Ọrivẹ re si Rhe Ihwo ri Kọrẹnt 13:1-14
13 Ọnana yen obọ rerha ri mi vwo brẹ ovwan cha na. “Womarẹ ota rẹ iseri ivẹ yẹrẹ erha, kota kota ko se muẹro.”
2 Dede nẹ me vẹ ovwan herọ asaọkiephana-a, ọ ghwa họhọ nẹ mi bru ovwan rhe obọ rivẹ, me da vwẹ orhọesio kẹ ihwo ri ru umwemwu jovwo kugbe ovwan ihwo ri chekọ eje, nẹ me da sa rhoma bru ovwan rhe, mi che kuẹrofia kẹ aye-en,
3 rọ vwọ dianẹ ovwan guọnọ obo ri djerephia nẹ Kristi ro jẹ ọvwiẹrẹ ẹdia ẹkẹvuọvo ro vwo ẹgba vwẹ ohri rẹ ovwan na ghene ta ota wan oma mẹ.
4 Kidie e ghini hwe mu urhe kerẹ ohwo rọ vwiẹrẹre, ẹkẹvuọvo o yerẹn fikirẹ ẹgba rẹ Ọghẹnẹ. Vwọrẹ uyota, avwanre evwiẹrẹ kirobo rọ hepha, ẹkẹvuọvo avwanre vẹ ọyen che yerin fikirẹ ẹgba rẹ Ọghẹnẹ rọ wian vwẹ oma rẹ ovwan.
5 Ovwan rha davwan oma rẹ ovwan nẹ sẹ ovwan hẹ evunrẹ esegbuyota na; ovwan rhe dje oborẹ ovwan komobọ hepha phia. Gbanẹ ovwan rha riẹn nẹ Jesu Kristi vẹ ovwan yen gba herọ? Jokpanẹ kẹ a sen ovwan.
6 Me ghene guọnọ nẹ ovwan mrẹvughe nẹ Ọghẹnẹ sen avwanre-e.
7 Asaọkiephana avwanre rẹ Ọghẹnẹ rere ovwan vwo jẹ emu vuọvo e ruo chọ, ọ dia rere avwanre vwọ họhọ ihwo re rhiabọreyọ-ọ, ẹkẹvuọvo rere ovwan vwo ru obo ri yovwirin, ọ da tobọ dianẹ avwanre họhọ ihwo ra senre.
8 Kidie avwanre che se ru emu vuọvo vwọso uyota na-a, ẹkẹvuọvo etito ọvo yen avwanre se titi uyota na.
9 Vwọrẹ uyota avwanre ghọghọ kọke kọke rẹ avwanre da vwiẹrẹ jẹ ovwan vwo ẹgba. Ọnana yen oborẹ avwanre nẹrhovwo kpahan, nẹ ovwan rha kpọ oma rẹ ovwan viẹ.
10 Ọnana yen sorọ mi vwo si erọnvwọn nana rhe ovwan ọke me je rhe rhe-e na, rere me da rhe mi vwo jẹ aro esio ọke me da reyọ ogangan rẹ Ọrovwori na vwọ kẹ vwẹ vwo ruiruo, rere me sa vwọ reyọ vwọ bọn ovwan gan ukperẹ me vwọ reyọ vwọ hra ovwan totọ.
11 Ọ rọ koba iniọvo, ovwan rha ghọghọ, ovwan rha kpọ oma rẹ ovwan viẹ, ovwan rhe rhiabọreyọ uchebro, ovwan vwo iroro ọvo, ovwan rhe yerẹn kuẹgbe vwọrẹ ufuoma; Ọghẹnẹ rẹ ẹguọnọ kugbe ufuoma ko nene ovwan dia.
12 Ovwan yeren ohwohwo vẹ unuẹfiọnfiọn ọfuanfon.
13 Ihwo efuanfon* na eje vwẹ uyeren rayen vwo rhe ovwan.
14 E jẹ ẹse re muwan rọye-en rẹ Ọrovwavwanre Jesu Kristi, ẹguọnọ rẹ Ọghẹnẹ kugbe ẹwẹn ọfuanfon ra vwọ kẹ avwanre eje nene ovwan dia.
Eta rehẹ obotọ na
^ Yẹrẹ “iniọvo.”