Ọrivẹ re si Rhe Ihwo ri Kọrẹnt 11:1-33
11 Mane kẹ ovwan se chirakon mẹ ọ da tobọ dianẹ me họhọ ohwo ro vwo iroro-o. Ẹkẹvuọvo vwọrẹ uyota, ovwan ghini chirakon mẹ!
2 Me rioma kpahen ovwan kirobo rẹ Ọghẹnẹ rioma, kidie mẹvwẹ komobọ veri nẹ me cha vwẹ ovwan vwọ kẹ ọshare ọvo, rere me sa vwọ vwẹ ovwan kẹ Kristi kerẹ ọmọtobẹ rọ fonro.
3 Ẹkẹvuọvo oshọ mu vwe nẹ vwẹ idjerhe evo, kirobo rẹ ọrọdekọ phiẹn Ivi womarẹ ona rọyen na, e ji se miovwo ẹwẹn rẹ ovwan vwo nẹ uyota kugbe ẹfuọn ro fo Kristi.
4 Kidie kirobo rọ hepha na, ohwo ọvo da rhe rhi ghwoghwo Jesu ọfa rọ fẹnẹ ọ rẹ avwanre ghwoghwori, yẹrẹ ovwan de rhiabọreyọ ẹwẹn ọfa rọ fẹnẹ ọ ra kẹ ovwan na, yẹrẹ iyẹnrẹn esiri ọfa rọ fẹnẹ ọ rẹ ovwan rhiabọreyọ na, ovwan nabọ rhiabọdede.
5 Mi rorori nẹ iyinkọn rẹ ovwan ri ruẹ kerẹ ihwo ri me yovwin na, yovwin nọ vwẹ vwẹ ẹdia vuọvo-o.
6 Ẹkẹvuọvo me da tobọ dia ogbori rẹ ota, imuẹro herọ nẹ mi vwo erianriẹn; vwọrẹ uyota, avwanre dje ọnana phia kẹ ovwan vwẹ kidjerhe kidjerhe kugbe vwevunrẹ erọnvwọn ejobi.
7 Gbanẹ mi ru umwemwu me vwọ vwẹ oma mẹ kpotọ rere a sa vwọ kpare ovwan kpenu, kidie nẹ me vwẹ aghọghọ ghwoghwo iyẹnrẹn esiri rẹ Ọghẹnẹ na kẹ ovwan ọphẹ?
8 Mi krun oghwa nyẹ* ikoko efa womarẹ obo re me reyọ mie ayen,* rere mi se vwo gbodibo kẹ ovwan.
9 Dedena, ọke re me vẹ ovwan vwọ herọ, rẹ uwenre vwọ gan kẹ vwẹ, me dia oghwa vwọ kẹ ohwo vuọvo-o, kidie iniọvo ri nẹ Masidonia rhe vwẹ obo re me guọnọre vwọ kẹ vwẹ gbidiki. E, vwẹ kidjerhe kidjerhe, me sẹro rẹ oma mẹ rere mi vwo jẹ oghwa ẹdia vwọ kẹ ovwan, mi ji che rhe ruẹ ọtiọyen.
10 Me je vwọ dia Onenikristi na, ọkieje yen me cha vwọ reyọ ọnana vwọ yonma vwẹ ubrakpọ rẹ Akaya.
11 Diesorọ? Kidie nẹ mi vwo ẹguọnọ rẹ ovwa-an? Ọghẹnẹ riẹnre nẹ mi vwo ẹguọnọ rẹ ovwan.
12 Ẹkẹvuọvo obo ri mi ruẹ na yen mi ji che rhe ruẹ, rere mi vwo phioba phiyọ omeru rẹ ihwo re guọnọ oborẹ ayen vẹ avwanre sa vwọ dia abavo vwevunrẹ erọnvwọn* rẹ ayen yan eyan kpahan na.
13 Eshare tiọyena iyinkọn rẹ efian, ewiowian re vọnre vẹ ophiẹnvwe, re vwẹ oma nẹ kerẹ iyinkọn ri Kristi.
14 O gbe ohwo unu-u, kidie Eshu komobọ vwẹ oma nẹ kerẹ amakashe rẹ urhukpẹ!
15 Ọtiọyena, o rhe gbe ohwo unu siẹrẹ idibo rọyen da je vwẹ oma nẹ kerẹ ihwo ri ruẹ obo re gbare-e. Ẹkẹvuọvo oba rayen cha dia kirobo rẹ iruo rayen hepha.
16 Me rhoma ta: E jẹ ohwo ọvuọvo roro nẹ mẹvwẹ ohwo ro jẹ iroro evwo-o. Ọ da tobọ dianẹ ovwan roro ọtiọyen, ovwan gbe rhiabọreyọ ovwẹ ọtiọyen, rere me sa vwọ yonma emerha.
17 Asaọkiephana, me rha ta ota kerẹ ohwo ro nene udje rẹ Ọrovwori na-a, ukperẹ ọtiọyen, me ta ota kerẹ ohwo ro jẹ iroro evwo, rọ vwẹroso oma obọ rọyen, rọ je yan eyan.
18 Rọ vwọ dianẹ ihwo buebun vwẹ ekuakua rẹ akpọ na vwọ yonma na, ke me je cha yonma.
19 Rọ vwọ dianẹ ovwan vwo “ọhọ” mamọ na, oma kọ vwerhen ovwan vwo rhiabọreyọ otu ri vwo iroro-o.
20 Vwọrẹ uyota, ovwan chirakon rẹ kohwo kohwo rọ vwẹ ovwan ruẹ eviẹn, ohwo ro gborho ekuakua rẹ ovwan, ohwo ro fru oborẹ ovwan vwori mie ovwan, ohwo rọ vwẹ oma rọyen ruẹ onini kẹ ovwan kugbe ohwo rọ ghwiẹ ovwan vwẹ opharo.
21 Ọyen emu rẹ omavovwẹ nẹ avwanre ta ọnana, kidie ihwo evo se no nẹ avwanre evwiẹrẹ.
Ẹkẹvuọvo ọ da dianẹ oma vo ihwo evo rẹ ayen vwọ yonma-a, oma je cha vo vwẹ re me vwọ yonma-a, ọ da tobọ dianẹ ihwo evo che no nẹ mi vwo iroro-o.
22 Ayen ihwo ri Hibru? Mẹvwẹ jẹ ohwo ri Hibru. Ayen ihwo rẹ Izrẹl? Mẹvwẹ jẹ ohwo rẹ Izrẹl. Ayen emọ* rẹ Ebraham? Mẹvwẹ jẹ ọmọ rẹ Ebraham.
23 Ayen idibo ri Kristi? Me kpahenre kerẹ ọrhuẹ, me dia odibo ri Kristi nọ ayen: Mi ruiruo buebun, e mu vwe phiyọ uwodi abọ buebun, me rioja rẹ ehwe ro vwo unu-u, mi dino ghwu abọ buebun.
24 Abọ iyorin yen ihwo ri Ju fa vwẹ uphiaphia ọvo nuro 40,
25 abọ erha yen a vwẹ ọkpọ fa vwẹ, e phi vwe obọ ọvo, okọ shu vwe abọ erha, me ghwọrọ ason ọvo vẹ ẹdẹ ọvo vwevunrẹ abadi;
26 vwẹ oyan ọke buebun, vwẹ imuoshọ rẹ urhie, imuoshọ vwo nẹ obọ rẹ igbunegbu, imuoshọ vwo nẹ obọ rẹ ihwo mẹ, imuoshọ vwo nẹ obọ rẹ ẹgborho na, imuoshọ vwevunrẹ orere, imuoshọ vwevunrẹ aton, imuoshọ vwẹ abadi, imuoshọ vwẹ ohri rẹ iniọvo rẹ efian,
27 vwẹ owian ọgangan vẹ omaẹlaghọ, vwẹ ovwerhẹn ẹgha vwẹ ason buebun, vwẹ owẹnvwe kugbe urhuru rẹ ame, vwẹ jẹ emuọre evwo ọke buebun, vwẹ ekpahen kugbe jẹ iwun evwo.*
28 Vwọ vrẹ enana eje, o ji vwo orọnvwọn ọvo ro kpokpo* uvwe ẹwẹn kẹdi kẹdẹ: ẹnwan re me rua kpahen ikoko na eje.
29 Ono yen vwiẹrẹre ri mi de jẹ ọvwiẹrẹ ẹdia? Ono yen kprowọ rẹ ivun de juvwe emiovwo?
30 Me da guọnọ yonma, me cha vwẹ erọnvwọn ri djerephia nẹ mẹvwẹ ọvwiẹrẹ vwọ yonma.
31 Ọghẹnẹ kugbe Ọsẹ rẹ Ọrovwori Jesu, Ohwo ra vwẹ ujiri kẹ bẹdi bẹdẹ na riẹnre nẹ ọ dia efian mi guẹn na-a.
32 Vwẹ Damaskọs, osun rọhẹ otọ rẹ ovie Aretas rhẹrẹ orere na rere o se vwo mu vwe,
33 ẹkẹvuọvo a da vwẹ obere lọrọ ovwẹ wan ovakpo rọhẹ igbẹhẹ rẹ orere na rhe otọ, me da djẹ vabọ.
Eta rehẹ obotọ na
^ Vwẹ Grik, “Mi gborho.”
^ Yẹrẹ “womarẹ ukẹcha rẹ ayen vwọ kẹ vwẹ.”
^ Yẹrẹ “ọfisi.”
^ Vwẹ Grik, “ubi.”
^ Vwẹ Grik, “kugbe ẹban.”
^ Yẹrẹ “keke.”