Ọrivẹ re si Rhe Ihwo ri Kọrẹnt 2:1-17
2 Mi brorhiẹn nure nẹ me rha cha nẹrhẹ ovwan muomaphiyọ ọke me da rhoma bru ovwan rhe-e.
2 Me da nẹrhẹ ovwan muomaphiyọ, kẹ ono yen cha nẹrhẹ ovwẹ ghọghọ, ọ je dia ovwan re me nẹrhẹ nẹ i muomaphiyọ na?
3 Mi si obo ri mi siri na rere ọke me da rhe, mi vwo jẹ oma emuophiyọ fikirẹ ihwo re rha nẹrhẹ me ghọghọ, kidie mi vwo imuẹro nẹ obo re kẹ vwẹ aghọghọ yen je kẹ ovwan ihwo eje aghọghọ.
4 Vwevunrẹ ukpokpogho rode vẹ ubiudu rọ vọnre vẹ odjadja yen mi vwo si rhe ovwan vẹ ameoviẹ buebun, ọ dia rere ovwan vwo muomaphiyọ-ọ, ẹkẹvuọvo rere ovwan vwọ riẹn oborẹ ẹguọnọ ri mi vwo kpahen ovwan kodo te.
5 Ohwo ọvo da so omaemuophiyọ, ọ dia omẹvwẹ yen ọ so omaemuophiyọ kẹ-ẹ, ẹkẹvuọvo ovwan eje vwo te ẹdia. Me guọnọre nẹ ota mẹ dia gbaegbae nọ-ọ.
6 Ọghwọku nana ri buebun rẹ ovwan vwọ kẹ na te kẹ;
7 enẹna, ovwan gbe vwo ghovwo nẹ otọ ẹwẹn rhe ji bro uche, rere omaemuophiyọ ọgangan vwo jẹ emuorọ.
8 Ọtiọyena, mi jiriro kẹ ovwan nẹ ovwan dje ẹguọnọ kẹ.
9 Ọna yen je nẹrhẹ mi si rhe ovwan, rere me vwọ riẹn sẹ ovwan che dje ẹmienyo rẹ ovwan phia vwẹ erọnvwọn ejobi.
10 Ovwan da vwẹ orọnvwọn vwo ghovwo ohwo, mi ji vwo ghovwo. Vwọrẹ uyota, kemu kemu ri mi vwo ghovwo, (ọ da dianẹ me vwẹ orọnvwọn vwo ghovwo ohwo) mi ru ọtiọyen fikirẹ ovwan vwẹ obaro ri Kristi,
11 rere Eshu vwo jẹ avwanre ephiokparobọ,* kidie avwanre dia igbori rẹ ena rọye-en.
12 Mi vwo te Troas rere mi ghwoghwo iyẹnrẹn esiri ro shekpahen Kristi na, ẹchẹ ọvo de rhiephiyọ kẹ vwẹ vwevunrẹ Ọrovwori na,
13 jẹ ẹwẹn mẹ se totọ-ọ, kidie me mrẹ Taitọs oniọvo mẹ-ẹ. Ọtiọyena me da vuẹ ayen nẹ kẹsiẹfa, mi de kpo Masidonia.
14 Ẹkẹvuọvo, akpẹvwẹ kẹ Ọghẹnẹ ro suẹn avwanre vẹ Kristi vwo nudje rẹ ophikparobọ ọkieje, rọ nẹrhẹ ọnrhe rẹ erianriẹn rọyen gbon ro asan eje womarẹ avwanre!
15 Vwọ kẹ Ọghẹnẹ, avwanre omamọ ọnrhe ri Kristi vwẹ ohri rẹ ihwo ri sivwẹn rhọ kugbe ohri rẹ ihwo re ghwọrọ;
16 vwọ kẹ otu re ghwọrọ, ọnrhe rẹ ughwu ro suẹn kpo ughwu, vwọ kẹ otu ri sivwẹn rhọ, ọnrhe rẹ arhọ ro suẹn kpo arhọ. Amono yen nabọ muwan vwọ kẹ iruo tiọyena?
17 Avwanre, kidie avwanre vwẹ ota rẹ Ọghẹnẹ chueki* kirobo rẹ ihwo buebun ruẹ-ẹ, ẹkẹvuọvo kerẹ idibo ri Kristi, avwanre rhievun ta uyota kerẹ ihwo rẹ Ọghẹnẹ ji uwevwin, e, vwẹ ẹro rẹ Ọghẹnẹ.