo ọvuọvo ro jeghwo na, rọ dia evunrẹ elo re che se sikẹre-e, ohwo rẹ ohwo vuọvo je rhe mrẹ dẹvo-o yẹrẹ sa mrẹ-ẹ. E jẹ ọghọ kugbe ẹgba ri bẹdẹ dia erọyen. Isẹ.
17 Ta* kẹ otu ri feri vwẹ eyeren* nana nẹ ayen kparoma-a,* ayen je vwẹrosua efe ro muẹro-o, ẹkẹvuọvo ayen vwẹroso Ọghẹnẹ rọ vwẹ erọnvwọn eje rẹ avwanre riavwerhen rọyen vwọ kẹ avwanre gbidiki.
18 Vuẹ ayen nẹ ayen ru erhuvwu, ayen fe efe rẹ iruo esiri, ayen ruẹse,* ayen choma rẹ ayen vwọ ghare oborẹ ayen vwori,
19 ọnana rẹ ayen ruẹ na, jẹ ayen koko efe vwọ kẹ oma rayen, rọ dia uchivwo oyoyovwin vwọ kẹ obaro na, rere ayen sa vwọ yọnrọn uvi arhọ na kokoroko.
20 Timoti, sẹro rẹ obo ra vwọ kẹ wẹ yọnre na, kẹnoma kẹ eta ifefe ri gbe obo re fonro ẹgua kugbe iroro ri nẹ obọ rẹ ihwo ri rorori nẹ ayen “vwo erianriẹn” rhe, jẹ erianriẹn rayen na vwọso obo re dia uyota.
21 Womarẹ odjephia rẹ oka rẹ erianriẹn tiọyena, evo chukoku esegbuyota na re.
E jẹ ẹse re muwan rọye-en na nene ovwan dia.
Eta rehẹ obotọ na
^ Yẹrẹ “orharhe urhurusivwe.”
^ Yẹrẹ “eta rẹ ekan.”
^ Yẹrẹ “obo ra re.”
^ Yẹrẹ ọ sa dia, “asan ra dia.” Vwẹ Grik, “obo re vwo phopho.”
^ Yẹrẹ “ayen de ji duvwun oma rayen ejobi.”
^ Yẹrẹ “jurhi.”
^ Yẹrẹ “oge.” Ni Eta re Vwomaphia.
^ Yẹrẹ “ayen vwo okpiroro-o.”
^ Yẹrẹ “ayen hwabọ-ọ.”