Ọrẹsosuọ ri Jọn 1:1-13
1 Ọbe rẹ ọshare rọ kpakore* na si vwo rhe aye ra jẹreyọ na kugbe emọ rọyen ri mi ghini vwo ẹguọnọ kpahen, ọ dia omẹvwẹ ọvo-o, ẹkẹvuọvo ji te ihwo eje re rhe riẹn uyota na,
2 fikirẹ uyota na rọhẹ oma rẹ avwanre, ro ji che nene avwanre dia bẹdẹ.
3 Ẹse re muwan rọye-en kugbe arodọnvwẹ che nene avwanre dia, ọtiọyen ji te ufuoma ro nẹ obọ rẹ Ọghẹnẹ rọ dia Ọsẹ na rhe, ro ji nẹ obọ ri Jesu Kristi rọ dia Ọmọ rẹ Ọsẹ na rhe, ji te uyota kugbe ẹguọnọ.
4 Me ghọghọre mamọ kidie me mrẹ emọ wẹn evo re yan vwevunrẹ uyota na kirobo rẹ Ọsẹ na vwẹ iji rọyen kẹ avwanre.
5 Ọtiọyena me rẹ wẹ, aye, nẹ avwanre vwo ẹguọnọ rẹ ohwohwo. (Ọ dia iji kpokpọ yen mi siẹ rhe we na-a, ẹkẹvuọvo ọ ra vwọ kẹ avwanre vwo nẹ ọtonphiyọ rhe.)
6 Ọnana yen oborẹ ẹguọnọ mudiaphiyọ, nẹ avwanre rhe nene iji rọyen. Ọnana yen iji na kirobo rẹ ovwan nyoro vwo nẹ ọtonphiyọ rhe, nẹ ovwan rha yan vwẹ evun rọyen.
7 Kidie ihwo buebun re phiẹn ihwo ro evunrẹ akpọ na re, ihwo re rhọnvwere nẹ Jesu Kristi rhere vwọrẹ ugboma-a. Ọnana yen ọ rọ phiẹn ihwo na kugbe ọ rọ vwọsua Kristi na.
8 We ni oma rẹ ovwan so, ovwan vwo jẹ erọnvwọn rẹ avwanre wian phiyọ na ekuofia, rere ovwan se vwo vwo osa ọvọnvọn.
9 Kohwo kohwo rọ shariẹ ughwru, rọ dia evunrẹ uyono ri Kristi na-a, jẹ ọ vẹ Ọghẹnẹ vwo oyerinkugbe-e. Ohwo rọ dia evunrẹ uyono nana, ọyen ohwo ro vwo Ọsẹ na kugbe Ọmọ na.
10 Ohwo ọvo de bru we rhe jẹ ọ ghwa uyono nana rhe-e, wo dede phiyọ uwevwin wẹ-ẹn, wọ tobọ yere-en.
11 Kidie ohwo ro yerinre, jẹ o vwobọ vwẹ iruo umwemwu rọyen.
12 Dede nẹ mi vwo erọnvwọn buebun re me guọnọ si rhe ovwan, jẹ me guọnọ vwẹ ọbe vẹ inki vwo si aye-en, ẹkẹvuọvo mi rhẹro rọyen nẹ mi che bru ovwan rhe, e vwo rhiẹromrẹ ohwohwo ta ota kugbe, rere aghọghọ rẹ ovwan sa vwọ dia vọnvọn.
13 Emọ rẹ oniọvo wẹn rẹ aye, ọ ra jẹreyọ na, vwẹ uyeren rayen vwo rhe we.
Eta rehẹ obotọ na
^ Yẹrẹ “Ọbe rẹ ọkpako.”