Ọrivẹ re si Rhe Ihwo ri Kọrẹnt 5:1-21
5 Kidie avwanre riẹnre nẹ utughẹ nana rọ dia uwevwin rẹ avwanre vwẹ akpọ na da guọghọ,* Ọghẹnẹ cha kẹ avwanre uwevwin ọvo ra vwẹ obọ bọ-ọn, rọ cha dia bẹdẹ vwẹ idjuvwu.
2 Kidie avwanre guan vwevunrẹ uwevwin nana vẹ owenvwe ọgangan rẹ avwanre vwo ku ọ ro nẹ obodjuvwu rhe na phiyọ,*
3 rere ọke rẹ avwanre de kuo phiyọ, avwanre rha cha ban phiyọ-ọ.
4 Vwọrẹ uyota, avwanre rehẹ evunrẹ utughẹ nana guan je ro ẹnwan, kidie avwanre guọnọ ku ọnana nu-u, ẹkẹvuọvo avwanre guọnọ ku ọ ro chekọ na phiyọ, rere arhọ se vwo mu obo ri ghwẹ na rọ.
5 Asaọkiephana, Ọghẹnẹ yen muegbe rẹ avwanre vwọ kẹ orọnvwọn nana, ọ kẹ avwanre ẹwẹn rọyen kerẹ imuẹro rẹ obo re cha.*
6 Ọtiọyena ọkieje yen avwanre vwo fiudugberẹ; avwanre je riẹn nẹ avwanre je vwọ hẹ evunrẹ* ugboma nana na, avwanre vẹ Ọrovwori na herọ-ọ,
7 kidie avwanre yan womarẹ esegbuyota ọ dia womarẹ obo ra mrẹ-ẹ.
8 Ẹkẹvuọvo avwanre fiudugberi, oma je cha vwerhen avwanre ra vwọ yanjẹ ugboma nana vwo, rere avwanre re nene Ọrovwori na dia.
9 Ọtiọyena owenẹ avwanre nene dia uwevwin yẹrẹ avwanre nene dia-a, avwanre guọnọ ru obo re cha nẹrhẹ o rhiabọreyọ avwanre.
10 Kidie avwanre eje cha vwomaphia vwẹ obaro rẹ agbara rẹ ẹdjọeguo ri Kristi, rere a hwosa kẹ ohwo ọvuọvo vwo nene obo ro ruru ọke rọ vwọ hẹ ugboma na, owenẹ ọ dia obo ri yovwirin yẹrẹ obo re brare.*
11 Ọtiọyena, rẹ avwanre vwọ riẹn oborẹ oshọẹdjẹ rẹ Ọrovwori na mudiaphiyọ na, kẹ avwanre davwẹngba vwo ku ẹwẹn rẹ ihwo rhẹriẹ, ẹkẹvuọvo Ọghẹnẹ nabọ riẹn oka rẹ ihwo rẹ avwanre hepha. Mi ji roro nẹ ovwan* je nabọ riẹn avwanre.
12 Ọ dia avwanre rhoma jiri oma rẹ avwanre kẹ ovwa-an, ẹkẹvuọvo avwanre ta enana eje rere ovwan sa vwọ reyọ avwanre vwọ yonma, ovwan sa vwọ kpahen kẹ otu re reyọ obo rehẹ otafe vwọ yonma ukperẹ obo rehẹ evunrẹ ubiudu na.
13 Uyovwin rẹ avwanre rha gba-a, ọ dia ọtiọyen fikirẹ Ọghẹnẹ; uyovwin rẹ avwanre da gba, kẹ fikirẹ ovwan.
14 Ẹguọnọ rẹ Kristi vwori yen suẹn avwanre, kidie ọnana yen oborẹ avwanre vwo ẹruọ rọyen, nẹ ohwo ọvo ghwu kẹ avwanre ejobi, ọtiọyena avwanre eje ghwuru.
15 O ghwu kẹ ihwo eje rere otu ri yerẹn vwo jẹ yerẹn kẹ oma obọ rayen ọfa, ẹkẹvuọvo vwọ kẹ ohwo* rọ vwẹ fikirẹ ayen ghwu ra da kparọ vrẹn na.
16 Vwo nẹ ọke nana yanran, avwanre rha vwẹ ẹro rẹ ohworakpọ vwo nẹ ohwo vuọvo-o. Ọ da tobọ dianẹ avwanre vwẹ ẹro rẹ ohworakpọ vwo ni Kristi jovwo, avwanre rha vwẹ ẹro tiọyena vwo no ọfa-a.
17 Ọtiọyena, kohwo kohwo rọ vẹ Kristi gba herọ, ohwo yena kẹ emama kpokpọ; erọnvwọn awanre na wanvrẹ re; nighere! erọnvwọn kpokpọ rhire.
18 Ẹkẹvuọvo, erọnvwọn ejobi nẹ obọ rẹ Ọghẹnẹ rhe, ohwo ro nene avwanre rhuẹrẹ kugbe womarẹ Kristi, rọ je kẹ avwanre iruo rẹ arhuẹrẹ na,
19 nẹ avwanre ghwoghwo nẹ Ọghẹnẹ nene akpọ na rhuẹrẹ kuẹgbe womarẹ Kristi, o kere imwemwu rayen ba ayen abọ-ọ, ọ da kẹ avwanre ovuẹ rẹ arhuẹrẹ na.
20 Ọtiọyena, avwanre ikọn ri mudia vwọ kẹ Kristi, kerẹsiẹ ra da mrẹ nẹ Ọghẹnẹ rẹ womarẹ avwanre. Kerẹ ihwo ri mudia vwọ kẹ Kristi, avwanre rẹ: “Ovwan vẹ Ọghẹnẹ rhuẹrẹ kugbe.”
21 Ọghẹnẹ vwẹ ohwo ro ji ru umwemwu dẹvo-o vwo ze izobo fikirẹ imwemwu rẹ avwanre, rere avwanre sa vwọ wan oma rọyen dia evwata vwẹ obaro rẹ Ọghẹnẹ.
Eta rehẹ obotọ na
^ Yẹrẹ “de she.”
^ Yẹrẹ “vwọ ro uwevwin avwanre vwẹ obodjuvwu.”
^ Yẹrẹ “kerẹ ubro rẹ igho ra hwa phiyotọ; obo re vwo viẹ ẹwan.”
^ Vwẹ Grik, “avwanre ji vwo vwo uwevwin nana vwevunrẹ.”
^ Yẹrẹ “umiovwo.”
^ Vwẹ Grik, “ẹwẹn obrorhiẹn rẹ ovwan.”
^ Yẹrẹ “Kristi.”