Ọrivẹ ri Pita 1:1-21
1 Saimọn Pita, odibo kugbe ọyinkọn ri Jesu Kristi, vwo rhe ihwo ri vwo esegbuyota rọ pha ghanghanre kerẹ ọ rẹ avwanre,* womarẹ ọvwata rẹ Ọghẹnẹ rẹ avwanre kugbe Osivwin na, Jesu Kristi:
2 E jẹ ẹse re muwan rọye-en kugbe ufuoma bunphiyọ kẹ ovwan womarẹ erianriẹn ọgbagba rẹ Ọghẹnẹ vẹ ọ ri Jesu Ọrovwavwanre.
3 Ẹgba rẹ Ọghẹnẹ nẹrhẹ avwanre vwo erọnvwọn eje re sa nẹrhẹ e yeren akpọ kerẹ ihwo re vwomakpahotọ kẹ Ọghẹnẹ. Avwanre vwo erọnvwọn nana kidie avwanre nabọ riẹn Ọghẹnẹ, Ohwo ro se avwanre womarẹ urinrin vẹ uyoyovwin rọyen.
4 Womarẹ erọnvwọn nana kọyen o vwo ve obọdẹn rẹ ive re je ghanre vwọ kẹ avwanre, rere womarẹ enana, ovwan sa vwọ dia ihwo rẹ ẹwẹn kerẹ Ọghẹnẹ, rọ vwọ dianẹ ovwan vrabọ rẹ umiovwo rẹ akpọ na rẹ urhurusivwe ọbrabra* ghwa cha na.
5 Fikirẹ ọnana, ovwan gba davwẹngba rẹ ovwan eje vwọ vwẹ uyoyovwin vwọba esegbuyota rẹ ovwan, erianriẹn vwọba uyoyovwin,
6 omaẹriẹnsuon vwọba erianriẹn, akoechiro vwọba omaẹriẹnsuon, omaẹvwọkpahotọ kẹ Ọghẹnẹ vwọba akoechiro,
7 ẹguọnọ rẹ iniọvo vwọba omaẹvwọkpahotọ kẹ Ọghẹnẹ, ẹguọnọ vwọba ẹguọnọ rẹ iniọvo.
8 Ovwan de vwo iruemu nana, e da je vọn ovwan oma, kẹ ovwan cha vrabọ rẹ jẹ iruo eruo yẹrẹ jẹ emamọ emọ kpahen erianriẹn ọgbagba rẹ Ọrovwavwanre Jesu Kristi.
9 Kidie kohwo kohwo rẹ iruemu nana kanre jẹ o rhuẹro, o rhurhu ẹro rọyen vwọ kẹ urhukpẹ na,* ọ je chọrọ ẹro nẹ e ruro fon vwo nẹ imwemwu awanre rọyen re.
10 Ọtiọyena iniọvo, ovwan nabọ frẹkotọ ru use kugbe ẹsanọ rẹ ovwan na rere o vwo mu ovwan ẹro, kidie ovwan de dje iruemu nana phia ọkieje, ovwan che se she bẹdẹ-ẹ.
11 Vwọrẹ uyota, womarẹ ọnana kẹ ovwan che vwo obọdẹn rẹ uphẹn* rẹ ovwan cha vwọ ro Uvie ri bẹdẹ rẹ Ọrovwavwanre kugbe Osivwin rẹ avwanre, Jesu Kristi.
12 Fikirẹ ọnana, ọkieje mi vwo vwo ẹwẹn me vwọ karophiyọ ovwan erọnvwọn nana dede nẹ ovwan riẹn ayen, awọ rẹ ovwan je nabọ muotọ vwevunrẹ uyota ro rhe ovwan na.
13 Ẹkẹvuọvo mi niro nẹ o shephiyọ me vwọ rhoma karophiyọ ovwan erọnvwọn nana, me je vwọ hẹ ugboma* nana,
14 kidie me riẹnre nẹ mi che ku ugboma nana phiyotọ kẹrẹkpẹ, kirobo rẹ Ọrovwavwanre Jesu Kristi djere kẹ vwẹ.
15 Me cha davwẹngba mẹ ọkieje, rere me da yanran re, ovwan sa vwọ karophiyọ erọnvwọn nana komobọ.
16 Ẹjo, ọ dia womarẹ ikuegbe rẹ efian yen avwanre vwo dje ogangan vẹ ọrhire* rẹ Ọrovwavwanre Jesu Kristi kẹ ovwa-an, ukperẹ ọtiọyen, avwanre rhiẹromrẹ urinrin rọyen.
17 Ọghẹnẹ rọ dia Ọsẹ na rọ je dia esiri rẹ urinrin rode na brọghọ phiyọ oma je vwẹ urinrin kẹ, ọke rọ vwọ ta eta kerẹ ọnana kẹ nẹ: “Ọnana Ọmọ mẹ, ri mi vwo ẹguọnọ rọyen, rẹ mẹvwẹ komobọ rhiabọreyọ na.”
18 Avwanre nabọ nyo eta nana ra ta nẹ odjuvwu rhe, ọke rẹ avwanre vẹ ọyen vwọ hẹ enu rẹ ugbenu ọfuanfon na.
19 Ọtiọyena, imuẹro rẹ avwanre vwo kpahen ota rẹ aroẹmrẹ na kọ rhoma rhe ganphiyọ, ovwan riẹn ru rẹ ovwan vwọ kerhọ rọyen kerẹ urhukpẹ ro lo vwẹ asan ebri (bẹsiẹ rẹ ọke vwo rhie, isio rẹ urhiọke vwọ varhe) vwevunrẹ ubiudu rẹ ovwan.
20 Ovwan riẹn ọnana jovwo nẹ, o vwo aroẹmrẹ rẹ Isiesi Ọfuanfon na vuọvo ro nẹ iroro rẹ ohworakpọ rhe-e.
21 Kidie o vwo ọke vuọvo rẹ aroẹmrẹ vwo nẹ obọ rẹ ohworakpọ rhe-e, ẹkẹvuọvo ihwo rẹ ẹwẹn ọfuanfon muru* yen ta ota ro nẹ obọ rẹ Ọghẹnẹ rhe.
Eta rehẹ obotọ na
^ Yẹrẹ “ihwo rẹ esegbuyota rayen vẹ ọ rẹ avwanre dia abavo.”
^ Yẹrẹ “orharhe urhurusivwe.”
^ Yẹrẹ ọ sa dia, “ọ mrorẹ te-e.”
^ Yẹrẹ “uphẹn rode.”
^ Vwẹ Grik, “utughẹ.”
^ Ni Eta re Vwomaphia.
^ Vwẹ Grik, “mu nene oma.”