Ọrivẹ re si Rhe Ihwo ri Kọrẹnt 4:1-18
4 Ọtiọyena, rọ vwọ dianẹ a kẹ avwanre iruo odibo egbe nana womarẹ arodọnvwẹ re dje kẹ avwanre na, oma gbe rhọ avwanre-e.
2 Ẹkẹvuọvo avwanre sen erọnvwọn re ruẹ vwẹ odjahọn re sua omavovwẹ, avwanre gua ota rẹ Ọghẹnẹ yẹrẹ ruẹ emu vuọvo vẹ ophiẹnvwe-e; ẹkẹvuọvo womarẹ uyota na rẹ avwanre djephia, avwanre rhe dia omamọ udje vwọ kẹ ihwo eje vwẹ ẹro rẹ Ọghẹnẹ.
3 Vwọrẹ uyota, ọ da dianẹ e rhurhu iyẹnrẹn esiri rẹ avwanre ghwoghwo na, jẹ otu re ghwọrọ yen e rhurhiro kẹ,
4 vwẹ ohri rẹ ihwo rẹ ọghẹnẹ rẹ eyeren* nana de rhuẹro rẹ ubiudu rẹ ihwo ri segbuyota-a, rere elo* rẹ urinrin rẹ iyẹnrẹn esiri ro shekpahen Kristi rọ dia uhoho rẹ Ọghẹnẹ na vwo je lo muo.
5 Ọ dia oma rẹ avwanre yen avwanre ghwoghwo kpaha-an, ẹkẹvuọvo avwanre ghwoghwo kpahen Jesu Kristi nẹ ọyen Ọrovwori, avwanre ke rha idibo rẹ ovwan fikirẹ Jesu.
6 Kidie Ọghẹnẹ yen ohwo rọ tare nẹ, “E jẹ urhukpẹ lo nẹ evunrẹ ebri rhe,” ọ da nẹrhẹ urhukpẹ lo mu ubiudu rẹ avwanre, rere erianriẹn rẹ Ọghẹnẹ rọ vọnre vẹ urinrin na se vwo lo mu ubiudu rẹ avwanre womarẹ opharo ri Kristi.
7 Ẹkẹvuọvo, avwanre vwo efe nana vwevunrẹ echẹ,* rere ẹgba rọ vrẹ ẹgba na vwọ dia ọ rẹ Ọghẹnẹ, ọ dia ọ rẹ avwanre-e.
8 Avwanre hirharoku okeke ọgangan vwẹ kẹdia kẹdia, jẹ ọ gan te asan rẹ avwanre de jẹ oma e se kpogho-o; ẹwẹn rẹ avwanre tighiri, ẹkẹvuọvo ofu dje avwanre-e;*
9 e mukpahen avwanre, ẹkẹvuọvo a kpairoro vrẹ avwanre-e; a teyen avwanre she, ẹkẹvuọvo a ghwọrọ avwanre-e.
10 Ọkieje yen avwanre vwo chirakon rẹ imuoshọ rẹ ughwu kerẹ Jesu, rere akpeyeren ri Jesu sa vwọ teyenphia vwevunrẹ oma rẹ avwanre.
11 Kidie avwanre ri yerẹn na hirharokuẹ ughwu kọke kọke fikirẹ Jesu, rere akpeyeren ri Jesu sa vwọ teyenphia vwevunrẹ oma rẹ avwanre ro ghwẹ na.
12 Ọtiọyena ughwu ruiruo vwevunrẹ oma rẹ avwanre, ẹkẹvuọvo arhọ ruiruo vwẹ ọ rẹ ovwan.
13 Asaọkiephana, kidie nẹ avwanre vwo oka rẹ esegbuyota* re si kpahen nẹ: “Mi vwo esegbuyota ọtiọyena me da ta ota”; avwanre ji vwo esegbuyota ọtiọyena kẹ avwanre ta ota,
14 kidie avwanre riẹnre nẹ Ohwo rọ kpare Jesu nẹ ushi na je cha kpare avwanre nẹ ushi re nene Jesu dia, ọ me vwẹ avwanre vẹ ovwan rhe obaro ri Jesu.
15 Enana ejobi phiare fikirẹ ovwan, rere ẹse rẹ Ọghẹnẹ re muwan rọye-en vwọ rhoma bunphiyọ, kidie ihwo buebun vwẹ urinrin kẹ Ọghẹnẹ womarẹ akpẹvwẹ rẹ ayen vwọ kẹ.
16 Ọtiọyena, oma gbe rhọ avwanre-e, ẹkẹvuọvo ọ da tobọ dianẹ ugboma rẹ avwanre* ghwọrọ kuẹfia, o muẹro nẹ ohwo rẹ avwanre hepha vwẹ obevun kpokpọ phiyọ kẹdi kẹdẹ.
17 Kidie dede nẹ ukpokpogho* na ọ rẹ ọmọke, ọ ke je pharhe, ọ nẹrhẹ avwanre vwo urinrin rọ rhoro mamọ* rọ je dia ọ ri bẹdẹ;
18 avwanre tẹnrovi erọnvwọn re jẹmrẹ, ọ dia erọnvwọn ra mrẹ-ẹ. Kidie erọnvwọn ra mrẹ e rẹ ọmọke, ẹkẹvuọvo i re jẹmrẹ na kẹ i ri bẹdẹ.
Eta rehẹ obotọ na
^ Yẹrẹ “oge.” Ni Eta re Vwomaphia.
^ Yẹrẹ “urhukpẹ.”
^ Vwẹ Grik, “ekuakua ra vwẹ ọphiẹn ru.”
^ Yẹrẹ ọ sa dia, “avwanre si ẹro nu-u.”
^ Vwẹ Grik, “ẹwẹn rẹ esegbuyota.”
^ Vwẹ Grik, “ohwo rẹ avwanre hepha vwẹ otafe.”
^ Yẹrẹ “ọdavwini.”
^ Vwẹ Grik, “ro vwo ọnyẹ.”