Ọrivẹ re si Rhe Ihwo ri Kọrẹnt 12:1-21
12 Me cha yonma. O che fierere-e, ẹkẹvuọvo me cha ta ota kpahen emramrẹ vẹ ẹvwọphia rẹ Ọrovwori na.
2 Me riẹn ọshare ọvo rọ vẹ Kristi gba herọ vwẹ ẹgbukpe 14 re wanre. Sẹ vwevunrẹ ugboma yẹrẹ ọ dia evunrẹ ugboma-a, me riẹnre-e, Ọghẹnẹ yen riẹnre. E muro kpo odjuvwu rerha.
3 E, me riẹn ohwo ọtiọyen. Sẹ vwevunrẹ ugboma yẹrẹ ọ dia evunrẹ ugboma-a, me riẹnre-e, Ọghẹnẹ yen riẹnre.
4 E muro kpo iparadaisi, o de nyo eta rẹ unu cha sa ta-a, eta ro fori nẹ ohworakpọ ta-a.
5 Me cha vwẹ ohwo ọtiọyena vwọ yonma, ẹkẹvuọvo me cha vwẹ oma mẹ vwọ yonma-a, jokparẹ ovwiẹrẹ mẹ.
6 Me da tobọ guọnọ yonma, mi che ruo kerẹ ohwo ro jẹ iroro evwo-o, kidie uyota yen me cha ta. Ẹkẹvuọvo mi ru ọtiọye-en, rere ohwo ọvuọvo vwo juvwe ejiro vwọ vrẹ obo rọ mrẹre vwẹ oma mẹ yẹrẹ ro nyo mie vwe,
7 kidie nẹ a vwẹ emramrẹ rẹ igbevwunu sansan vwọ nẹ vwẹ.
Rere mi vwo jẹ oma ẹkparọ kpenu gan nọ, a da vwẹ unwe vwo duvwun uvwe, kọyen amakashe rẹ Idẹbono, nẹ ọ rha ghwiẹ vwẹ* rere mi vwo jẹ oma ẹkparọ kpenu gan nọ.
8 Abọ erha yen me rẹ Ọrovwori na kpahen ọnana, nẹ o sio nuvwe oma.
9 Ẹkẹvuọvo ọ da ta kẹ vwẹ nẹ: “Ẹse mẹ re muwan rọye-en na te kẹ wẹ, kidie vwevunrẹ ovwiẹrẹ ọyen mi de dje ogangan mẹ phia vọnvọn.” Ọtiọyena oma cha vwerhen ovwẹ me vwọ vwẹ ovwiẹrẹ mẹ vwọ yonma, rere ẹgba ri Kristi sa vwọ dia enu mẹ kerẹ utughẹ.
10 Ọtiọyena fikirẹ Kristi, oma kọ vwerhen ovwẹ vwevunrẹ ovwiẹrẹ, vwẹ aroeyivwo, vwẹ ọke rẹ ọkanrovwẹ, vwẹ omukpahen kugbe ebẹnbẹn. Kidie ọke me vwọ vwiẹrẹ, ọke yena yen mi vwo vwo ẹgba.
11 Mi rhi hirhephiyọ ohwo ro jẹ iroro evwo re. Ovwan yen gba vwẹ vwọ dia ọtiọyen, kidie ofori nẹ ovwan jiri uvwe jovwo. O vwo emu vuọvo ro djerephia nẹ iyinkọn rẹ ovwan ri ruẹ kerẹ ihwo ri me yovwin na, yovwin nọ vwẹ vwẹ ẹdia vuọvo-o, ọ da tobọ dianẹ mi fiemu-u.
12 Vwọrẹ uyota, a vwẹ eka rẹ ọyinkọn phia vwẹ ohri rẹ ovwan womarẹ akoechiro ọgangan, kugbe womarẹ eka vẹ igbevwunu sansan kugbe iruo re vọnre vẹ ẹgba.
13 Mavọ yen e vwo dje ẹroesiri kẹ ikoko ri chekọ na vwọ vrẹ ovwan, jokparẹ ọ rẹ mẹvwẹ komobọ vwo jẹ oghwa ẹdia kẹ ovwan? Biko ovwan vwo ghovwo uvwe fikirẹ oruchọ nana.
14 Nighere! Ọnana yen obọ rerha ri mi vwo muegbe ri mi che vwo bru ovwan rhe, me cha dia oghwa vwọ kẹ ovwa-an. Ọ dia oborẹ ovwan vwori yen me guọnọ-ọ, ẹkẹvuọvo ovwan komobọ; kidie ọ dia emọ yen kọn okọn kẹ esẹ vẹ ini raye-en, ẹkẹvuọvo esẹ vẹ ini na yen ruẹ ọtiọyen kẹ emọ rayen.
15 Vwọ kẹ vwẹ, oma cha vwerhen ovwẹ mi vwo siobọnu erọnvwọn ejobi mi vwori, ji te arhọ mẹ fikirẹ ovwan.* Mi de vwo ẹguọnọ rẹ ovwan mamọ, o rhe fo nẹ ẹguọnọ rẹ ovwan vwo kpahen ovwẹ je gan te ọtiọyen?
16 Obo rọ wanre eje, me dia oghwa kẹ ovwa-an. Dedena ovwan tanẹ mi “hworo ona” kugbe nẹ me “phiẹn” ovwan.
17 Me womarẹ ihwo ri mi ji bru ovwan rhe vwo gborho ovwa-an, gbanẹ mi ru ọtiọyen?
18 Me vuẹ Taitọs nẹ o bru ovwan rhe, mi de ji oniọvo ọvo nene. Taitọs gborho ovwan kakaka-a, gbanẹ o ru ọtiọyen? Ẹwẹn vuọvo yen avwanre vwori, ọ dia ọtiọyen? Uruemu vuọvo yen ji rhe avwanre, ọ dia ọtiọyen?
19 Gbanẹ ovwan roro rhabae nẹ avwanre chochọn rẹ oma rẹ avwanre kẹ ovwan? Kerẹ idibo ri Kristi, avwanre ta uyota vwẹ obaro rẹ Ọghẹnẹ. Ẹkẹvuọvo iniọvo eghanghanre, avwanre ruẹ enana ejobi vwọ bọn ovwan gan.
20 Kidie oshọ mu vwe nẹ me da rhe, ọkiọvo me cha mrẹ ovwan vwẹ ẹdia ri mi rhẹro rọye-en, ovwan je cha mrẹ vwẹ, vwẹ ẹdia rẹ ovwan rhẹro rọye-en, ukperẹ ọtiọyen, me sa rhe mrẹ ẹghwọ, omaẹriọ, ophu ọgangan, ohẹriẹ, erharhe eta, iguegun, omaephuo, kugbe oyanghan.
21 Ọkiọvo me da rhoma rhe, Ọghẹnẹ mẹ kọ nẹrhẹ oma vo ovwẹ vwẹ ohri rẹ ovwan, ki mi muomaphiyọ fikirẹ buebun rẹ ovwan ri ru umwemwu jovwo, ẹkẹvuọvo re rhọnvwe kurhẹriẹ vwo nẹ jẹfuọn, ọfanrhiẹn* kugbe uruemu ra ghẹmrẹ* rẹ ayen vwobọ vwọ-ọ.
Eta rehẹ obotọ na
^ Yẹrẹ “nẹ o rhe hwe vwe.”
^ Yẹrẹ “erhi rẹ ovwan.” Ni Eta re Vwomaphia.
^ Vwẹ Grik, por·nei′a. Ni Eta re Vwomaphia.
^ Yẹrẹ “uruemu rẹ omavovwẹ kanre.” Vwẹ Grik, a·sel′gei·a. Ni Eta re Vwomaphia.