Ọrivẹ re si Rhe Ihwo ri Tẹsalonaika 3:1-18
3 Ọ rọ koba iniọvo, ovwan rha nẹrhovwo kẹ avwanre, rere ota ri Jihova* rha hẹrẹphiyọ kpakpata, e mi ji rhe tito kirobo rẹ ovwan ruẹ na,
2 rere e se vwo sivwin avwanre nẹ obọ rẹ ihwo umwemwu re sua omaẹwan, kidie ọ dia ihwo ejobi yen vwo esegbuyota-a.
3 Ẹkẹvuọvo Ọrovwori na fuevun, ọ cha bọn ovwan gan je sẹro rẹ ovwan vwo nẹ obọ rẹ ohwo umwemwu na.
4 Vwọba, avwanre vwẹroso ovwan vwevunrẹ Ọrovwori na, nẹ ovwan ruẹ oborẹ avwanre vuẹ ovwan nẹ ovwan ru, ovwan ji che rhe ruẹ ọtiọyen.
5 E jẹ Ọrovwori na rha sẹro rẹ ubiudu rẹ ovwan rere ovwan se vwo vwo ẹguọnọ rẹ Ọghẹnẹ, ji chirakon nene Kristi ọkieje.
6 Asaọkiephana iniọvo, avwanre vwẹ iji kẹ ovwan vwẹ odẹ rẹ Ọrovwavwanre Jesu Kristi, nẹ ovwan kẹnoma kẹ koniọvo koniọvo rọ yan nene ọrhuẹrẹphiyotọ-ọ, ro ji ruẹ nene oborẹ ovwan* yono mie avwanre-e.
7 Ovwan komobọ riẹn obo ro fori nẹ ovwan ru rẹ ovwan vwọ vwẹrokere avwanre, kidie avwanre dia ihwo ri jẹ ọrhuẹrẹphiyotọ enene ọke rẹ avwanre vwọ hẹ ohri rẹ ovwa-an,
8 yẹrẹ kẹ avwanre riemu rẹ ohwo ọvo ọphẹ-ẹ. Ukperẹ ọtiọyen, womarẹ owian ọgangan vẹ omaẹlaghọ, avwanre wianre te ason te uvo rere avwanre vwo jẹ oghwa ọhọhọhọ ẹdia vwọ kẹ ohwo vuọvo vwẹ usun rẹ ovwan.
9 Ọ dianẹ kẹ avwanre jẹ uturhi na evwo-o, ẹkẹvuọvo avwanre guọnọ vwẹ oma rẹ avwanre vwo ru udje kẹ ovwan rere ovwan vwẹrokere avwanre.
10 Vwọrẹ uyota, ọke rẹ avwanre vẹ ovwan vwọ herọ, avwanre vwanriẹn iji nana kẹ ovwan nẹ: “Ohwo rọ rhọnvwe wia-an, e jẹ ọ ria-a.”
11 Kidie avwanre nyori nẹ ihwo evo vwẹ ohri rẹ ovwan na muẹ ruẹ, ayen wian kakaka-a, ẹkẹvuọvo ayen duvwun unu phiyọ eta ri te aye-en.
12 Ihwo tiọyena yen avwanre vwẹ iji kugbe uchebro nana kẹ vwevunrẹ Ọrovwori Jesu Kristi, nẹ ayen ruiruo rayen dẹndẹn je riemu rẹ ayen komobọ vwẹ obọ rayen wian.
13 Vwọ kẹ ovwan iniọvo, ovwan jẹ ofu rẹ ovwan vwo ru obo ri yovwirin dje ovwa-an.
14 Ẹkẹvuọvo kohwo kohwo rọ rhọnvwe ru nene oborẹ avwanre siri vwẹ ọbe nana-a, ovwan jokaphiyọ ohwo ọtiọyena, ovwan vẹ ọyen rhe ruẹ kuẹgbe-e, rere oma vwọ vuọ.
15 Dedena ovwan reyọ vwo ruẹ ọvweghrẹ-ẹn, ẹkẹvuọvo ovwan mi rhe bro uche kerẹ oniọvo.
16 Asaọkiephana, e jẹ Ọrovwori rẹ ufuoma na komobọ kẹ ovwan ufuoma ọkieje vwẹ kidjerhe kidjerhe. E jẹ Ọrovwori na nene ovwan ejobi dia.
17 Ọnana uyeren mẹ, rẹ omẹvwẹ ri Pọl vwẹ obọ mẹ vwo si, rọ dia oka rọhẹ kọbe kọbe ri mi siri; enẹ yen mi siẹ ẹbe mẹ wan.
18 E jẹ ẹse re muwan rọye-en rẹ Ọrovwavwanre Jesu Kristi nene ovwan ejobi dia.