Ọrivẹ re si Rhe Ihwo ri Tẹsalonaika 1:1-12
1 Pọl, Silvanọs,* kugbe Timoti, vwo rhe ukoko rẹ ihwo ri Tẹsalonaika re vẹ Ọghẹnẹ rọ dia Ọsẹ na kugbe Ọrovwori na Jesu Kristi gba herọ:
2 E jẹ ẹse re muwan rọye-en kugbe ufuoma ro nẹ obọ rẹ Ọghẹnẹ rọ dia Ọsẹ na kugbe Ọrovwori na Jesu Kristi rhe, nene ovwan dia.
3 Iniọvo, avwanre vwo oghwa rẹ avwanre vwọ kpẹvwẹ Ọghẹnẹ kọke kọke fikirẹ ovwan. Ọnana fori kidie esegbuyota rẹ ovwan rha rhuaphiyọ, ẹguọnọ rẹ ovwan ohwo ọvuọvo vwo kpahen ohwohwo je ganphiyọ.
4 Ọtiọyena, kẹ avwanre vwẹ ovwan vwọ yonma vwẹ ohri rẹ ikoko rẹ Ọghẹnẹ, fikirẹ akoechiro kugbe esegbuyota rẹ ovwan djephia vwevunrẹ omukpahen kugbe ebẹnbẹn* na eje rẹ ovwan rioja* rọyen na.
5 Ọnana odjephia rẹ ophiọnphiọn rẹ ẹdjọeguo rẹ Ọghẹnẹ, rọ nẹrhẹ e kere ovwan phiyọ ihwo ri fori vwọ kẹ Uvie rẹ Ọghẹnẹ rẹ ovwan vwẹ fiki rọyen rioja na.
6 Kidie vwọrẹ uyota, o shephiyọ* rẹ Ọghẹnẹ vwọ vwẹ ukpokpogho vwọ hwosa kẹ ihwo re sua ukpokpogho kẹ ovwan.
7 Ẹkẹvuọvo a cha kẹ ovwan re rioja rẹ ukpokpogho na vẹ avwanre urovwoma vwẹ ọke ra da cha vwẹ Ọrovwori na Jesu kugbe emekashe rọyen re vọnre vẹ ẹgba na phia nẹ odjuvwu rhe,
8 vwevunrẹ ogidi erhanre, rọ cha vwọ hwosa kẹ ihwo ri jẹ Ọghẹnẹ ẹriẹn, kugbe ihwo re rhọnvwe kerhọ rẹ iyẹnrẹn esiri ro shekpahen Ọrovwavwanre Jesu-u.
9 Enana cha rioja rẹ ẹdjọeguo rẹ oghwọrọ ri bẹdẹ vwo nẹ obaro rẹ Ọrovwori na kugbe urinrin rẹ ogangan rọyen,
10 vwẹ ọke rọ da rhe rere a vwẹ urinrin kẹ vẹ ihwo efuanfon rọyen, ihwo eje ri vwo esegbuyota kpahọn ki che no vẹ igbevwunu vwẹ ẹdẹ yena, kidie ovwan vwo esegbuyota kpahen iseri rẹ avwanre se kẹ ovwan na.
11 Kọyensorọ avwanre vwọ nẹrhovwo kẹ ovwan ọkieje, nẹ Ọghẹnẹ rẹ avwanre kere ovwan phiyọ ihwo ri fori vwọ kẹ use rọyen, rere ọ vwẹ ẹgba rọyen vwo ru erọnvwọn eje ri je kugbe kiruo kiruo rẹ esegbuyota gba.
12 Rere a sa vwọ vwẹ urinrin kẹ odẹ rẹ Ọrovwavwanre Jesu womarẹ oborẹ ovwan ruẹ, a me je vwẹ urinrin kẹ ovwan fiki rọyen, kirobo rẹ ẹse re muwan rọye-en rẹ Ọghẹnẹ rẹ avwanre kugbe Ọrovwori na Jesu Kristi hepha.
Eta rehẹ obotọ na
^ Re ji se Sailas.
^ Yẹrẹ “ukpokpogho.”
^ Yẹrẹ “chirakon.”
^ Yẹrẹ “ọyen emu rẹ ọsoso.”