Ọrivẹ re si Rhe Ihwo ri Kọrẹnt 3:1-18
3 Avwanre cha rhoma jiri oma rẹ avwanre kẹ ovwan? Gbanẹ avwanre guọnọ ẹbe rẹ ujiri mie ovwan yẹrẹ avwanre cha vwẹ ọbe rẹ ujiri kẹ ovwan kirobo rẹ ihwo evo ruẹ?
2 Ovwan komobọ yen ọbe rẹ avwanre, re si phiyọ ubiudu rẹ avwanre, rẹ ihwo ejobi riẹnre rẹ ayen ji se.
3 O phẹnre dẹn nẹ ovwan ọbe ri Kristi rẹ avwanre siri kerẹ idibo. Ọ dia inki yen e vwo sio phiyọ ephapha rẹ oragha-a, ẹkẹvuọvo ẹwẹn rẹ Ọghẹnẹ ro jeghwo na yen e vwo sio phiyọ ubiudu rẹ ihwo.
4 Avwanre vwo imuẹro nana kpahen Ọghẹnẹ womarẹ Kristi.
5 Avwanre cha sa tanẹ avwanre nabọ muwan vwọ kẹ kemu kemu rẹ avwanre ruẹ-ẹ, ẹkẹvuọvo Ọghẹnẹ yen nẹrhẹ avwanre nabọ muwan.
6 Ọyen nẹrhẹ avwanre nabọ muwan kerẹ idibo rẹ ọphọ kpokpọ, ọ dia ọ rẹ urhi re si phiyotọ-ọ, ẹkẹvuọvo ọ rẹ ẹwẹn, kidie urhi re si phiyotọ na brorhiẹn rẹ ughwu hwe ohwo, ẹkẹvuọvo ẹwẹn na nẹrhẹ e vwo arhọ.
7 Vwọba, ọ da dianẹ urhi rọ sua ughwu re si phiyọ oragha na rhere vẹ urinrin rọ gan te asan rẹ ihwo rẹ Izrẹl rhe se ni opharo ri Mosis fikirẹ urinrin ro nẹ opharo rọyen cha-a, dede nẹ urinrin na cha wanvrẹ,
8 iruo rẹ ẹwẹn na ruẹ rhe vwo urinrin rọ vrẹ ọtiọyen?
9 Ọ da dianẹ urhi ro brẹ hwe ohwo na vwo urinrin, kọyen iruo rọ nẹrhẹ a dia ọvwata che vwo urinrin rọ vrẹ ọtiọyen.
10 Vwọrẹ uyota, obo re tobọ vwo urinrin jovwo na, e miere urinrin rọyen fikirẹ urinrin rọ rho vrẹ na.
11 Ọ da dianẹ a vwẹ obo re che sino na vwọ phia vẹ urinrin, kọyen urinrin rẹ obo re cha daji na cha vrẹ ọtiọyen shesheri.
12 Kidie nẹ avwanre vwo iphiẹrophiyọ tiọyena, kẹ avwanre ta ota vẹ ugbomọphẹ,
13 avwanre ruẹ kerẹ Mosis rọ vwẹ oga* rhurhu opharo rere ihwo rẹ Izrẹl vwo jẹ obo re cha phia kẹ ọ re che sino na eno kiọkiọkiọ-ọ.
14 Ẹkẹvuọvo ayen se vwo ẹruọ-ọ. Kidie rhi te nonẹna, oga* ọvuọvo yena ji rhurhu udu rayen ọke re de se ọphọ rẹ awanre na, kidie womarẹ Kristi ọvo yen e se vwo sio no.
15 Vwọrẹ uyota, rhi te nonẹna, a vwẹ oga* rhurhu udu rayen kọke kọke re de se eta ri Mosis.
16 Ẹkẹvuọvo, ohwo de kurhẹriẹ bru Jihova,* ke si oga* re vwo rhurhu udu rọyen no.
17 Asaọkiephana, Jihova* Ohwo rẹ Ẹwẹn. Asan rẹ ẹwẹn ri Jihova* hepha, etiyin ugbomọphẹ hepha.
18 Avwanre eje re vwẹ oga* rhurhu opharo-o na dje urinrin ri Jihova* phia kerẹ ughegbe. E wene avwanre phiyọ uhoho ọvuọvo, vwo nẹ urinrin ọvo vwo kpo ọfa rọ vrẹ ọtiọyen,* kirobo ri Jihova* rọ dia Ohwo rẹ Ẹwẹn na ghwe ruo.*
Eta rehẹ obotọ na
^ Yẹrẹ “amwa.”
^ Yẹrẹ “amwa.”
^ Yẹrẹ “amwa.”
^ Ni Eta re Vwomaphia.
^ Yẹrẹ “amwa.”
^ Ni Eta re Vwomaphia.
^ Ni Eta re Vwomaphia.
^ Yẹrẹ “amwa.”
^ Ni Eta re Vwomaphia.
^ Vwẹ Grik, “nẹ urinrin kpo urinrin.”
^ Ni Eta re Vwomaphia.
^ Yẹrẹ ọ sa dia, “kirobo rẹ ẹwẹn ri Jihova ghwe ruo.”