Ọrivẹ re si Rhe Ihwo ri Kọrẹnt 7:1-16
7 Ọtiọyena iniọvo eghanghanre, re vwo ve ive nana kẹ avwanre na, e jẹ avwanre ru oma rẹ avwanre fuanfon vwo nẹ kemu kemu ro se gbe ugboma vẹ iroro* rẹ avwanre ẹgua, rere avwanre sa vwọ nabọ dia fuanfon rẹ avwanre vwọ djoshọ rẹ Ọghẹnẹ na.
2 Ovwan rhie ubiudu rẹ ovwan phiyọ kẹ avwanre. Avwanre gbe ohwo ọvuọvo ku-u, avwanre miovwo ohwo ọvuọvo-o, avwanre je ghwa ohwo ọvuọvo re-e.
3 Ọ dia me ta ọnana mi vwo brorhiẹn hwe ovwa-an. Kidie me tarọ jovwo re nẹ owenẹ avwanre ghwuru yẹrẹ avwanre rhọre, avwanre vwo ẹguọnọ rẹ ovwan.
4 Me sa ta ota kẹ ovwan odedede. Me reyọ ovwan vwọ yonma mamọ. A bọn vwẹ gan; me je vọn vẹ aghọghọ mamọ vwevunrẹ ukpokpogho rẹ avwanre eje.
5 Vwọrẹ uyota, avwanre vwo te Masidonia, oma fu ugboma avwanre-e,* ẹkẹvuọvo a vwẹ oja re avwanre vwẹ kidjerhe kidjerhe—omukpahen* ọgangan vwẹ obotafe, oshọ vwẹ obevun.
6 Ẹkẹvuọvo, Ọghẹnẹ ro brẹ otu rẹ ẹwẹn rayen kuọrọnre uche na, da bọn avwanre gan womarẹ Taitọs ro bru avwanre rhe;
7 ọ dia womarẹ ẹcha rọyen ọvo-o, ẹkẹvuọvo ji te ọbọngan rọ mrẹre fikirẹ ovwan, rọ vwọ niyẹnrẹn kẹ avwanre kpahen oborẹ ovwan rhẹro mẹ te, omaemuophiyọ ọgangan rẹ ovwan kugbe ọdavwẹ okokodo* rẹ ovwan vwo kpahen ovwẹ; ọtiọyena aghọghọ mẹ da rhoma ganphiyọ.
8 Ọ da tobọ dianẹ ọbe mi siri nẹrhẹ ovwan muomaphiyọ, ọ da vwẹ-ẹ. Ọ da tobọ dianẹ ọ da vwẹ ẹsosuọ (me vwọ mrẹ nẹ ọmọke krẹn yen ọ nẹrhẹ ovwan muomaphiyọ na),
9 me ghọghọ asaọkiephana, ọ dia kidie nẹ we muomaphiyọ ọvo-o, ẹkẹvuọvo kidie nẹ omaemuophiyọ rẹ ovwan nẹrhẹ ovwan kurhẹriẹ. Ovwan muomaphiyọ vwẹ idjerhe ro shephiyọ ọhọre rẹ Ọghẹnẹ, kọyensorọ oborẹ avwanre ta kẹ ovwan rha so omaẹwan vuọvo kẹ ovwa-an.
10 Kidie omaemuophiyọ vwẹ idjerhe ro shephiyọ ọhọrẹ rẹ Ọghẹnẹ nẹrhẹ e kuẹrhẹriẹ e mi ji vwo usivwin, a viẹ idiekpọvwẹ kpahọ-ọn; ẹkẹvuọvo omaemuophiyọ rẹ akpọ nana sua ughwu.
11 Ovwan gbe ni oborẹ ẹgbaẹdavwọn rẹ ovwan ghwa rhe kidie nẹ ovwan muomaphiyọ vwẹ idjerhe ro shephiyọ ọhọre rẹ Ọghẹnẹ, e, ovwan ru oma rẹ ovwan fon, e, ophu mu ovwan kpahen obo re brare, e, ovwan djoshọ, e, ovwan vwo owenvwe ọgangan, e, ovwan vwo oruru, e, ovwan kpọ obo re chọre vi! Vwẹ kidjerhe kidjerhe, we dje oma rẹ ovwan phia kerẹ ihwo re fonro vwevunrẹ ota nana.
12 Dede nẹ mi si rhe ovwan, jẹ ọ dia mi ru ọtiọyen fikirẹ ohwo ro ru chọ yẹrẹ fikirẹ ọ re ru chọ-ọ, ẹkẹvuọvo rere ọdavwẹ rẹ ovwan vwo kpahen avwanre sa vwọ nabọ teyenphia vwẹ ohri rẹ ovwan vwẹ ẹro rẹ Ọghẹnẹ.
13 Kọyensorọ ẹwẹn rẹ avwanre vwọ dia dọe.
Ẹkẹvuọvo vwọba ọbọngan rẹ avwanre mrẹre, oma vwerhen avwanre mamọ fikirẹ aghọghọ ro rhe Taitọs, kidie ovwan eje nẹrhẹ ẹwẹn rọyen sasa.
14 Ọ da dianẹ me vwẹ ovwan yonma vwọ kẹ jovwo, ovwan ku omavovwẹ phiyọ ovwẹ ẹro-o; ẹkẹvuọvo kirobo rẹ erọnvwọn ejobi rẹ avwanre vuẹ ovwan dia uyota na, ọtiọyen omaẹyan rẹ avwanre vwọ kẹ Taitọs je dia uyota.
15 Vwọba, ẹguọnọ ro vwo kpahen ovwan ganphiyọ, rọ vwọ karophiyọ ẹmienyo rẹ ovwan eje, oborẹ ovwan rhiabọreyọ vẹ oshọ kugbe ẹphariẹ.
16 Me ghọghọre nẹ me sa vwẹroso ovwan* vwẹ kidjerhe kidjerhe.
Eta rehẹ obotọ na
^ Vwẹ Grik, “ẹwẹn.”
^ Yẹrẹ “oma fu uvwo avwanre-e.”
^ Vwẹ Grik, “ohọnre.”
^ Vwẹ Grik, “oruru ọgangan.”
^ Yẹrẹ ọ sa dia, “mi se fiudugberi fikirẹ ovwan.”