Ọrivẹ re si Rhe Ihwo ri Kọrẹnt 10:1-18
10 Asaọkiephana, mẹvwẹ ri Pọl vwẹ dẹndẹn kugbe uruemu esiri ri Kristi vwọ rẹ ovwan, dede nẹ mẹvwẹ ọvwiẹrẹ ọke me dahẹ ohri rẹ ovwan, jẹ mi fiudugberẹ ta ota kẹ ovwan vwẹ obuko rẹ ovwan.
2 Vwọrẹ uyota, me rhẹro rọyen nẹ ọke me da rhe, me cha reyọ ọghwọku ọgangan vwọ kẹ ihwo ri roro nẹ avwanre ruẹ nene iroro rẹ akpọ na.
3 Dede nẹ avwanre yeren akpọ kerẹ ihwo efa, jẹ avwanre vwẹ iroro rẹ akpọ na vwo phiẹ ofovwi-in.
4 Kidie ekuakua ofovwin rẹ avwanre dia e rẹ akpọ na-a, ẹkẹvuọvo Ọghẹnẹ kẹ avwanre ekuakua ofovwin re pha gangan re se vwo ghwie ekuakua re tan awọ muotọ.
5 Kidie avwanre rhẹriẹ iroro kugbe erọnvwọn ri kpenu re vwọso erianriẹn rẹ Ọghẹnẹ, avwanre je vwẹ kiroro kiroro vwo ruẹ ọviẹn, rere i vwo muọghọ kẹ Kristi;
6 avwanre muegbe rẹ avwanre vwọ vwẹ oja re kohwo kohwo ro jẹmienyo, ọke rẹ ovwan de dje ẹmienyo rẹ ovwan phia gbagba nu.
7 Oborẹ erọnvwọn hepha vwẹ otafe yen ovwan nẹ vwo brorhiẹn. Ohwo de vwo imuẹro nẹ ọyen ọ ri Kristi, e jẹ ọ rhoma roro kpahen uyota nana: Kirobo rọ dia ọ ri Kristi na, ọtiọyen avwanre je hepha.
8 Me da tobọ yonma gan nọ kpahen ogangan rẹ Ọrovwori na vwọ kẹ avwanre nẹ avwanre vwọ bọn ovwan gan ukperẹ avwanre vwọ sha ovwan te otọ, oma cha vo vwẹ-ẹ.
9 Kidie me guọnọre nẹ ọ họhọ nẹ me vwẹ ẹbe mẹ vwọ djẹ uguegue muẹ ovwa-an.
10 Kidie ayen tanẹ: “Ẹbe rọyen vwo ọnyẹ e ke je gan, ẹkẹvuọvo wọ da mrẹ,* ọ pha kerẹ ọvwiẹrẹ, eta rọyen fi emuọvo-o.”
11 E jẹ ihwo re ta eta tiọyena riẹn nẹ oborẹ avwanre si phiyọ ẹbe vwo rhe ovwan na* yen avwanre ji che ru* ọke rẹ avwanre da rhe.
12 Kidie avwanre yivwin vwẹ oma rẹ avwanre vwo dje yẹrẹ vwanvwe ihwo ri jiri oma raye-en. Ẹkẹvuọvo ọke rẹ ayen da vwẹ oma rayen vwọ vwanvwa ohwohwo rẹ ayen da vwẹ oma dje ohwohwo, jẹ ayen djephia nẹ ayen vwo ẹruọ-ọ.
13 Ẹkẹvuọvo avwanre cha yonma vwẹ otafe rẹ asan ra ghare kẹ avwanre-e, jẹ avwanre che ruo vwẹ asan rẹ Ọghẹnẹ ghare* kẹ avwanre, ovwan jehẹ evunrẹ asan ra ghare kẹ avwanre na.
14 Ọtiọyena, ọ dianẹ kẹ avwanre shariẹ ughwru brẹ ovwan cha kerẹsiẹ ra da mrẹ nẹ ovwan hẹ evunrẹ asan ra ghare kẹ avwanre na-a, kidie avwanre yen ihwo rẹsosuọ ri tu ghwoghwo iyẹnrẹn esiri ro shekpahen Kristi na kẹ ovwan.
15 Ẹjo, ọ dia owian rẹ ohwo ọfa wianre vwẹ otafe rẹ asan ra ghare kẹ avwanre na yen avwanre vwọ yonma-a, ẹkẹvuọvo avwanre rhẹro rọyen nẹ esegbuyota rẹ ovwan vwọ ganphiyọ na, oborẹ avwanre ruru vwẹ asan ra ghare kẹ avwanre na ji che bunphiyọ. Ọke yena kẹ avwanre se ruiruo buebun
16 rẹ avwanre vwo ghwoghwo iyẹnrẹn esiri na vwẹ ẹkuotọ ri sheri vrẹ ọ rẹ ovwan, rere avwanre vwo jẹ obo re ru nure vwẹ ẹkuotọ rẹ ohwo ọfa ẹ vwọ yonma.
17 “Ẹkẹvuọvo, e jẹ ohwo rọ yan eyan, vwẹ Jihova* vwọ yan eyan.”
18 Kidie ọ dia ohwo ro jiri oma rọyen yen e rhiabọreyọ-ọ, ẹkẹvuọvo ohwo ri Jihova* jiriri.
Eta rehẹ obotọ na
^ Vwẹ Grik, “ọ da rhe.”
^ Vwẹ Grik, “oborẹ avwanre hepha vwẹ ota na.”
^ Vwẹ Grik, “je cha dia vwẹ uruemu.”
^ Yẹrẹ “vwanvwe.”
^ Ni Eta re Vwomaphia.
^ Ni Eta re Vwomaphia.