Ọrivẹ re si Rhe Ihwo ri Kọrẹnt 1:1-24
1 Pọl, ọyinkọn ri Kristi Jesu womarẹ ọhọre rẹ Ọghẹnẹ, kugbe Timoti oniọvo rẹ avwanre, vwo rhe ukoko rẹ Ọghẹnẹ rọhẹ Kọrẹnt kugbe ihwo efuanfon na eje rehẹ Akaya ejobi.
2 E jẹ ẹse re muwan rọye-en kugbe ufuoma ro nẹ obọ rẹ Ọghẹnẹ rọ dia Ọsẹ rẹ avwanre kugbe Ọrovwori Jesu Kristi rhe, nene ovwan dia.
3 E jẹ ujiri dia vwọ kẹ Ọghẹnẹ kugbe Ọsẹ rẹ Ọrovwavwanre Jesu Kristi, Ọsẹ rẹ arodọnvwẹ kugbe Ọghẹnẹ rẹ uchebro ejobi,
4 ohwo ro bru avwanre uche vwevunrẹ edavwini* rẹ avwanre ejobi, rere avwanre sa vwọ vwẹ uchebro rọ vwọ kẹ avwanre na je vwọ kẹ ihwo efa rehẹ koka koka rẹ edavwini.
5 Kidie kirobo rẹ oja rẹ avwanre ria fikirẹ Kristi bunru na, ọtiọyen uchebro ra vwọ kẹ avwanre womarẹ Kristi ji bun.
6 Ọtiọyena, avwanre de hirharoku edavwini,* jẹ fikirẹ uchebro kugbe usivwin rẹ ovwan; e de ji bru avwanre uche, jẹ fikirẹ uchebro rẹ ovwan, rere ovwan se vwo chirakon rẹ oka ojaẹriọ vuọvo rẹ avwanre ria na.
7 Iphiẹrophiyọ rẹ avwanre vwo kpahen ovwan muẹro, kidie avwanre riẹnre nẹ kirobo rẹ ovwan vwo ẹkẹn vwẹ oja rẹ avwanre na, ọtiọyen ovwan ji che vwo ẹkẹn vwẹ uchebro rẹ avwanre.
8 Iniọvo, avwanre guọnọre nẹ ovwan riẹn kpahen ukpokpogho rẹ avwanre rhiẹromrẹ vwẹ ubrakpọ rẹ Esha. Avwanre rhiẹromrẹ okeke ọgangan rọ vrẹ ẹgba rẹ avwanre, te ẹdia rẹ avwanre de roro nẹ avwanre che ghwu.
9 Vwọrẹ uyota, avwanre rorori nẹ e brorhiẹn rẹ ughwu hwe avwanre nure. Ọnana phiare rere avwanre sa vwọ vwẹroso Ọghẹnẹ rọ kpara ihwo ri ghwuru vrẹn ukperẹ oma rẹ avwanre.
10 O sivwin avwanre vwo nẹ imuoshọ rẹ ughwu tiọyena, ọ cha rhoma sivwin avwanre. Avwanre ji vwo iphiẹrophiyọ nẹ o ji che rhe sivwẹn avwanre.
11 Ovwan je sa cha avwanre uko womarẹ orẹ rẹ ovwan, rere ihwo buebun sa vwọ kpẹvwẹ Ọghẹnẹ fikirẹ ẹroesiri rọyen rẹ avwanre mrẹre, rọ dia ẹkpahọnphiyọ rẹ ẹrhovwo rẹ ihwo buebun.
12 Ọnana yen oborẹ avwanre vwọ yan eyan, nẹ ẹwẹn obrorhiẹn rẹ avwanre soseri nẹ avwanre dje uruemu ọfuanfon vẹ uyota ro nẹ obọ rẹ Ọghẹnẹ rhe phia vwevunrẹ akpọ na, ma rho vwọ kẹ ovwan. Ọ dia womarẹ aghwanre rẹ akpọ na-a, ẹkẹvuọvo womarẹ ẹse rẹ Ọghẹnẹ re muwan rọye-en na.
13 Kidie oborẹ ovwan se se* ji vwo ẹruọ rọyen yen avwanre si rhe ovwan. Mi ji rhẹro rọyen nẹ ovwan che rhe vwo ẹruọ rẹ erọnvwọn nana gbagba,*
14 kirobo rẹ ovwan vwo ẹruọ vwo te ẹdia nẹ ovwan sa reyọ avwanre vwọ yonma, kirobo rẹ avwanre je cha reyọ ovwan vwọ yonma vwẹ ẹdẹ rẹ Ọrovwavwanre Jesu.
15 Fikirẹ imuẹro nana, me guọnọ ke bru ovwan rhe, rere ovwan sa vwọ ghọghọ abọ rivẹ;*
16 mi vwo ẹwẹn me vwọ mrẹ ovwan ọke mi de kpo Masidonia, ji rhivwin nẹ Masidonia bru ovwan rhe, ovwan mi rhe sun vwe te idjerhe ọke mi de kpo Judia.
17 Ọke me vwọ jiroro nana mi niro phovwin? Gbanẹ mi ruẹ erọnvwọn vwo nene ọhọre romobọ mẹ, re me da tanẹ “E, e” nu, mi mi rhe wene kpo “Ẹjo, ẹjo”?
18 Ẹkẹvuọvo ovwan sa vwẹroso Ọghẹnẹ nẹ, “e” rẹ avwanre vuẹ ovwan dia “ẹjo-o.”
19 Vwọba, Jesu Kristi rọ dia Ọmọ rẹ Ọghẹnẹ rẹ omẹvwẹ, Silvanọs* kugbe Timoti ghwoghwo kẹ ovwan na, tanẹ “e” rọ da dia “ẹjo-o,” ukperẹ ọtiọyen, ọkieje yen “e” rọyen vwọ dia “e.”
20 Kidie o vwo oborẹ ive rẹ Ọghẹnẹ bun te-e, ayen rhe dia “e” wan oma rọyen. Wan oma rọyen ọyen avwanre ji vwo ruẹ “Isẹ” kẹ Ọghẹnẹ, vwọ vwẹ urinrin kẹ.
21 Ọghẹnẹ yen kẹ avwanre imuẹro nẹ avwanre vẹ ovwan i ri Kristi, ọyen je jẹ avwanre reyọ.
22 Ọ je vwẹ utẹ rọyen vwo te avwanre, ọ da je kẹ avwanre imuẹro* rẹ obo re cha, kọyen ẹwẹn na ro phi phiyọ ubiudu rẹ avwanre.
23 Asaọkiephana, Ọghẹnẹ yen oseri mẹ nẹ me je rhe rhe Kọrẹnti-i, kidie me guọnọ phiba omaemuophiyọ rẹ ovwa-an.
24 Ọ dianẹ kẹ avwanre inini rẹ esegbuyota rẹ ovwa-an, ẹkẹvuọvo avwanre vẹ ovwan wian kuẹgbe fikirẹ aghọghọ rẹ ovwan, kidie womarẹ esegbuyota rẹ ovwan yen ovwan vwo mudia.
Eta rehẹ obotọ na
^ Yẹrẹ “ukpokpogho.”
^ Yẹrẹ “ukpokpogho.”
^ Yẹrẹ ọ sa dia, “oborẹ ovwan nabọ riẹn jovwo.”
^ Vwẹ Grik, “toba.”
^ Yẹrẹ ọ sa dia, “rere ovwan sa vwọ mrẹ erere abọ ivẹ.”
^ Re ji se Sailas.
^ Vwẹ Grik, “omoka.”