Ọrivẹ re si Rhe Ihwo ri Tẹsalonaika 2:1-17
2 Ẹkẹvuọvo iniọvo, vwọ kpahen ọrhire* rẹ Ọrovwavwanre Jesu Kristi kugbe ẹghwẹ ra cha ghwẹ avwanre koko bro ra na, avwanre vuẹ ovwan
2 nẹ ovwan fobọ phieghe nẹ iroro rẹ ovwa-an, yẹrẹ e jẹ oshọ muẹ ovwan fikirẹ ota ra tare nẹ o nẹ obọ rẹ Ọghẹnẹ rhe, yẹrẹ fikirẹ ovuẹ ra vwẹ unu ta, yẹrẹ ọbe rọ họhọ obo ri nẹ obọ rẹ avwanre rhe, rọ tanẹ ẹdẹ ri Jihova* rhire-e.
3 We jẹ ohwo vuọvo sun ovwan ghwrẹ* vwẹ idjerhe vuọvo-o, kidie ọ cha rhe-e, jokpanẹ ẹvwọsuọ* na rhere tavwen, e mi ji dje ohwo ro jurhi ẹyọnrọn rọ dia ọmọ rẹ oghwọrọ na phia.
4 Ọ vwọsua je kparoma rọyen kpenu vwọ vrẹ kohwo kohwo re se ọghẹnẹ yẹrẹ orọnvwọn ra ga,* ọtiọyena o de chidia vwẹ uwevwin rẹ ẹga rẹ Ọghẹnẹ, jẹ o dje oma rọyen vwẹ azagba nẹ ọyen ọghẹnẹ.
5 Ovwan karophiyọ nẹ me vuẹ ovwan erọnvwọn nana ọke re me vẹ ovwan je vwọ herọ?
6 Asaọkiephana ovwan riẹn obo re dajẹ, rere e se vwo djephia vwẹ ọke ro fori.
7 Vwọrẹ uyota, igbunu ri jurhi ẹyọnrọn nana ton iruo phiyọ re, ọ cha dia ọtiọyen bẹsiẹ ọ rọ dajẹ asaọkiephana vwo vrẹn nẹ idjerhe kẹ.
8 Ọke yena, ka cha vwẹ ọ ro jurhi ẹyọnrọn na phia, ohwo rẹ Ọrovwori na Jesu che sino womarẹ ẹwẹn rẹ unu rọyen, ji hirhephiyọ ofefe womarẹ odjephia rẹ ọrhire* rọyen.
9 Ẹkẹvuọvo, ọ ro jurhi ẹyọnrọn na herọ fikirẹ ẹgba rẹ Eshu vwọ kẹ ro vwo ruẹ kiruo kiruo rọ vọnre vẹ ẹgba kugbe eka vẹ igbunu rẹ efian
10 kugbe jẹ ọsoso enene kugbe koka koka rẹ ophiẹnvwe vwọ kẹ ihwo ra cha vwẹ oghwọrọ hwosa kẹ, kidie ayen rhọnvwe rhiabọreyọ ẹguọnọ rẹ uyota na rere ayen vwo vwo usivwi-in.
11 Kọyensorọ Ọghẹnẹ vwọ vwẹ uphẹn kẹ ayen ra vwọ phiẹn ayen womarẹ uyono rẹ efian, rere ayen vwo se eta rẹ efian gbuyota,
12 rere a vwọ vwẹ ayen eje vwo guẹdjọ kidie ayen vwo esegbuyota kpahen uyota na-a, ẹkẹvuọvo obo ri jẹ ọsoso ẹdia yen vwerhen ayen oma.
13 Ẹkẹvuọvo avwanre vwo oghwa rẹ avwanre vwọ kpẹvwẹ Ọghẹnẹ kọke kọke fikirẹ ovwan, iniọvo ri Jihova* vwo ẹguọnọ kpahen, kidie nẹ ọtonphiyọ rhe yen Ọghẹnẹ vwọ sane ovwan vwọ kẹ usivwin womarẹ orufon ro ru ovwan fon womarẹ ẹwẹn rọyen, kugbe womarẹ esegbuyota rẹ ovwan vwo kpahen uyota na.
14 O se ovwan vwọ kẹ ọnana womarẹ iyẹnrẹn esiri rẹ avwanre ghwoghwo, rere ovwan se vwo vwo urinrin rẹ Ọrovwavwanre Jesu Kristi.
15 Ọtiọyena iniọvo, ovwan mudia gan rere ovwan yọnrọn erọnvwọn* re yono ovwan na kokoroko, owenẹ ọ dia womarẹ ota rẹ unu yẹrẹ ọbe ro nẹ obọ rẹ avwanre rhe.
16 Vwọ vrẹ ọyena, e jẹ Ọrovwavwanre Jesu Kristi komobọ, kugbe Ọghẹnẹ rọ dia Ọsẹ rẹ avwanre ro vwo ẹguọnọ rẹ avwanre, rọ je kẹ avwanre uchebro ri bẹdẹ kugbe uvi rẹ iphiẹrophiyọ womarẹ ẹse re muwan rọye-en na,
17 bru ubiudu rẹ ovwan uche* ji ru ovwan gan* vwẹ kiruo kiruo esiri kugbe ota ejobi.
Eta rehẹ obotọ na
^ Ni Eta re Vwomaphia.
^ Ni Eta re Vwomaphia.
^ Yẹrẹ “riẹriẹ ovwan.”
^ Yẹrẹ “ihwo ri chukoku ẹga rẹ uyota.”
^ Yẹrẹ “re muọghọ kẹ.”
^ Ni Eta re Vwomaphia.
^ Ni Eta re Vwomaphia.
^ Vwẹ Grik, “ẹkuruemu.”
^ Yẹrẹ “sasa ubiudu rẹ ovwan.”
^ Yẹrẹ “kpuriẹn phiyọ ovwan oma.”